തിരുവനന്തപുരം: പതിനഞ്ചാം കേരള നിയമസഭയുടെ മൂന്നാമത് സമ്മേളനത്തിന് തുടക്കമായി. നവംബർ 12 വരെ നീളുന്ന സമ്മേളനത്തിൽ ഒാർഡിനൻസുകൾക്ക് പകരമുള്ള ബില്ലുകളാണ് പരിഗണിക്കുക. 24 ദിവസമാണ് സഭ ചേരുക. ഇതിൽ 19 ദിവസവും നിയമ നിർമാണത്തിനും നാല് ദിവസം അനൗദ്യോഗിക അംഗങ്ങൾക്കും ഒരു ദിവസം ഉപധനാഭ്യർഥനക്കുമാണ് നീക്കിെവച്ചിരിക്കുന്നത്. 45 ഒാർഡിനൻസുകളാണ് നിലവിൽ. ഒരു ദിവസം നാല് ബില്ലുകൾ വരെ എടുക്കാനാണ് ആലോചന.
തൊഴിലുറപ്പ് ക്ഷേമനിധി, പഞ്ചായത്തീരാജ്-മുനിസിപ്പാലിറ്റി ദേഭഗതികൾ, നഗര-ഗ്രാമാസൂത്രണ ഭേദഗതി എന്നീ ബില്ലുകളാണ് തിങ്കളാഴ്ച പരിഗണിക്കുക. ചൊവ്വാഴ്ച ചരക്ക് സേവന നികുതി, വിൽപന നികുതി ഭേദഗതി, ധനഉത്തരവാദ ഭേദഗതി എന്നീ ബില്ലുകൾ പരിഗണിക്കും. മറ്റ് ദിവസങ്ങളിൽ പരിഗണിക്കുന്ന ബില്ലുകൾ കാര്യോപദേശക സമിതി യോഗം തീരുമാനിക്കും.
പുരാവസ്തുവിന്‍റെ പേരിലെ തട്ടിപ്പടക്കം വിവാദങ്ങളുടെ മലവെള്ളപ്പാച്ചിലിനിടെ അതിന്‍റെ പ്രതിഫലനം സഭയിലുമുണ്ടാകും. ഉന്നത ഉദ്യോഗസ്ഥർ വരെ മോൻസണിന്റെ മ്യൂസിയത്തിൽ എത്തിയതടക്കം പൊലീസിനെതിരെ വന്ന ആക്ഷേപങ്ങൾക്ക് സർക്കാറിന് മറുപടി പറയേണ്ടി വരും. എന്നാൽ, കെ.പി.സി.സി പ്രസിഡന്‍റ് കൂടി വിവാദത്തിൽപെട്ടത് പ്രതിപക്ഷത്തിന് പരിമിതി സൃഷ്ടിക്കും.
കോവിഡ് മാനദണ്ഡങ്ങൾ പാലിച്ചാകും സമ്മേളനം നടക്കുക. പരിമിതമായി സന്ദർശകരെയും അനുവദിക്കും. കോവിഡ് മൂലമാണ് ഇത്രയും അധികം ഒാർഡിനൻസുകൾ വന്നത്. ഇത് നിയമമാക്കാൻ പ്രത്യേക സമ്മേളനം ചേരണമെന്ന് സ്പീക്കർ റൂൾ ചെയ്തിരുന്നു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.