പത്തനംതിട്ട: പതിറ്റാണ്ടുകൾ മുമ്പേ കൈവശത്തിലുള്ള ഭൂമിക്കു പട്ടയം തേടിയുള്ള മലയോര ജനതയുടെ കാത്തിരിപ്പ് അനന്തമായി തുടരുന്നതിനിടെ നടപടിക്രമങ്ങളിൽ ഉദ്യോഗസ്ഥർ വരുത്തുന്ന വീഴ്ചകൾ നൂലാമാലയായി മാറുന്നു. മൂന്നും നാലും തലമുറകളുടെ വരെ കൈവശത്തിലിരുന്ന ഭൂമിക്ക് വനം, റവന്യൂ വകുപ്പുകളുടെ തർക്കത്തിൽ കുടുങ്ങി പലയിടത്തും പട്ടയം വൈകിപ്പിക്കുകയാണ്. ജില്ലയിൽ 6,362 കുടുംബങ്ങൾക്ക് പട്ടയം നൽകുന്നതിനുള്ള അപേക്ഷ കേന്ദ്രാനുമതിക്ക് സമർപ്പിച്ചിട്ടു മൂന്നുവർഷമായി. റാന്നി, കോന്നി, മല്ലപ്പള്ളി താലൂക്ക് പരിധിയിൽപെട്ട സ്ഥലങ്ങളാണ് ഇവ. 1977 ജനുവരി ഒന്നിനു മുമ്പായി കൈവശ ഭൂമിയിൽ താമസമാക്കിയവരാണെങ്കിലും സ്വന്തം ഭൂമിക്ക് പട്ടയം ലഭിക്കാൻ ഇവർ കാത്തിരിക്കുകയാണ്. നിയമത്തിന്റെ നൂലാമാലകളിൽ കുടുങ്ങിയതോടെ കാത്തിരിപ്പിനു നീളം ഏറുന്നു.
കഴിഞ്ഞ എൽ.ഡി.എഫ് സർക്കാരിന്‍റെ കാലത്താണ് ആറായിരത്തിലധികം പട്ടയങ്ങൾക്ക് കേന്ദ്രാനുമതി തേടി അപേക്ഷ നൽകിയത്. നടപടിക്രമങ്ങൾ പൂർത്തീകരിച്ചത് ഇപ്പോഴത്തെ റവന്യൂ മന്ത്രി കെ. രാജൻ ചുമതലയേറ്റശേഷമാണ്. അപേക്ഷ നൽകിയതിനു പിന്നാലെ സംസ്ഥാന റവന്യൂ വകുപ്പ് കേന്ദ്ര വനം-പരിസ്ഥിതി മന്ത്രാലയവുമായി നിരന്തരം ബന്ധപ്പെട്ടു. അപേക്ഷകളിലെ പോരായ്മകൾ ചൂണ്ടിക്കാട്ടി രണ്ടുതവണ ഇതു മടക്കിയിരുന്നു. വിശദീകരണക്കുറിപ്പുമായി തിരികെ നൽകിയതിനു പിന്നാലെ കേന്ദ്രസംഘം സ്ഥല പരിശോധന നടത്തി റിപ്പോർട്ട് നൽകി. ഇത്തരം നടപടിക്രമങ്ങളെല്ലാം പൂർത്തിയായിട്ട് ഒന്നര വർഷം കഴിഞ്ഞുവെങ്കിലും പട്ടയം നൽകാൻ പച്ചക്കൊടി ലഭിച്ചിട്ടില്ല. കേന്ദ്രത്തിൽ പുതിയ മന്ത്രിസഭ അധികാരമേറ്റതിനു പിന്നാലെ മന്ത്രാലയത്തിൽ പുതിയ മന്ത്രിമാരും ഉദ്യോഗസ്ഥരും എത്തിയതും തടസ്സമായതായി പറയുന്നു.
ജില്ലയുടെ ഇതര പ്രദേശങ്ങളിലെ പട്ടയപ്രശ്നങ്ങളുമായി സാമ്യമില്ലാത്തതാണ് പെരുമ്പെട്ടിയിലെ വിഷയമെങ്കിലും ഇതൂകൂടി പൊതുഅപേക്ഷയുടെ ഭാഗമാക്കി നൽകിയത് അനുമതിക്കു തടസ്സമായതായി പറയുന്നു. വനമാണെന്ന തെറ്റിദ്ധാരണയിൽ കൈയേറ്റ വനഭൂമിയുടെ പട്ടികയിൽ പെരുമ്പെട്ടിയിലെ കർഷകരുടെ ഭൂമി ഉൾപ്പെടുത്തിയതാണ് ഇവിടത്തെ 512 കർഷകരുടെ പട്ടയം തടസ്സപ്പെടാൻ ഇടയാക്കിയത്. 1958ലെ വനവിജ്ഞാപനമനുസരിച്ച് വനപരിധിക്ക് പുറത്തുള്ള സ്ഥലം കൈയേറ്റ വനഭൂമിയുടെ പട്ടികയിൽപ്പെടുത്തി ക്രമവത്കരിക്കാൻ നടത്തുന്ന സമാനതകൾ ഇല്ലാത്ത പിശകാണ് പെരുമ്പെട്ടി പട്ടയവിഷയത്തിൽ സംഭവിച്ചത്.
കൊല്ലമുള, പെരുനാട്, വടശേരിക്കര, അത്തിക്കയം വില്ലേജുകളിലെ 1977 മുമ്പുള്ള കൈയേറ്റം ക്രമപ്പെടുത്തുന്നതുപോലെ പെരുമ്പെട്ടി വിഷയം പരിഹരിക്കാൻ കഴിയില്ല. സർക്കാറിന്റെ നിർദേശപ്രകാരം 2019ൽ നടന്ന സംയുക്തസർവേയിലും പെരുമ്പെട്ടിയിലെ കർഷകരുടെ ഭൂമി വലിയകാവ് വനപരിധിക്കു പുറത്താണെന്ന് വ്യക്തമായി. ഏറ്റവുമൊടുവിൽ ഡിജിറ്റൽ സർവേയിലും വനഭൂമി വ്യക്തമാണ്.
എന്നാൽ, വനമല്ലാത്ത 104.15 ഹെക്ടർ ഭൂമിയെ വനമെന്ന തെറ്റിദ്ധാരണയുടെ പേരിൽ കേന്ദ്ര സർക്കാറിനുള്ള അപേക്ഷയിൽ ചേർക്കുകയാണുണ്ടായത്. ഇതിലൂടെ കേന്ദ്രവനസംരക്ഷണ നിയമത്തിന്റെ ഗുരുതരമായ ലംഘനമുണ്ടായെന്നും പട്ടികയിൽ ചേർത്ത അത്രയും തന്നെ അളവ് യഥാർഥ വനം നഷ്ടപ്പെടുന്നതിന് ഇടവരുത്തുമെന്നും മനസ്സിലാക്കിയ ഉദ്യോഗസ്ഥർ തങ്ങൾ വരുത്തിയ പിശക് കേന്ദ്ര, സംസ്ഥാന സർക്കാറുകളുടെ മുമ്പിൽനിന്ന് മറച്ചുവക്കുന്നതിനുള്ള ശ്രമമാണ് പിന്നീടുണ്ടായത്.
പത്തനംതിട്ട ജില്ലയിലെ 6362 പട്ടയങ്ങൾക്കുള്ള അപേക്ഷ അംഗീകരിച്ചെടുക്കാൻ കഴിയാത്തത് ആ അപേക്ഷക്കുള്ളിൽ വനത്തിൽ ഉൾപ്പെടാത്ത പെരുമ്പെട്ടിയിലെ ഭൂമികൂടി ചേർത്തതിനാലാണ്.
വലിയകാവ് റിസർവിന്റെ കാര്യത്തിൽ സുപ്രീംകോടതിയുടെ തൽസ്ഥിതി തുടരാനുള്ള ഉത്തരവ് നിലവിലുണ്ട്.
പെരുമ്പെട്ടിയിലെ കർഷകരുടെ ഭൂമി വലിയകാവ് വനത്തിൽ ഉൾപ്പെട്ടതാണെന്ന് തെറ്റായി പറഞ്ഞതിലൂടെ സുപ്രീംകോടതിയുടെ ഉത്തരവ്. ജില്ലയിലെ മുഴുവൻ കർഷകരെയും ബാധിക്കുന്ന അവസ്ഥയിൽ എത്തിക്കുകയായിരുന്നു ഉദ്യോഗസ്ഥർ.
പെരുമ്പെട്ടിയിൽ 2019ൽ നടന്ന സർവേയുടെ റിപ്പോർട്ട് കർഷകരുടെ ഭൂമി വനപരിധിക്ക് പുറത്താണെന്ന് വ്യക്തമായി പറയുന്നുണ്ട്.
കേന്ദ്രത്തിനയച്ച പട്ടികയിൽനിന്ന് പെരുമ്പെട്ടിയിലെ 414 കർഷകരുടെ പേര് നീക്കം ചെയ്തു. ഇവിടുത്തെ കർഷകർക്ക് 1964ലെ ഭൂമിപതിവ് നിയമപ്രകാരവും ജില്ലയിലെ മറ്റു കർഷകർക്ക് കേന്ദ്രാനുമതിയോടെയും പട്ടയം നൽകുകയാണ് ഈ പ്രശ്നത്തിനുള്ള പരിഹാരം.
സർ സി.പിയുടെ കാലത്ത് ഭക്ഷ്യക്ഷാമം നേരിട്ടപ്പോൾ ഭക്ഷ്യോൽപാദനത്തിനായി വിട്ടുകൊടുത്ത വനഭൂമിയാണ് അത്തിക്കയം വില്ലേജിലുള്ളത്. 1948-50 കാലയളവിലാണ് ഭൂമി കർഷകർക്കായി നൽകിയത്. 1965ൽ വനപാലകർ ഷെഡുകളും കൃഷിയും നശിപ്പിച്ചിരുന്നു. തുടർന്ന് കൈവശക്കാർ തിരുകൊച്ചി മന്ത്രിസഭയെ സമീപിച്ചു. അന്നത്തെ വനംമന്ത്രി സ്ഥലം സന്ദർശിക്കുകയും തുടർന്ന് കൈവശഭൂമിയിൽ കടക്കുന്നതു വിലക്കി ഉത്തരവു നൽകുകയും ചെയ്തു.
വനാതിർത്തി പങ്കിടാത്ത സ്ഥലങ്ങളാണിവ. പതിറ്റാണ്ടുകളായി തങ്ങളുടെ കൈവശത്തിലുള്ള ഭൂമിയാണെങ്കിലും തലമുറകൾ കഴിഞ്ഞപ്പോഴും പട്ടയം നൽകിയിട്ടില്ല. കൈവശഭൂമിക്ക് പട്ടയം നൽകുന്നതിനായി വനം, റവന്യു സംയുക്ത പരിശോധന നടത്തി പട്ടിക തയാറാക്കിയതാണ്. ഇതുമായി ബന്ധപ്പെട്ട് അത്തിക്കയം വില്ലേജ് ഓഫിസർ 1993 ജൂൺ 21ന് താലൂക്ക് ഓഫിസിലേക്കു റിപ്പോർട്ട് നൽകുകയും ചെയ്തതാണ്.
കൈവശ ഭൂമിക്ക് പട്ടയം നൽകണമെന്ന് 2016ൽ മനുഷ്യാവകാശ കമ്മീഷനും ഉത്തരവിട്ടിരുന്നു. ഇതേത്തുടർന്ന് പ്രത്യേക സർവേ സംഘത്തെ നിയോഗിച്ച് സർവേ നടത്തിയിരുന്നു. 214 കൈവശക്കാരാണ് പട്ടയത്തിന് യോഗ്യരെന്ന് കണ്ടെത്തിയത്. 63 ഏക്കർ സ്ഥലമാണ് ഇവരുടെ ക‌ൈവശമുള്ളത്. നടപടിക്രമങ്ങൾ പൂർത്തീകരിച്ചിട്ടും പട്ടയം നൽകാത്തതുമായി ബന്ധപ്പെട്ട് കൈവശ കർഷകരിൽ പലരും ഹൈക്കോടതിയെ സമീപിച്ചിരുന്നു. ഇതിൽ കോടതി റവന്യൂ വകുപ്പിനോടു വിശദീകരണം തേടി. ഇതുമായി ബന്ധപ്പെട്ട് കഴിഞ്ഞ ഒക്ടോബർ ഒന്നിനും അഞ്ചിനുമായി അന്നത്തെ റാന്നി തഹസിൽദാർ നൽകിയ റിപ്പോർട്ടാണ് ഇപ്പോൾ വിവാദമായത്.
പെരുന്പെട്ടി വില്ലേജിലെ ഡിജിറ്റൽ സർവേ പൂർത്തീകരിക്കുന്നതിലൂടെ പട്ടയം ലഭിക്കുന്ന കാര്യത്തിൽ തീരുമാനമാകുമെന്നാണ് പ്രതീക്ഷ. ഡിജിറ്റൽ റീസർവേയിൽ 704 കൈവശങ്ങളാണ് വനത്തിൽ ഉൾപ്പെടാത്തതായി കണ്ടെത്തിയത്. റവന്യൂ സംഘം ആറ് സംഘങ്ങളായി കൈവശഭൂമിയിൽ പരിശോധന നടത്തി. ഇനി ഇക്കാര്യത്തിൽ ഉന്നതതലയോഗം ചേർന്ന് തീരുമാനമെടുക്കണം. സ്വന്തം നിലയിൽ പെരുമ്പെട്ടിക്കാർക്ക് പട്ടയം നൽകാൻ റവന്യൂ വകുപ്പ് തീരുമാനിച്ചാൽ നിലവിലെ പട്ടയപ്രശ്നത്തിൽ ഒരുപരിധിവരെ പരിഹാരമായേക്കും.
അത്തിക്കയം വില്ലേജിലെ തെക്കേത്തൊട്ടി പ്രദേശത്ത് പട്ടയത്തിനായി കാത്തിരിക്കുന്നവരുടെ ഭൂമിയെ സംബന്ധിച്ച് റവന്യൂ വകുപ്പു ഉദ്യോഗസ്ഥൻ നൽകിയ റിപ്പോർട്ട് വിവാദമായി. മലയോര കൈവശകർഷകരുടെ ഭൂമി വനത്തിന് അതിരിടുന്നതാണെന്നു ചൂണ്ടിക്കാട്ടി റാന്നി തഹസിൽദാറാണ് ഹൈകോടതിയിൽ റിപ്പോർട്ട് നൽകിയത്. യാഥാർഥ്യങ്ങളും നേരത്തെയുള്ള റിപ്പോർട്ടുകളും മറച്ചുവച്ചാണ് തഹസിൽദാരുടെ റിപ്പോർട്ടെന്ന് പ്രദേശവാസികൾ ചൂണ്ടിക്കാട്ടി. വനഭൂമി പങ്കിടുന്ന സ്ഥലമാണ് തർക്കത്തിലുള്ളതെന്നാണ് തഹസിൽദാരുടെ റിപ്പോർട്ട്. നേരത്തെ നൽകിയ റിപ്പോർട്ടുകൾ തെറ്റാണെന്നും ഇതിൽ പറയുന്നു. സംയുക്ത പരിശോധന നടത്തിയ കൈവശഭൂമിയല്ലെന്നതാണ് ഇതിലെ മറ്റൊരു പരാമർശം. ഇതിന്‍റെ അടിസ്ഥാനത്തിൽ സംയുക്ത പരിശോധന നടത്തി തുടർനടപടി സ്വീകരിക്കാനാണ് കോടതിയുടെ ഉത്തരവ്. സംയുക്ത പരിശോധന റിപ്പോർട്ട് റാന്നി താലൂക്ക് ഓഫിസിലും ബന്ധപ്പെട്ട ഭൂമി പതിവ് ഓഫിസുകളിലുമുണ്ടെന്ന് 1993ൽ വില്ലേജ് ഓഫിസിൽ നിന്ന് നൽകിയ റിപ്പോർട്ടിൽ വ്യക്തവുമാണ്. യാഥാർഥ്യങ്ങൾ മറച്ചുവച്ച് നൽകിയ റിപ്പോർട്ട് പട്ടയം പ്രതീക്ഷിച്ചിരുന്ന തെക്കേത്തൊട്ടിക്കാർക്ക് മറ്റൊരു പുലിവാലായി.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.