'ധോണി കണ്ണുരുട്ടിയാൽ മാറ്റാനുള്ള​താണോ അമ്പയറുടെ തീരുമാനം​, ഇതെന്താ പാടത്തെ കളിയോ​?'

ദുബൈ: കായിക ഇനം ഏതായാലും റഫറിയുടെ തീരുമാനം അന്തിമമാണ്​ എന്നാണ്​ പറയാറുള്ളത്​. അത്​ ക്രിക്കറ്റായാലും ഫുട്​ബാളാലും അങ്ങനെത്തന്നെ. കായിക ഇനങ്ങളുടെ  നിലനിൽപ്പ്​ തന്നെ അമ്പയറുടെ ആധികാരികതയിലും വിശ്വാസ്യതയിലുമാണ്​. 

പ്രാദേശിക ടൂർണമെൻറുകളിലും പാടത്തെ കളികളിലുമെല്ലാം അമ്പയർമാർ കളിക്കാരെ പേടിച്ച്​ തീരുമാനം മാറ്റിയിട്ടുണ്ടാകാം. പക്ഷേ ​ഐ.പി.എല്ലിൽ അങ്ങനെ നടന്നാലോ?. ചൊവ്വാ​ഴ്​ച നടന്ന ചെന്നൈ സൂപ്പർകിങ്​സ്​-സൺറൈസേഴ്​സ്​ ഹൈദരാബാദ്​ മത്സരത്തിനിടെയുള്ള അമ്പയർ പോൾ റീഫലി​െൻറ നടപടി വിവാദങ്ങൾക്കിടയാക്കിയിരിക്കുകയാണ്​. 

എന്താണ്​ നടന്നത്​?

ചെന്നൈ ഉയർത്തിയ 168 റൺസി​െൻറ വിജയലക്ഷ്യം ഹൈദരാബാദ്​ പിന്തുടരവേ​ 19ാ ഓവറിലാണ്​ സംഭവം. രണ്ട്​ ഓവറിൽ ഹൈദരാബാദിന്​ വേണ്ടത്​ 27 റൺസ്​. ക്രീസിലുള്ളത്​ 14 റൺസെടുത്ത റാഷിദ്​ ഖാനും നാലു റ​ൺസെടുത്ത ഷഹബാസ്​ നദീമും. പന്തെറിയാനെത്തിയത്​ ഷർദുൽ താക്കൂർ.

ആദ്യ പന്തിൽ റാഷിദ്​ ഖാൻ രണ്ട്​ റൺസെടുത്തു. അടുത്ത പന്ത്​ വൈഡ്​. അടുത്ത പന്തിലും താക്കൂർ ശ്രമിച്ചത്​ ഡെത്ത്​ ഓവറുകളിലെ ബൗളർമാരുടെ വജ്രായുധമായ വൈഡ്​ ലൈൻ യോർക്കറിന്​ തന്നെ. പന്ത്​ വൈഡ്​ ​ലൈനിന്​ പുറത്തൂടെയാണ്​ പോയതെന്ന്​ വ്യക്തം.

അമ്പയർ റീഫൽ ​വീണ്ടും വൈഡ്​ സിഗ്​നലിനായി കൈവിടർത്തിത്തുടങ്ങി. എന്നാൽ വിക്കറ്റിന്​ പിന്നിൽ നിന്നും ധോണി വൈഡല്ലെന്ന്​ ദേഷ്യത്തോടെ പറഞ്ഞതോടെ അമ്പയർ സ്വന്തം കൈകളെ പതുക്കെ പൂർവ്വ സ്ഥിതിയിലാക്കി. ധോണിയുടെ ദേഷ്യം കണ്ട്​ അമ്പയർ വിരണ്ടതാണെന്ന്​ ടി.വി കാഴ്​ചയിൽ വ്യക്തം. മത്സരത്തിൽ ചെന്നൈ 20 റൺസിന്​ വിജയിച്ചിരുന്നു.

ധോണി കണ്ണുരുട്ടിയാൽ മാറ്റാനുള്ളതാണോ അമ്പയറുടെ തീരുമാനം​?

അമ്പയർ വൈഡ്​ നിഷേധിച്ചതിന്​ പിന്നാലെ 'ഇതെന്തുപരിപാടിയെന്ന തരത്തിൽ' ആംഗ്യം കാണിക്കുന്ന ഹൈദരാബാദ്​ നായകൻ ഡേവിഡ്​ വാർണറുടെ ദൃശ്യം ടി.വിയിൽ കാണാമായിരുന്നു. മത്സരത്തിന്​ പിന്നാലെ വിമർശനവുമായി പ്രമുഖ കമ​േൻററ്ററും മുൻ താരവുമായ ഇയാൻ ബിഷപ്പെത്തി.

''അമ്പയറുടേത്​ ബുദ്ധിമുട്ടുള്ള ജോലിയാണെന്ന്​ അറിയാം. പക്ഷേ അമ്പയർ റാഫേൽ തെറ്റുചെയ്​തെന്ന്​ ഞാൻ പറയുന്നു. അദ്ദേഹത്തിന്​ വൈ​ഡാണെന്ന്​ തോന്നുന്നുവെങ്കിൽ അതുതന്നെ ചെയ്യണമായിരുന്നു. അദ്ദേഹം ധോണി പറയുന്നത്​ നോക്കി തീരുമാനം മാറ്റുകയായിരുന്നു'' -ഇയാൻ ബിഷപ്പ്​ ഇ.എസ്​.പി.എൻ ക്രിക്​ഇൻഫോ ഷോയിൽ പറഞ്ഞു.

അമ്പയർക്ക്​ വേണമെങ്കിൽ മൂന്നാം അമ്പയറുടെ സഹായം തേടാമായിരുന്നു എന്ന്​ മുൻ ഇന്ത്യൻ താരം ദീപ്​തദാസ്​ ഗുപ്​ത ക്രിക്​ ഇൻഫോ ചർച്ചയിൽ പറഞ്ഞു. സമൂഹമാധ്യമങ്ങളിലും ധോണിക്കെതിരെയും അമ്പയർക്കെതിരെയും വിമർശനങ്ങളുയർന്നിട്ടുണ്ട്​. ഇന്ത്യയുടെ മുൻ സ്​പിന്നർ ഹർഭജൻ സിങ്ങ്​ സംഭവത്തി​െൻറ വിഡിയോ ഷെയർ ചെയ്​തത്​ ചിരിയുടെ ഇമോജികൾ ചേർത്തായിരുന്നു.