കിളിമാനൂർ: ഹൈസ്കൂൾ അധ്യാപകൻ സ്കൂൾ പ്രിൻസിപ്പലിനെ സ്കൂളിൽവെച്ച് കൈയേറ്റം ചെയ്തതായി പരാതി. മടവൂർ എൻ.എസ്.എസ് ഹയർസെക്കൻഡറി സ്കൂൾ പ്രിൻസിപ്പൽ ജി. അനിൽകുമാറാണ് ഇതു സംബന്ധിച്ച് പള്ളിക്കൽ പൊലീസിൽ പരാതി നൽകിയത്. സ്കൂളിലെ ഹൈസ്കൂൾ വിഭാഗം ഇംഗ്ലീഷ് അധ്യാപകൻ ജി. ജയകൃഷ്ണനാണ് അനിൽകുമാറിനെ ക്ലാസിൽവെച്ച് കൈയേറ്റം ചെയ്തത്.
സ്കൂളിലെ വാർഷികാഘോഷങ്ങളുടെ പേരിലാണ് പ്രിൻസിപ്പലിനെ കൈയേറ്റം ചെയ്യാൻ അധ്യാപക സംഘടനയായ എൻ.ടി.യുവിന്റെ നേതാവുമായ ജി. ജയകൃഷ്ണൻ മുതിർന്നത്. സ്കൂൾ വാർഷികാഘോഷങ്ങളുടെ ഇടയിൽ ഹയർസെക്കൻഡറി വിഭാഗം വിദ്യാർഥികൾക്ക് മാത്രം കാഷ് പ്രൈസ് നൽകിയെന്നാരോപിച്ച് യാതൊരു പ്രകോപനവുമില്ലാതെ ക്ലാസ് മുറിയിൽവെച്ച് ജി. അനിൽകുമാറിനെ കോളറിൽ കുത്തിപ്പിടിച്ച് ജയകൃഷ്ണൻ കൈയേറ്റം ചെയ്യുകയായിരുന്നെന്നാണ് പരാതി.
മറ്റ് അധ്യാപകരെത്തിയാണ് പിടിച്ചുമാറ്റിയത്. അതിക്രമത്തിനിരയായ ജി. അനിൽകുമാർ കെ.എസ്.ടി.എ ജില്ല കൗൺസിൽ അംഗമാണ്. പ്രിൻസിപ്പലിനെ ആക്രമിച്ച അധ്യാപകനെതിരെ മാനേജർ കാരണം കാണിക്കൽ നോട്ടീസ് നൽകിയിട്ടുണ്ട്. ഇദ്ദേഹത്തിനെതിരെ അച്ചടക്കനടപടി സ്വീകരിക്കണമെന്നും കേസെടുക്കണമെന്നും കെ.എസ്.ടി.എ സബ് ജില്ല കമ്മിറ്റി ആവശ്യപ്പെട്ടു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.