അഞ്ചൽ: അഞ്ചൽ സെൻ്റ് ജോൺസ് കോളജിൽ എസ്.എഫ്.ഐ - എ.ഐ.എസ്.എഫ് പ്രവർത്തകർ ഏറ്റുമുട്ടി. പരിക്കേറ്റ ഇരു സംഘടനകളിലെയും അഞ്ച് വിദ്യാർഥികളെ വിവിധ ആശുപത്രികളിൽ പ്രവേശിപ്പിച്ചു.
എസ്.എഫ്.ഐ പ്രവർത്തകരായ ആഷിഖ്, അബിൻ, ഫായിസ്, ബോണി എന്നിവരെ അഞ്ചലിലെ സ്വകാര്യ ആശുപത്രിലും എ.ഐ.എസ്.എഫ് മണ്ഡലം സെക്രട്ടറി ശിവപ്രസാദ് പുനലൂരിനെ താലൂക്ക് ആശുപത്രിയിലും പ്രവേശിപ്പിച്ചു. കോളജ് യൂനിയൻ തെരഞ്ഞെടുപ്പുമായി ബന്ധപ്പെട്ട് ഇരുകൂട്ടരും തമ്മിൽ പ്രശ്നങ്ങളുണ്ടായിരുന്നു. തുടർന്ന് മിക്ക ദിവസങ്ങളിലും ചെറിയ സംഘർഷങ്ങളും പതിവായിരുന്നു.
ഏതാനും ദിവസം മുമ്പ് എ.ഐ.എസ്.എഫ് യൂനിറ്റ് പ്രസിഡൻ്റായ വിദ്യാർഥിനിയോട് എസ്.എഫ്.ഐ പ്രവർത്തകർ മോശമായി സംസാരിച്ചെന്നാരോപിച്ച് എ.ഐ.എസ്.എഫ് പ്രവർത്തകർ പ്രശ്നമുണ്ടാക്കിയിരുന്നു. തിങ്കളാഴ്ച ഉച്ചയോടെ കോളജിൽ വച്ച് എ.ഐ.എസ്.എഫ് പ്രവർത്തകനെ എസ്.എഫ്.ഐ പ്രവർത്തകർ ചേർന്ന് ഉപദ്രവിച്ചതായി കാട്ടി കോളജ് അധികൃതർക്ക് എ.ഐ.എസ്.എഫ് പരാതി നൽകി. ഇതിൽ പ്രകോപിതരായ എസ്.എഫ്.ഐ പ്രവർത്തകർ മർദ്ദിക്കുകയായിരുന്നെന്ന് എ.ഐ.എസ്.എഫ് പ്രവർത്തകർ പറഞ്ഞു.
പരിക്കേറ്റതിനെത്തുടർന്ന് അഞ്ചൽ ഗവ. ആശുപത്രിയിലെത്തിയവരെ എസ്.എഫ്.ഐ പ്രവർത്തകർ പിന്തുടർന്ന് ആശുപത്രിയിൽ കയറി മർദ്ദിച്ചതായും പരാതിയുണ്ട്. തുടർന്നാണ് എ.ഐ.എസ്.എഫ് പ്രവർത്തകരെ പുനലൂർ താലൂക്ക് ആശുപത്രിയിൽ പ്രവേശിപ്പിച്ചത്. ഇരുകൂട്ടർക്കെതിരേയും അഞ്ചൽ പൊലീസ് കേസെടുത്തു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.