ഗാന്ധിനഗർ (കോട്ടയം): നായുടെ കടിയേറ്റ് കോട്ടയം മെഡിക്കൽ കോളജ് ആശുപത്രിയിൽ ചികിത്സയിലുള്ള വിദ്യാർഥിനിയുടെ ആരോഗ്യനില മാറ്റമില്ലാതെ തുടരുന്നു. മരുന്നുകളോട് പ്രതികരിച്ചു തുടങ്ങിയിട്ടുണ്ടെങ്കിലും കാര്യമായ പുരോഗതിയുണ്ടായിട്ടില്ലെന്ന് ആശുപത്രി സൂപ്രണ്ട് ഡോ. കെ.പി. ജയപ്രകാശ് പറഞ്ഞു.
പുണെ വൈറോളജി ലാബിലേക്ക് അയച്ച സാമ്പിളുകളുടെ ഫലം ചൊവ്വാഴ്ച ലഭിക്കും. ഇതിനുശേഷം മെഡിക്കൽ ബോർഡ് കൂടി ചികിത്സ പുരോഗതി വിലയിരുത്തുമെന്നും അദ്ദേഹം പറഞ്ഞു.
പത്തനംതിട്ട റാന്നി കൂനംകര ഷീല ഭവനിൽ ഹരീഷ്- രജനി ദമ്പതികളുടെ മൂത്ത മകൾ അഭിരാമിയാണ് (12) ചികിത്സയിൽ കഴിയുന്നത്. കഴിഞ്ഞ 13ന് വീടിന് സമീപത്തുനിന്നാണ് നായുടെ കടിയേറ്റത്. തുടർന്ന് പത്തനംതിട്ട ജനറൽ ആശുപത്രിയിലെത്തിച്ച് മൂന്ന് ഡോസ് പ്രതിരോധ കുത്തിവെപ്പ് എടുത്തിരുന്നു. എന്നാൽ, കടിയറ്റ കണ്ണിന്‍റെ ഭാഗത്ത് അണുബാധയുണ്ടാകുകയും ഇത് തലച്ചോറിനെ ബാധിക്കുകയുമായിരുന്നു.
വെള്ളിയാഴ്ച ആരോഗ്യസ്ഥിതി മോശമായതിനെത്തുടർന്ന് കോട്ടയം മെഡിക്കൽ കോളജ് കുട്ടികളുടെ ആശുപത്രിയിൽ എത്തിക്കുകയായിരുന്നു. ശനിയാഴ്ച മുതൽ കുട്ടി വെന്‍റിലേറ്ററിലാണ്.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.