തിരുവനന്തപുരം: അരിവാൾ (സിക്കിള്സെല്) രോഗികള്ക്ക് ആരോഗ്യ വകുപ്പ് പ്രത്യേക ഓണക്കിറ്റ് നല്കുമെന്ന് മന്ത്രി വീണ ജോര്ജ്. സംസ്ഥാനത്ത് ആദ്യമായാണ് ഈ രോഗികള്ക്ക് പ്രത്യേക ഓണക്കിറ്റ് ലഭ്യമാക്കുന്നത്. നിലവില് അവര്ക്ക് നല്കുന്ന ന്യൂട്രീഷന് കിറ്റ് കൂടാതെയാണ് ഓണക്കിറ്റ് നല്കുന്നത്.
സിവില്സപ്ലൈസ്, കണ്സ്യൂമര്ഫെഡ് തുടങ്ങിയ സര്ക്കാര് സ്ഥാപനങ്ങള് വഴി സാധനങ്ങള് ശേഖരിച്ചാണ് കിറ്റ് നല്കുക. ശര്ക്കര, ചായപ്പൊടി,പഞ്ചസാര, ചെറുപയര് പരിപ്പ് തുടങ്ങിയ 8 ഇനങ്ങളാണ് കിറ്റില് ഉള്പ്പെടുത്തിയിരിക്കുന്നത്. ആരോഗ്യ വകുപ്പും സിക്കള്സെല് രോഗികളുടെ കൂട്ടായ്മയും ചേര്ന്ന് വരുന്ന വെള്ളിയും ശനിയും കൊണ്ട് കിറ്റ് വിതരണം ചെയ്യുന്നതാണെന്നും മന്ത്രി വ്യക്തമാക്കി.
സിക്കിള്സെല് ചികിത്സക്ക് നൂതന സംവിധാനങ്ങളാണ് സര്ക്കാര് ഒരുക്കി വരുന്നത്. ഹീമോഫീലിയ, തലസീമിയ, സിക്കിള് സെല് രോഗികള്ക്ക് സഹായവുമായി ആശാധാര പദ്ധതി നടപ്പിലാക്കി വരുന്നു. ആശാധാരക്ക് ഓരോ പ്രധാന സര്ക്കാര് ആശുപത്രികളിലും പരിശീലനം നേടിയ ഫിസിഷ്യന്മാരുടേയും പരിശീലനം സിദ്ധിച്ച അര്പ്പണബോധമുള്ള സ്റ്റാഫ് നഴ്സുമാരുടേയും സേവനം ലഭ്യമാക്കി.
മാനന്തവാടി ആശുപത്രിയില് 10 കിടക്കകളുള്ള പ്രത്യേക വാര്ഡ് സജ്ജമാക്കി. രോഗികളെ സൗജന്യമായി ആശുപത്രിയിലേക്ക് കൊണ്ടുപോകാന് 108 ആംബുലന്സ് സേവനം ലഭ്യമാക്കിയെന്ന് മന്ത്രി പറഞ്ഞു.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.