പന്തളത്ത്​ വെള്ളപ്പൊക്ക കെടുതി

-നഗരസഭ പരിധിയിൽ മാത്രം ഒമ്പത്​ ക്യാമ്പുകൾ പന്തളം: രൂക്ഷം. നിരവധി പ്രദേശങ്ങൾ വെള്ളത്തിലായി. വിവിധ പ്രദേശങ്ങളിൽ 200ഓളം വീടുകളിൽ വെള്ളംകയറി. 14 ദുരിതാശ്വാസ ക്യാമ്പുകൾ തുറന്നു. പന്തളം -പത്തനംതിട്ട റോഡിലും പന്തളം-മാവേലിക്കര റോഡിലും പലഭാഗത്തും വെള്ളം കയറിയതിനാൽ ഗതാഗതം നിരോധിച്ചു. കടക്കാട്​ വടക്ക് വളവിൽ രാധാകൃഷ്ണ​ൻെറ വീടിൻെറ ഭിത്തി ഇടിഞ്ഞുതാഴ്​ന്നു. പന്തളം വലിയകോയിക്കൽ ശ്രീധർമശാസ്ത ക്ഷേത്രത്തിനു സമീപം നിർമിച്ച അന്നദാന മണ്ഡപത്തി​ൻെറയും ഭജന മഠത്തി​ൻെറയും പാർക്കിങ്ങിനുവേണ്ടി പണിത സ്ഥലത്ത്​ വെള്ളംകയറി. ചേരിക്കൽ ഗവ. എൽ.പി.എസ്, തോട്ടക്കോണം ഗവ. ഹയർ സെക്കൻഡറി സ്കൂൾ, മുടിയൂർക്കോണം എം.ടി എൽ.പി.എസ്, കുരമ്പാല സൻെറ്​ തോമസ് സ്കൂൾ, വല്ലറ്റൂർ അംഗൻവാടി, ഇടയാടി ഗവ. എൽ.പി.എസ്, തോന്നല്ലൂർ ഗവ. എൽ.പി.എസ്, കടക്കാട് എൽ.പി.എസ് എന്നിവിടങ്ങളിലെ ദുരിതാശ്വാസ ക്യാമ്പുകളിൽ 120ഓളം കുടുംബങ്ങളാണ്​ കഴിയുന്നത്. കുളനട ഞെട്ടൂർ അംഗൻവാടി, കുളനട പഞ്ചായത്ത് ഹയർ സെക്കൻഡറി സ്കൂൾ എന്നീ ക്യാമ്പുകളിൽ 43 കുടുംബങ്ങളുണ്ട്​. തുമ്പമൺ ഗവ. യു.പി സ്കൂൾ, മുട്ടം ഗവ. എൽ.പി.എസ്, വൈ.എം.സി.എ, മുട്ടം കോളനിയിലുള്ള അംഗൻവാടി എന്നീ ക്യാമ്പുകളിൽ 40 കുടുംബങ്ങളെ മാറ്റിപാർപ്പിച്ചു. കടയ്ക്കാട് കരിമ്പ് വിത്തുൽപാദന കേന്ദ്രത്തിൽ വെള്ളംകയറിയതിനെ തുടർന്ന്​ 26 പശുക്കളെയും 25 ആടുകളെയും എൻ.എസ്.എസ് കോളജ് ഗ്രൗണ്ടിലേക്ക് മാറ്റി. വാഹനങ്ങളും അവിടെനിന്ന് മാറ്റി ഒരുമാസത്തിനിടെ രണ്ടാംതവണയാണ് വെള്ളം കയറുന്നത്. കഴിഞ്ഞ വെള്ളപ്പൊക്കത്തിൽ 60 ലക്ഷം രൂപയുടെ നഷ്​ടമാണ് ഉണ്ടായത്. ദുരിതാശ്വാസ പ്രവർത്തനങ്ങൾക്ക് ഡെപ്യൂട്ടി സ്പീക്കർ ചിറ്റയം ഗോപകുമാർ പന്തളം സി.ഐ എ. ശ്രീകുമാർ, നഗരസഭ ചെയർപേഴ്സൻ സുശീല സന്തോഷ്, കൗൺസിലർമാർ, ഫയർഫോഴ്സ്, റവന്യൂ ഉദ്യോഗസ്ഥർ എന്നിവർ നേതൃത്വം നൽകി. ഫോട്ടോ .. പന്തളം കടക്കാട്​ വടക്ക് വളവിൽ സരോജിനിയമ്മയുടെ വീടി​ൻെറ ഭിത്തിയിടിഞ്ഞു താഴ്​ന്നപ്പോൾ