കോലഞ്ചേരി (കൊച്ചി): യാക്കോബായ സുറിയാനി സഭയുടെ പ്രാദേശിക തലവന്‍ ശ്രേഷ്ഠ ബസേലിയോസ് തോമസ് പ്രഥമന്‍ കാതോലിക്ക ബാവ (95) അന്തരിച്ചു. വാര്‍ധക്യസഹജമായ അസുഖങ്ങളെത്തുടര്‍ന്ന് ദീർഘകാലമായി എറണാകുളത്തെ സ്വകാര്യ ആശുപത്രിയില്‍ ചികിത്സയിലിരിക്കെ വ്യാഴാഴ്ച വൈകീട്ട് 5.21നാണ് അന്ത്യം. സംസ്‌കാരം ശനിയാഴ്ച ഉച്ചകഴിഞ്ഞ് മൂന്നിന് പുത്തൻകുരിശ് പാത്രിയർക്ക സെന്‍ററിലെ മാർ അത്തനേഷ്യസ് കത്തീഡ്രലിൽ.
2002 ജൂലൈ 26 മുതല്‍ യാക്കോബായ സഭയുടെ പ്രാദേശിക തലവനായി പ്രവര്‍ത്തിച്ചുവരുകയായിരുന്നു. പുത്തന്‍കുരിശിനടുത്ത വടയമ്പാടി ചെറുവിള്ളില്‍ മത്തായി-കുഞ്ഞമ്മ ദമ്പതികളുടെ എട്ടുമക്കളില്‍ ആറാമനായി 1929 ജൂലൈ 22നാണ് ജനനം. നാലാം ക്ലാസ് വരെ മാത്രമായിരുന്നു പ്രാഥമിക വിദ്യാഭ്യാസം. എന്നാല്‍, കഠിനാധ്വാനവും നിശ്ചയ ദാർഢ്യവും കൈമുതലാക്കി ഇദ്ദേഹം വിജയവഴി തെളിക്കുകയായിരുന്നു. മലങ്കരയിലെ കാതോലിക്ക ബാവയായിരുന്ന പൗലോസ് മാര്‍ പീലക്‌സിനോസ് മെത്രാപ്പോലീത്തയില്‍നിന്ന് 1952ല്‍ കോറൂയോ പട്ടം നേടി. 1958ല്‍ മഞ്ഞനിക്കര ദയറയില്‍നിന്ന് വൈദികപട്ടവും സ്വീകരിച്ചു. പുത്തന്‍കുരിശ്, കിഴ്മുറി, വെള്ളത്തൂവല്‍, വലമ്പൂര്‍, തൃശൂര്‍, ഫോര്‍ട്ട് കൊച്ചി, കല്‍ക്കട്ട ഇടവകകളില്‍ വൈദികനായി.
കോലഞ്ചേരി മെഡിക്കല്‍ മിഷന്‍ ആശുപത്രിയുടെ സ്ഥാപനകാലം മുതല്‍ 1974 വരെ ഓര്‍ഗനൈസിങ് സെക്രട്ടറിയായും ചാപ്ലിനായും പ്രവര്‍ത്തിച്ചു. ഇക്കാലയളവില്‍ മലങ്കരസഭയില്‍ പാത്രിയാർക്കീസ് - ഓർത്തഡോക്സ് വിഭാഗങ്ങൾ തമ്മിൽ ഭിന്നത രൂക്ഷമായി. തുടര്‍ന്ന്, 1973 ഒക്ടോബര്‍ 11ന് കോതമംഗലം വലിയ പള്ളിയില്‍ ചേർന്ന യാക്കോബായവിഭാഗം പള്ളി പ്രതിപുരുഷയോഗം അങ്കമാലി ഭദ്രാസന മെത്രാപ്പോലീത്തയായി തെരഞ്ഞെടുത്തു. 1974 ഫെബ്രുവരി 24ന് ദമസ്‌കസില്‍െവച്ച് തോമസ് മാര്‍ ദിവന്നാസിയോസ് എന്ന പേരില്‍ അങ്കമാലി ഭദ്രാസന മെത്രാപ്പോലീത്തയായി വാഴിച്ചു. 1999 ഫെബ്രുവരി 22ന് യാക്കോബായ സഭയുടെ എപ്പിസ്‌കോപ്പല്‍ സുന്നഹദോസ് പ്രസിഡന്‍റായ അദ്ദേഹത്തെ 2000 ഡിസംബര്‍ 22ന് പള്ളി പ്രതിപുരുഷ യോഗം ചേര്‍ന്ന് കാതോലിക്ക ബാവയായി തെരഞ്ഞെടുത്തു.
2002 ജൂലൈ ആറിന് പുത്തന്‍കുരിശില്‍ ചേര്‍ന്ന യാക്കോബായ സുറിയാനി അസോസിയേഷനാണ് മലങ്കര മെത്രാപ്പോലീത്തയായി നിശ്ചയിച്ചത്. 2002 ജൂലൈ 26ന് ദമാസ്‌കസില്‍ െവച്ച് ബസേലിയോസ് തോമസ് പ്രഥമന്‍ എന്ന പേരില്‍ യാക്കോബായ സഭയുടെ പ്രാദേശിക തലവനായി വാഴിച്ചു. തുടര്‍ന്ന് സഭക്ക് അഭൂതപൂർവമായ വളർച്ചയാണുണ്ടായത്. രാജ്യത്തിനകത്തും പുറത്തും നിരവധി ഭദ്രാസനങ്ങളുണ്ടാക്കി 28 മെത്രാപ്പോലീത്തമാരെയും വാഴിച്ചു. ഇഗ്നാത്തിയോസ് അപ്രേം രണ്ടാമൻ പാത്രിയാർക്കീസ് ബാവയുടെ സ്ഥാനാരോഹണത്തിന് കാർമികത്വം വഹിച്ചതും അദ്ദേഹമായിരുന്നു. സഭാതര്‍ക്കം രൂക്ഷമായ വേളയിലെല്ലാം സഭയെ മുന്നില്‍നിന്ന് നയിച്ച് പലവട്ടം പൊലീസ് മർദനങ്ങളും ഏറ്റുവാങ്ങി. 2017 ജൂലൈ മൂന്നിലെ സുപ്രീംകോടതി വിധി സഭക്ക് ഏൽപിച്ച പ്രതിസന്ധി മറികടക്കാനാകാതെയാണ് വിയോഗം. സഹോദരങ്ങൾ: പരേതരായ മറിയാമ്മ, ഏലമ്മ, അന്നമ്മ, വർഗീസ്, കുരുവിള, എബ്രഹാം, പൗലോസ്.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.