എല്ലാവരും ഒലിച്ചുപോയി, ഇനി കുടുംബത്തിൽ ജിഷ്ണുവും ജിബിനും മാത്രം

ദമ്മാം: ഒന്ന്​ ഇരുട്ടി വെളുത്തപ്പോൾ ജിഷ്​ണുവും കുഞ്ഞനുജൻ ജിബിനും കുടുംബത്തിൽ തനിച്ചായി. അച്​ഛനും അമ്മയും മുത്തശ്ശിയും മൂന്ന്​ കൂടപ്പിറപ്പുകളും സഹോദര ഭാര്യയും ഉൾപ്പടെ ഏഴുപേരെയാണ്​ ഉരുൾപൊട്ടി കുത്തിയൊലിച്ചുവന്ന ദുരന്തം കൊണ്ടുപോയത്​. ഏഴ് മാസം മുമ്പ് ജിഷ്​ണു സൗദി അറേബ്യയിലേക്ക്​ പുതിയ സ്വപ്​നങ്ങളുമായി വിമാനം കയറു​േമ്പാൾ യാത്രയാക്കിയവരാണ്​ ഇവർ. ചൊവ്വാഴ്ച രാത്രിയിൽ ദമ്മാമിൽനിന്നുള്ള ഇൻഡിഗോ വിമാനത്തിൽ കരിപ്പൂർ വിമാനത്താവളത്തിൽ ചെന്നിറങ്ങുമ്പോൾ ത​െൻറ വീട്ടുകാർക്ക്​ ഒന്നും സംഭവിച്ചിരിക്കില്ലെന്നും അവരെല്ലാം തന്നെ കാത്തിരിക്കുകയാണെന്നുമുള്ള പ്രതീക്ഷ വെടിഞ്ഞിരുന്നില്ല ജിഷ്ണു.

ഒടുവിൽ മരിച്ചവരെ നിരത്തിക്കിടത്തിയ ഇടങ്ങളിൽ നിന്ന് അച്​ഛ​ൻ രാജ​െൻറയും അമ്മ മരുതായിയുടേയും അനുജ​ൻ ഷിജുവി​െൻറയും സഹോദര ഭാര്യ പ്രിയങ്കയുടെയും മൃതദേഹങ്ങൾ തിരിച്ചറിയു​േമ്പാഴേക്കും മനസ്​ മരവിച്ച അവസ്ഥയിലായി ജിഷ്ണു. ഇനി മുത്തശ്ശി നാഗമ്മയുടെയും മൂത്ത സഹോദര​ൻ ജിനുവിന്‍റെയും ഇളയ പെങ്ങൾ ആൻഡ്രിയയുടേയും വിവരങ്ങളാണ്​ അറിയാനുള്ളത്​​. അവർ എവിടെയാ​െണന്ന്​ ഒരു വിവരവുമില്ല. ആകെ ബാക്കിയായത്​​ ഏറ്റവും ഇളയ അനുജൻ ജിബിനാണ്. നാട്ടിലെ സ്വകാര്യ റിസോർട്ടിൽ ജോലിയുള്ള അവൻ സംഭവദിവസം വീട്ടിലുണ്ടായിരുന്നില്ല. അതുകൊണ്ടാണ്​ രക്ഷപ്പെട്ടത്​.

മുണ്ടക്കൈയിലെ പുഞ്ചിരിവട്ടത്തായിരുന്നു ജിഷ്​ണുവി​െൻറ വീട്​. ആ വീട്​ അപ്പാടെ ഒലിച്ചുപോയി. അവിടം സുരക്ഷിതമല്ലെന്ന്​ ജില്ലാ റവന്യു അധികൃതർ മുന്നറിയിപ്പ്​ നൽകിയിരുന്നതിനാൽ തിങ്കളാഴ്​ച വൈകീട്ട്​ കുറച്ചുകൂടി സുരക്ഷിതമെന്ന്​ കരുതിയ അമ്മയുടെ സഹോദരി വിജിയുടെ വീട്ടിലേക്ക് എല്ലാരും മാറിയിരുന്നു. എന്നാൽ ​ചെറിയ അരുവി പെരിയ കടലായി പലവഴി പിരി​ഞ്ഞ്​ പാഞ്ഞെത്തിയപ്പോൾ ആ വീടും തകർന്നു അതിലുള്ളവരടക്കം ഒലിച്ചുപോവുകയായിരുന്നു. 

26കാരനായ ജിഷ്ണു സൗദി കിഴക്കൻ പ്രവിശ്യയിലെ അൽ അഹ്​സയിൽ ജോലിക്കെത്തിയിട്ട് ആറു മാസമേ ആയിട്ടുള്ളൂ. വയനാട്ടിൽ കനത്ത മഴയുണ്ടെന്നും സൂക്ഷിക്കണമെന്നുമുള്ള മുന്നറിയിപ്പും വാർത്തയുമൊക്കെ വന്നതോടെ ജോലി സ്ഥലത്തും താമസസ്ഥലത്തുമൊക്കെ കടുത്ത അസ്വസ്ഥതയിലായിരുന്നു ജിഷ്​ണു. രണ്ടുവർഷം മുമ്പുണ്ടായ ഉരുൾപൊട്ടലിൽ ഭാഗ്യം കൊണ്ട് രക്ഷപ്പെട്ട മുൻ അനുഭവമുണ്ട്​ ജിഷ്ണുവിന്. അന്ന് വീടി​െൻറ ഒരു ഭാഗം പൂർണമായും തകർന്നിരുന്നു. എങ്കിലും ജിഷ്ണുവും കുടുംബവും വലിയ പരിക്കേൽക്കാതെ രക്ഷപ്പെട്ടിരുന്നു.

ഉരുൾപൊട്ടലുണ്ടായി എന്നറിഞ്ഞത്​ മുതൽ നിരന്തരം ഫോണിൽ വിളിച്ചിട്ടും ആരെയും കിട്ടാതെ ത​െൻറ വീട്ടുകാർക്ക്​ എന്ത്​ സംഭവിച്ചു എന്ന ആശങ്കയിൽ ഉള്ളുപിടഞ്ഞ്​ നാട്ടിലേക്ക്​ തിരിച്ച വിഷ്​ണുവിനെ കുറിച്ച്​ കഴിഞ്ഞ ദിവസം ‘ഗൾഫ്​ മാധ്യമം’ റിപ്പോർട്ട്​ ചെയ്​തിരുന്നു. കെട്ടിടനിർമാണ തൊഴിലാളിയായിരുന്ന പിതാവ് ശാരീരിക അവശതകളെ തുടർന്ന് പണിക്കൊന്നും പോകുന്നില്ലായിരുന്നു. മാതാവ് അർബുദം ബാധിച്ച് തുടർചികിത്സയിലായിരുന്നു. മൂന്ന് മാസം മുമ്പാണ്​ മൂത്ത സഹോദരൻ ജിനുവിന്‍റെയും പ്രിയങ്കയുടേയും വിവാഹം. ഗർഭിണിയായ പ്രിയങ്ക സ്വന്തം വീട്ടിൽ നിന്നും കഴിഞ്ഞ ദിവസമാണ് തിരിച്ചെത്തിയത്. ഇളയവരിൽ ഷിജു സീരിയൽ ഷൂട്ടിങ് കാമറാരംഗത്താണ്​ ജോലി ചെയ്​തിരുന്നത്​. പ്ലസ് വൺ വിദ്യാർഥിനിയായിരുന്നു ഏറ്റവും ഇളയവളായ ആൻഡ്രിയ.

ഇതുവരെ കണ്ടെത്താൻ കഴിയാത്തവരുടെ കാര്യത്തിൽ പ്രതീക്ഷകൾ ഏറെക്കുറെ അസ്തമിക്കുകയാണ്. മൃതദേഹങ്ങളിൽനിന്ന്​ പോലും തിരിച്ചറിയാൻ കഴിയാത്ത സ്ഥിതിയാണ്​. ശരീരഭാഗങ്ങളും തിരിച്ചറിയാനാവാത്ത മൃതദേഹങ്ങളും കൂട്ടമായി സംസ്കരിക്കേണ്ടി വരുന്ന അവസ്ഥയാണുള്ളത്. അച്​ഛനും അമ്മയും മുത്തശ്ശിയും അഞ്ച് സഹോദരങ്ങളും അടങ്ങുന്ന കുടുംബത്തിലെ രണ്ടാമനാണ് വിഷ്ണു. ലോണെടുത്തും കൈവായ്​പ വാങ്ങിയും നിർമിച്ച വീടി​െൻറ കടം തീർക്കാനാണ് ഏഴ്​ മാസം മുമ്പ് ദമ്മാമിന്​ സമീപം അൽ അഹ്​സയിലെ സ്വീറ്റ് വാട്ടർ കമ്പനിയിലേക്ക്​ ജിഷ്ണു ജോലിക്കെത്തിയത്.

ചൊവ്വാഴ്ച അതിരാവിലെ വിവരമറിഞ്ഞത്​ മുതൽ ജിഷ്ണു ആരെയെങ്കിലും ഫോണിൽ കിട്ടാനുള്ള ശ്രമത്തിലായിരുന്നു. തൊഴിലുടമയും സാമൂഹിക പ്രവർത്തകനുമായ പ്രസാദ് കരുനാഗപ്പള്ളി 'നാട്ടിൽ പോകൂ എന്ത് സഹായവും ചെയ്തുതരാ'മെന്ന് പറഞ്ഞാണ്​ ജിഷ്​ണുവിനെ നാട്ടിലേക്ക്​ പറഞ്ഞയച്ചത്​. ‘സർ ഞാനെന്തിന് ഇനി നാട്ടിലേക്ക് പോകണം’ എന്നായിരുന്നു അപ്പോൾ ജിഷ്ണുവി​െൻറ പ്രതികരണം. എല്ലാം കഴിയുമ്പോൾ ജിഷ്ണുവിനെ തിരികെ കൊണ്ടുവരണമെന്നും ഇനിയും ജീവിതം കെട്ടിപ്പടുക്കാൻ അവനോടൊപ്പം ഞങ്ങൾ എല്ലാവരുമുണ്ടാകുമെന്നും പ്രസാദ് കരുനാഗപ്പള്ളി ‘ഗൾഫ് മാധ്യമ’ത്തോട് പറഞ്ഞു.