റേഡിയോ സി.യുവിന്റെ ലൈവ് പരിപാടികളുടെ ഉദ്ഘാടനം വൈസ് ചാന്‍സലര്‍ ഡോ. എം.കെ. ജയരാജ് നിര്‍വഹിക്കുന്നു
തേഞ്ഞിപ്പലം: കാലിക്കറ്റ് സര്‍വകലാശാല കാമ്പസ് റേഡിയോ ആയ റേഡിയോ സി.യു നൂറാം ദിനാഘോഷത്തിന്റെ ഭാഗമായി ആപ് പുറത്തിറക്കി. ഗൂഗിള്‍ പ്ലേ സ്റ്റോറില്‍നിന്ന് ഡൗണ്‍ലോഡ് ചെയ്യാവുന്ന 'റേഡിയോ സി.യു' ആപ് വഴിയും ഇനി കാമ്പസ് റേഡിയോ ആസ്വദിക്കാനാകും. നൂറാംദിനാഘോഷം വൈസ് ചാന്‍സലര്‍ ഡോ. എം.കെ. ജയരാജ് കേക്ക് മുറിച്ച് ഉദ്ഘാടനം ചെയ്തു. ലൈവ് പരിപാടികളുടെ ഉദ്ഘാടനവും റേഡിയോ ആപ്, തീം സോങ് എന്നിവയുടെ പ്രകാശനവും വി.സി നിര്‍വഹിച്ചു.
സര്‍വകലാശാല കമ്പ്യൂട്ടര്‍ സെന്ററാണ് ആപ് തയാറാക്കിയത്. യു. അനൂപ് രചനയും സംഗീതവും നിര്‍വഹിച്ച പ്രമേയഗാനം പാടിയിരിക്കുന്നത് ഗായികയും കാലിക്കറ്റിലെ പൂര്‍വ വിദ്യാര്‍ഥിയുമായ സിത്താര കൃഷ്ണകുമാറാണ്. ചടങ്ങില്‍ സിന്‍ഡിക്കേറ്റ് അംഗങ്ങളായ പ്രഫ. എം.എം. നാരായണന്‍, കെ.കെ. ഹനീഫ, ഡോ. എം. മനോഹരന്‍, അഡ്വ. ടോം കെ. തോമസ്, എ.കെ. രമേഷ് ബാബു, ഡോ. കെ.പി. വിനോദ് കുമാര്‍, ഡോ. ജി. റിജുലാല്‍, റേഡിയോ ഡയറക്ടര്‍ ദാമോദര്‍ പ്രസാദ്, എക്‌സിക്യൂട്ടിവ് ഡയറക്ടര്‍ ഡോ. ശ്രീകല മുല്ലശ്ശേരി, കമ്പ്യൂട്ടര്‍ സെന്റര്‍ ഡയറക്ടര്‍ ഡോ. വി.എല്‍. ലജിഷ്, ഡോ. സി.ഡി. രവികുമാര്‍, ഐ.ക്യൂ.എ.സി ഡയറക്ടര്‍ ഡോ. പി. ശിവദാസന്‍, ഡിപ്പാര്‍ട്മെന്റ് സ്റ്റുഡന്റ്‌സ് യൂനിയന്‍ ചെയര്‍മാന്‍ സ്‌നേഹില്‍, അധ്യാപകര്‍, ജീവനക്കാര്‍, വിദ്യാര്‍ഥികള്‍ തുടങ്ങിയവര്‍ പങ്കെടുത്തു. വ്യത്യസ്തങ്ങളായ വിനോദ-വിജ്ഞാന പരിപാടികളുമായി റേഡിയോ സി.യു കൂടുതല്‍ വിദ്യാര്‍ഥികളിലേക്ക് എത്തുമെന്ന് വൈസ് ചാന്‍സലര്‍ പറഞ്ഞു. വിദൂരവിദ്യാഭ്യാസ വിഭാഗം വിദ്യാര്‍ഥികള്‍ക്കായുള്ള പഠന പരിപാടികളും വൈകാതെ പ്രക്ഷേപണം ചെയ്യും. നിലവില്‍ വിവിധ രാജ്യങ്ങളിലായി എഴുപതിനായിരത്തോളം ശ്രോതാക്കളാണ് റേഡിയോ സി.യുവിനുള്ളത്.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.