ന്യൂഡൽഹി: ഉത്തർപ്രദേശിലെ ഗാസിയാബാദിൽ ബഹുനില കെട്ടിടത്തിന്‍റെ ഒമ്പതാം നിലയുടെ മുകളിൽനിന്ന് യുവതി താേഴക്ക് വീഴുന്ന അപകടത്തിന്‍റെ ഞെട്ടിക്കുന്ന വിഡിയോ പുറത്ത്. യുവതിയെ രക്ഷിക്കാനായി സമീപത്തുണ്ടായിരുന്നയാൾ ശ്രമിക്കുന്നുണ്ടെങ്കിലും കൈവിട്ട് താഴേക്കുവീഴുകയായിരുന്നു.
ഫ്ലാറ്റിന്‍റെ ഒമ്പതാംനിലയുടെ ബാൽക്കണിയിൽനിന്ന് യുവതിയും യുവതിക്കൊപ്പമുണ്ടായിരുന്നയാളും തമ്മിൽ വാക്കേറ്റമുണ്ടായതായി സാക്ഷികൾ പറയുന്നു. വാക്കേറ്റം കനത്തതോടെ യുവതി കെട്ടിടത്തിന് മുകളിൽനിന്ന് താഴേക്ക് ചാടാൻ ശ്രമിക്കുകയായിരുന്നു.
യുവതിയുടെ പെട്ടന്നുള്ള നീക്കത്തിൽ ഇയാൾ പകച്ചുപോയെങ്കിലും യുവതിയുടെ കൈയിൽ പിടിത്തം കിട്ടിയതോടെ രക്ഷപ്പെടുത്താൻ ശ്രമിക്കുകയായിരുന്നു. മൂന്നുമിനിറ്റോളം യുവതിയുടെ കൈയിൽപിടിച്ച് ഇയാൾ നിന്നു. സംഭവം ശ്രദ്ധയിൽപ്പെട്ട മറ്റുള്ളവർ താഴെ കിടക്കയും മറ്റും നിരത്തിയിരുന്നു. പിന്നീട് യുവതി പിടിവിട്ട് താഴേക്ക് വീഴുകയായിരുന്നു. ഗുരുതര പരിക്കേറ്റ ഇവരെ ആശുപത്രിയിൽ പ്രവേശിപ്പിച്ചിരിക്കുകയാണ്.
സംഭവത്തിൽ പൊലീസ് കേസ് രജിസ്റ്റർ ചെയ്തു. യുവതിക്കൊപ്പമുണ്ടായിരുന്നയാളെ ചോദ്യം ചെയ്യുകയും ചെയ്തു. യുവതിക്ക് ബോധം തെളിഞ്ഞാൽ മാത്രമേ കാര്യങ്ങൾ വ്യക്തമാകുവെന്ന് പൊലീസ് പറഞ്ഞു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.