പെർത്ത്: ആത്മവിശ്വാസത്തോടെ ബാറ്റ് വീശുന്ന കെ.എൽ. രാഹുലിന് ഇന്ത്യൻ ടീമിൽ ചെലുത്താൻ കഴിയുന്ന സ്വാധീനമാണ് ഇന്ത്യ-ആസ്ട്രേലിയ ഏറ്റുമുട്ടുന്ന ബോർഡർ ഗവാസ്കർ ട്രോഫി ടെസ്റ്റ് പരമ്പരയിലെ ആദ്യ മത്സരത്തിൽ തെളിയുന്നത്. ന്യൂബോളിനെ വളരെ പക്വതയോടെയും ആത്മവിശ്വാസത്തോടെയും നേരിടുന്ന രാഹുലും യശസ്വി ജയ്സ്വാളും മത്സരത്തിൽ ഇന്ത്യക്ക് കൃത്യമായ ആധിപത്യം നൽകി. ആദ്യ ഇന്നിങ്സിൽ ഇന്ത്യ 150 റൺസിന് എല്ലാവരും പുറത്തായ മത്സരത്തിൽ രണ്ടാം ഇന്നിങ്സിൽ വിക്കറ്റൊന്നും നഷ്ടമാകാതെ 172 റൺസ് ഇന്ത്യ സ്വന്തമാക്കിയിട്ടുണ്ട്.
90 റൺസ് നേടി സെഞ്ച്വറിയിലേക്ക് നീങ്ങുന്ന ജയ്സ്വാളും 62 റൺസുമായി കെ.എൽ. രാഹുലുമാണ് ക്രീസിലുളളത്. തിരിച്ചും മറിച്ചും സ്വിങ് ചെയ്തിട്ടും ബൗൺസറുകളെറിഞ്ഞും പേസിൽ വ്യതിയാനം വരുത്തിയും എറിഞ്ഞും ഇന്ത്യൻ ഓപണർമാരെ കുഴപ്പിക്കാൻ ഓസീസ് ശ്രമിച്ചുവെങ്കിലും എന്ത് വന്നാലും കുലുങ്ങില്ല എന്ന മട്ടിലായിരുന്നു ഇന്ത്യൻ ബാറ്റർമാർ. അവസാന വിക്കറ്റിൽ ആസ്ട്രേലിയൻ ബാറ്റർമാരായ മിച്ചൽ സ്റ്റാർക്ക്, ജോഷ് ഹെയ്സൽവുഡ് എന്നിവർ ചേർന്ന് ഇന്ത്യ‍യുടെ ക്ഷമ പരീക്ഷിച്ചിരുന്നു. എന്നാൽ അതിനപ്പുറം ആസ്ട്രേലിയൻ ബൗളർമാരെ പരീക്ഷിക്കുകയാണ് രാഹുൽ-ജയ്സ്വാൾ സഖ്യം. ഏഴ് ഫോറും രണ്ട് സിക്സറുമടിച്ചാണ് ജയ്സ്വാൾ 90 റൺസ് നേടിയത്. നാല് ഫോറടങ്ങിയതാണ് രാഹുലിന്‍റെ ഇന്നിങ്സ്.
നിലവിൽ 218 റൺസ് ലീഡുള്ള ഇന്ത്യക്ക് മൂന്ന് ദിവസം ബാക്കിയിരിക്കെ മത്സരത്തിൽ വിജയം സ്വന്തമാക്കാവുന്നതാണ്. നേരത്തെ ആദ്യ ദിനം ഏഴിന് 67 റൺസെന്ന നിലയിൽ ബാറ്റിങ് ആരംഭിച്ച ആസ്ട്രേലിയൻ പട 104 റൺസിന് എല്ലാവരും പുറത്തായിരുന്നു. 79ന് ഒമ്പത് വിക്കറ്റ് നഷ്ടമായ ഓസീസിനെ സ്റ്റാർക്കും ഹെയ്സൽവുഡുമാണ് 100 കടത്തിയത്. 112 പന്തിൽ നിന്നും സ്റ്റാർക്ക് 26 റൺസ് സ്വന്തമാക്കി. ബുംറ അഞ്ച് വിക്കറ്റ് നേടിയ ഇന്നിങ്സിൽ ഹർഷിത് റാണ മൂന്നും മുഹമ്മദ് സിറാജ് രണ്ടും വിക്കറ്റ് നേടിയിരുന്നു. സ്റ്റാർക്കാണ് ആസ്ട്രേലിയയുടെ ടോപ് സ്കോറർ.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.