നിലമ്പൂര്‍ (മലപ്പുറം): നിലമ്പൂര്‍ - ഷൊർണൂര്‍ പാതയില്‍ മാര്‍ച്ച് ഒന്നിന് ആരംഭിക്കുന്ന അണ്‍റിസർവ്ഡ് സ്‌പെഷല്‍ എക്‌സ്പ്രസിന് മുഴുവന്‍ സ്റ്റേഷനുകളിലും സ്റ്റോപ് അനുവദിച്ച് റെയിൽവേ ഉത്തരവിറക്കി. നേരത്തെ വാണിയമ്പലത്തും അങ്ങാടിപ്പുറത്തും മാത്രമാണ് സ്റ്റോപ് അനുവദിച്ചിരുന്നത്.
കോവിഡ് സാഹചര്യത്തില്‍ നിര്‍ത്തലാക്കിയ പാസഞ്ചറുകളിലൊന്നാണ് സ്‌പെഷല്‍ എക്സ്പ്രസായി മാര്‍ച്ച് ഒന്നു മുതല്‍ ഓടി തുടങ്ങുന്നത്. പാതയിലെ മുഴുവന്‍ സ്റ്റേഷനുകളിലും സ്റ്റോപ് അനുവദിക്കാതെയാണ് അന്ന് റെയില്‍വേ ഉത്തരവിറങ്ങിയത്.
അതേസമയം എക്സ്പ്രസ് ആയതിനാല്‍ ടിക്കറ്റ് നിരക്കിലെ വർധനവ് തുടരും. മിനിമം ടിക്കറ്റ് നിരക്ക് മൂന്നിരട്ടിയോളമായാണ് വർധിപ്പിച്ചിട്ടുള്ളത്. മിനിമം പത്ത് രൂപ എന്നത് 30 രൂപയാകും. നിലമ്പൂരില്‍ നിന്നും രാവിലെ ഏഴിന് പുറപ്പെട്ട് 8.40 ന് ഷൊർണൂരിലെത്തുന്ന 06466 നമ്പര്‍ പാസഞ്ചർ വണ്ടിയാണ് എക്സ്പ്രസ് ആയി മാർച്ച് ഒന്നിന് സർവിസ് ആരംഭിക്കുന്നത്. വൈകീട്ട് 5.55 ന് ഷൊർണൂരില്‍നിന്ന് പുറപ്പെട്ട് 7.35 ന് നിലമ്പൂരിലെത്തുന്ന 06473 നമ്പര്‍ സർവിസും മാര്‍ച്ച് ഒന്നിന് ആരംഭിക്കും.
എക്സ്പ്രസ് ആക്കിയതോടെ രാവിലെ നിലമ്പൂരില്‍ നിന്ന് പുറപ്പെടുന്ന വണ്ടിക്ക് വാണിയമ്പലത്തും അങ്ങാടിപ്പുറത്തും മാത്രമാണ് ഷൊർണൂരിന് പുറമേ സ്റ്റോപ് അനുവദിച്ചിരുന്നത്. ഇത് ഹ്രസ്വദൂര യാത്രക്കാർക്ക് ഏറെ തിരിച്ചടിയാവുമെന്നും ടിക്കറ്റ് വരുമാനത്തില്‍ തന്നെ വലിയതോതില്‍ കുറവുണ്ടാകുമെന്ന് വിലയിരുത്തപ്പെട്ടിരുന്നു.
നിലമ്പൂർ - ഷൊർണൂർ പാതയിൽ കോവിഡ് നിയന്ത്രണത്തിന് ശേഷം അടുത്തിടെ രാജ‍്യറാണിയും, കോട്ടയം എക്സ്പ്രസും സർവിസ് പുനരാരംഭിച്ചെങ്കിലും പാതയിലെ ലോക്കൽ സ്റ്റേഷനുകളിൽ സ്റ്റോപ് അനുവദിച്ചിരുന്നില്ല. രണ്ട് വർഷമായി സബ് സ്റ്റേഷനുകൾ അടഞ്ഞുകിടക്കുകയാണ്.
66 കിലോമീറ്റർ ദൈർഘ‍്യമുള്ള നിലമ്പൂർ - ഷൊർണൂർ പാതയിൽ തൊടിയപ്പുലം, തുവ്വൂർ, മേലാറ്റൂർ, പട്ടിക്കാട്, ചെറുകര, കുലുക്കല്ലൂർ, വല്ലപ്പുഴ, വാടാനാംകുറിശി തുടങ്ങിയ സബ് സ്റ്റേഷനുകളുണ്ട്. മാർച്ചിൽ പുനരാരംഭിക്കാനിരിക്കുന്ന എക്സ്പ്രസ് സർവിസില്‍ മാറ്റം വന്നതോടെ ഇവിടങ്ങളിലും വണ്ടി നിർത്തും. ഹാള്‍ട്ട് ഏജന്‍റുമാരുടെ കരാര്‍ പുതുക്കുവാനും ഉത്തരവായിട്ടുണ്ട്.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.