ഇതു സിക്​സ്​ ഫെസ്​റ്റ്​ ; ചേസിങ്​ റെക്കോഡുമായി രാജസ്​ഥാൻ; നാലു വിക്കറ്റ്​ ജയം

ഷാർജ: ബാറ്റിന്​ തീപ്പിടിച്ച രാത്രി. ഷാർജ സ്​റ്റേഡിയത്തിലെ ആകാശത്ത്​ 22 വർഷം മുമ്പ്​ സചി​ൻ പറത്തിവിട്ട സിക്​സറുകളുടെ പ്രേതം ഇപ്പോഴുമുണ്ടെന്ന്​ തോന്നുന്നു. ഞായറാഴ്​ച രാത്രിയിൽ ഇവിടെ ബാറ്റെടുത്തവനെല്ലാം വെളിച്ചപ്പാടായി. സിക്​സും ബൗണ്ടറിയും കൊണ്ട്​ മൈതാനും നിറഞ്ഞുകവിഞ്ഞപ്പോൾ ക്രിക്കറ്റ്​ പുസ്​തകങ്ങളിൽ അസാധ്യമെന്ന്​ കരുതിയതും സാധ്യമായി. ​െഎ.പി.എൽ ചരിത്രത്തിൽ ഏറ്റവും വലിയ റൺചേസിങ്ങുമായി രാജസ്​ഥാൻ റോയൽസ്​ വീണ്ടും ആരാധകരെ അമ്പരപ്പിച്ചു.

മായങ്ക്​ അഗർവാളി​െൻറ സെഞ്ച്വറി മികവിൽ (50 പന്തിൽ 106) രണ്ടു വിക്കറ്റ്​ നഷ്​ടത്തിൽ 223 റൺസെടുത്ത കിങ്​സ്​ ഇലവൻ പഞ്ചാബായിരുന്നു കളിയുടെ ആദ്യ പകുതി കവർന്നത്​. 69 റൺസുമായി ലോകേഷ്​ രാഹുലും ഉറച്ച പിന്തുണ നൽകി. എന്നാൽ, വിജയം ഉറപ്പിച്ച പഞ്ചാബിനെ അമ്പരപ്പിച്ച്​ രാജസ്​ഥാൻ 19.3 ഒാവറിൽ ആറു വിക്കറ്റ്​ നഷ്​ടത്തിൽ മറികടന്നു. നാലുവിക്കറ്റിന്​ രാജസ്​ഥാ​െൻറ ചരിത്ര ജയം.

സിക്​സർ സഞ്​ജു

അസാധ്യമെന്ന്​ തോന്നിയ ലക്ഷ്യത്തിലേക്ക്​ ആത്​മവിശ്വാസം കൈവിടാതെയായിരുന്നു രാജസ്​ഥാ​െൻറ മറുപടി. ജോസ്​ ബട്​ലറെ (4) വേഗം നഷ്​ടമായെങ്കിലും സ്​റ്റീവൻ സ്​മിത്തും (27 പന്തിൽ 50), സഞ്​ജു സാംസണും (42 പന്തിൽ 85) രാജസ്​ഥാന്​ പ്രതീക്ഷ നൽകി. എന്നാൽ, കൂറ്റം ലക്ഷ്യം താണ്ടവെ സ്​മിത്തു മടങ്ങിയത്​ തിരിച്ചടിയായി. പകരമെത്തിയ രാഹുൽ തെവാട്ടിയ എല്ലാവരെയും നിരാശപ്പെടുത്തുന്നതായിരുന്നു കണ്ടത്​. പന്തിൽ കണക്ഷൻ ലഭിക്കാതെ താരം വട്ടംകറങ്ങി. ഇതിനിടെ പരമാവധി സ്​ട്രൈക്ക്​ എടുത്ത സഞ്​ജു ഷമിയുടെ പന്തിൽ പുറത്തായി. ഏഴ്​ സിക്​സും, നാല്​ ബൗണ്ടറിയും സഞ്​ജു നേടിയിരുന്നു.

അമ്പ​േമ്പാ തെവാട്ടിയ

സഞ്​ജു മടങ്ങിയതോടെ തോൽവി ഉറപ്പിച്ച രാജസ്​ഥാൻ നിരയിൽ സ്വന്തം താരങ്ങളെ പോലും അമ്പരപ്പിക്കുന്നതായിരുന്നു തെവാട്ടിയയുടെ പ്രകടനം. 23 പന്തിൽ 63 റൺസ്​ വേണമെന്ന നിലയിലാണ്​ സഞ്​ജു പുറത്തായത്​. പിന്നെ തെവാട്ടിയ രംഗം വാണു. ഷെൽഡൺ കോട്രൽ എറിഞ്ഞ 18ാം ഒാവറിൽ കളി മാറ്റി. അഞ്ച്​ സിക്​സറുകളുമായി തെവാട്ടിയ ജാതകം തിരുത്തി. 23 പന്തിൽ 17 റൺസെടുത്ത താരം, അടുത്ത ആറ്​ പന്തിൽ 30 റൺസ്​ അടിച്ചുകൂട്ടി വിസ്​മയിപ്പിച്ചു. 31 പന്തിൽ ഏഴ്​ സിക്​സുമായി 53 റൺസാണ്​ തെവാട്ടിയ നേടിയത്​. പിന്നാലെ ജൊഫ്ര ആർച്ചർ (13) ടീമിന്​ വിജയം സമ്മാനിച്ചു.