അമ്പലത്തറ: ബൈക്കിൽ കാറിടിച്ച് വിദ്യാര്‍ഥി മരിച്ചു. അമ്പലത്തറ പുതുക്കാട് കല്ല്യാണ മണ്ഡപത്തിന് സമീപം താമസിക്കുന്ന നിസാര്‍-ജിബിത ദമ്പതികളുടെ മകന്‍ സനദ് നയീം [20] ആണ് മരണപ്പെട്ടത്. വെള്ളിയാഴ്ച്ച രാത്രി പരുത്തികുഴിയിൽ നിന്നും ഈഞ്ചക്കൽ ബൈപാസിലൂടെ ബൈക്കില്‍ സഞ്ചരിക്കുന്നതിനിടെയാണ് അപകടം. അതേദിശയില്‍ സഞ്ചരിച്ച കാര്‍ മുട്ടത്തറ ഭാഗത്ത് വച്ച് സനദ് സഞ്ചരിച്ചിരുന്ന ബൈക്കിന് പിന്നില്‍ ഇടിക്കുകയായിരുന്നു. ബൈക്കിലിടിച്ച് നിയന്ത്രണം വിട്ട കാർ ഡിവൈഡര്‍ ചാടിക്കടന്ന് മരത്തിലിടിച്ചാണ് നിന്നത്.
ഇടിയുടെ ആഘാതത്തില്‍ റോഡിലേക്ക് തെറിച്ച് വീണ സനദിനെ നാട്ടുകാര്‍ ഉടന്‍ ആശുപത്രിയില്‍ എത്തിച്ചെങ്കിലും ജീവന്‍ രക്ഷിക്കാനായില്ല. അപകടം നടന്നയുടൻ കാറിലുണ്ടായിരുന്ന യുവാക്കള്‍ ഓടി രക്ഷപെടാന്‍ ശ്രമിച്ചെങ്കിലും നാട്ടുകാര്‍ പിന്‍തുടര്‍ന്ന് പിടികൂടി പൊലീസിന് കൈമാറി. മദ്യലഹരിയിലായിരുന്ന യുവാക്കൾ അമിതവേഗതയിലായിരുന്നു വാഹനമോടിച്ചതെന്ന് ദൃക്സാക്ഷികള്‍ പറഞ്ഞു. ഫോര്‍ട്ട് പൊലീസ് കേസ് എടുത്ത് പോസ്റ്റ്മോര്‍ട്ടം നടത്തിയതിന് ശേഷം മൃതദേഹം ബന്ധുക്കള്‍ക്ക് കൈമാറി. സഹോദരങ്ങള്‍: മറിയം, നൂഹ.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.