കണികാണാൻ വെള്ളരിയും മത്തനും തമിഴ്നാട്ടിൽനിന്ന്​ എത്തി

പന്തളം: വിഷുവിന് കണികാണാനുള്ള വെള്ളരിയും മത്തനുമടക്കമുള്ള പച്ചക്കറികൾ തമിഴ്നാട്ടിലെ പാവൂർഛത്രം മാർക്കറ്റിൽനിന്ന് പന്തളം മാർക്കറ്റിലെത്തി . ഓണത്തിനുശേഷം പച്ചക്കറികൾ കൂടുതലായി കേരളത്തിലേക്ക് എത്തുന്ന വിശേഷദിവസം കൂടിയാണ് വിഷു. ഇക്കുറി വിഷുവും ദുഃഖവെള്ളിയും ഒന്നിച്ചുവന്നതിനാൽ പച്ചക്കറിക്ക് ആവശ്യക്കാർ കൂടുതലായിരുന്നുവെന്ന്​ വ്യാപാരികൾ പറഞ്ഞു. ഇക്കുറി പച്ചക്കറികൾക്ക് തമിഴ്നാട് മാർക്കറ്റിൽ വില നന്നേകുറവാണ്. തെങ്കാശി ജില്ലയിലെ പാവൂർഛത്രം മാർക്കറ്റിന് പുറമെ ശുരണ്ടേൽ, ആലംകുളം എന്നിവിടങ്ങളിൽനിന്നും കേരളത്തിലേക്ക് പച്ചക്കറികൾ എത്തുന്നുണ്ട്. കൊല്ലം, തിരുവനന്തപുരം, പത്തനംതിട്ട, ആലപ്പുഴ, കോട്ടയം ജില്ലകളിലേക്കുള്ള പച്ചക്കറികൾ അധികമായും എത്തുന്നത് ആര്യങ്കാവ് അതിർത്തിവഴിയാണ്.