വാളയാറിൽ വാഹനാപകടം; ഒരാൾ മരിച്ചു

മലപ്പുറം താനൂർ കുണ്ടുങ്ങൽ സ്വദേശിയാണ്​ മരിച്ചത്​ കഞ്ചിക്കോട്​: വാളയാറിൽ ചാവടിപ്പാലത്തിനു സമീപം ലോറിക്കു പിന്നിൽ ഇടിച്ച പിക്​അപ്​ വാനിലേക്ക്​ കണ്ടെയ്നർ ലോറി ഇടിച്ചുകയറി ഒരാൾ മരിച്ചു. വാൻ ഡ്രൈവർ ഉൾപ്പെടെ നാലുപേർക്ക്​ പരിക്കേറ്റു. മത്സ്യവ്യാപാരിയായ മലപ്പുറം താനൂർ കുണ്ടുങ്ങൽ സ്വദേശി ആഷിക്ക് അലി (39) ആണ് മരിച്ചത്. ഡ്രൈവർ മണികണ്ഠന് സാരമായി പരിക്കേറ്റു. ചരക്കു ലോറിയിലെയും കണ്ടെയ്നർ ലോറിയിലെയും ജീവനക്കാർക്കും പരിക്കുണ്ട്. മൂന്നു വാഹനങ്ങളും കോയമ്പത്തൂരിൽനിന്ന്​ പാലക്കാട്ടേക്ക് വരുകയായിരുന്നു. പച്ചക്കറിയുമായി വന്ന ചരക്കു ലോറിയിൽ മീൻ കയറ്റി വന്ന പിക്​അപ്​ വാനാണ്​ ആദ്യം ഇടിച്ചത്​. പിന്നിലെത്തിയ കണ്ടെയ്നർ വാനിൽ ഇടിച്ചു. തുടർന്ന്​ വാൻ ചരക്കുലോറിക്ക്​ അടിവശത്തേക്ക്​ ഇടിച്ചുകയറുകയായിരുന്നു. കഞ്ചിക്കോട് അഗ്​നിരക്ഷസേനയെത്തി പിക്​അപ്​ വാൻ വെട്ടിപ്പൊളിച്ചാണ്​ പരിക്കേറ്റവരെ പുറത്തെടുത്ത്. ഡ്രൈവറെ സ്വകാര്യ ആശുപത്രിയിലേക്കും പരിക്ക്​ ഗുരുതരമായിരുന്ന ആഷിക്ക് അലിയെ കോയമ്പത്തൂർ ഗവ. മെഡിക്കൽ കോളജ്​ ആശുപത്രിയിലേക്കും എത്തിച്ചെങ്കിലും ആഷിക്ക് അലി മരിച്ചു. രാത്രി 11ഓടെയാണ് അപകടം. കഞ്ചിക്കോട്​ ഫയർഫോഴ്സ് ഉദ്യോഗസ്ഥരായ ഇ.ഒ. വർഗീസ്, ഫയർ ഓഫിസർമാരായ അബു സലിം, കലാധരൻ, ഗോപകുമാർ, ഹോംഗാർഡുമാരായ രാമചന്ദ്രൻ, മോഹന കൃഷ്ണൻ എന്നിവരാണ് രക്ഷാപ്രവർത്തനത്തിൽ പങ്കെടുത്തത്. തെറ്റമ്മൽ പിലാത്തോട്ടത്തിൽ ഹൈദർ അലി-ഫാത്തിമ ദമ്പതികളുടെ മകനാണ്​ മരിച്ച ആഷിക്ക്​ അലി. ഭാര്യ ഫൗസിയ. സഹോദരങ്ങൾ: അക്​ബർ അലി, ബദറുന്നീസ, കമറുന്നീസ, ഷൈഫുന്നീസ. Obit Ashik Ali 39 ആഷിക്ക് അലി