ധോണിക്ക്​ ശേഷമുള്ള മികച്ച നായകനാണ്​ കോഹ്​ലി; വിമർശനങ്ങൾ ഏൽക്കില്ലെന്ന്​ പാക്​ താരം

ന്യൂഡൽഹി: ലോക ടെസ്​റ്റ്​ ചാമ്പ്യൻഷിപ്പ്​ ഫൈനലിൽ ന്യൂസിലൻഡിനെതിരെ തോറ്റതിന്​ പിന്നാലെ വിരാട്​ കോഹ്​ലിയുടെ ക്യാപ്​റ്റൻസിക്ക്​ നേരെ വിമർശനമുയർന്നിരുന്നു. എന്നാൽ ​കോഹ്​ലിയുടെ ക്യാപ്​റ്റൻസിയുടെ കാര്യത്തിൽ ആരും വേവലാതിപ്പെടേണ്ട കാര്യമില്ലെന്ന്​ പറയുകയാണ്​ പാകിസ്​താ​െൻറ വെറ്ററൻ വിക്കറ്റ്​ കീപ്പർ ബാറ്റ്​സ്​മാനായ കമ്രാൻ അക്​മൽ. കോഹ്​ലി മഹാനായ നായകനാണെന്നും 2017 ചാമ്പ്യൻസ് ​ട്രോഫയിലെയും 2019 ലോകകപ്പ്​ സെമിയിലെയും തോൽവികൾക്ക്​ അദ്ദേഹത്തെ കുറ്റം പറഞ്ഞിട്ട്​ കാര്യമില്ലെന്നുമാണ്​ കമ്രാൻ പറയുന്നത്​.

'എം‌.എസ് ധോണിക്ക് ശേഷമുള്ള മികച്ച ക്യാപ്റ്റനാണ് വിരാട് കോഹ്‌ലി. അദ്ദേഹത്തിന്​ 70 അന്താരാഷ്ട്ര സെഞ്ച്വറികളുണ്ട്. കോഹ്​ലി ചാമ്പ്യൻസ് ട്രോഫിയും 2019 ലോകകപ്പും കളിച്ചു. ഇന്ത്യ തോറ്റു, പക്ഷേ അതിൽ എന്താണ് തെറ്റ്?. അഞ്ച് വർഷം ഇന്ത്യ ഒന്നാം നമ്പർ ടെസ്റ്റ്​ ടീമായി തുടർന്നു. അദ്ദേഹത്തി​െൻറ നേട്ടങ്ങളും സേവനവും നോക്കൂ. അവ​െൻറ ക്യാപ്റ്റൻസി ഭയങ്കരമാണ്. അതിൽ സംശയമില്ല. അവൻ ഒരു അത്ഭുതശാലിയായ കളിക്കാരനാണ്. അവൻ സ്വയം തയാറെടുക്കുന്ന രീതി അസാധാരണമാണ്'- അക്​മൽ യൂട്യൂബിൽ നടത്തിയ വിഡിയോ ചാറ്റിൽ പറഞ്ഞു.

കോഹ്‌ലിയെ ക്യാപ്​റ്റൻ സ്​ഥാനത്ത്​ നിന്ന്​ മാറ്റിയാൽ ഇന്ത്യ ഐ.സി.സി ടൂർണമെൻറ്​ വിജയിക്കുമെന്ന കാര്യത്തിൽ യാതൊരു ഉറപ്പുമില്ലെന്നും താരത്തെ ചോദ്യം ചെയ്യുന്നവരുടെ യോഗ്യത എന്താ​ണെന്നും കമ്രാൻ ചോദിച്ചു.

'ക്യാപ്റ്റനെ മാറ്റിയാൽ ഇന്ത്യ ഐ.സി.സി ടൂർണമെൻറ്​ വിജയിക്കുന്നെ്​ ആർക്കും ഉറപ്പ്​ പറയാൻ സാധിക്കില്ല. ഇത്​ ഭാഗ്യത്തി​െൻറ കാര്യമാണ്​. യാതൊരു ധാരണയുമില്ലാത്തവർക്ക്​ വിരൽ ചൂണ്ടാൻ എളുപ്പമാണ്. ഒരു ഗല്ലി ടീമിനെ പോലും നയിക്കാത്ത ആളുകളാണ്​ ക്യാപ്റ്റനെ മാറ്റാൻ ഇന്ത്യയെയും കോഹ്​ലിയെയും ഉപദേശിക്കുന്നത്​' -കമ്രാൻ പറഞ്ഞു.

ഇംഗ്ലണ്ടിലെ സതാംപ്​റ്റണിൽ നടന്ന ലോക ടെസ്​റ്റ്​ ചാമ്പ്യൻഷിപ്പ്​ ഫൈനലിൽ എട്ടു വിക്കറ്റിനാണ്​ ന്യൂസിലൻഡ്​ ഇന്ത്യയെ പരാജയപ്പെടുത്തിയത്​. 2019 ഏകദിന ​ലോകകപ്പ്​ ​സെമിഫൈനലിലും കിവീസായിരുന്നു ഇന്ത്യയെ പുറത്താക്കിയത്​. 2017ലെ ചാമ്പ്യൻസ്​ ട്രോഫി ഫൈനലിൽ പാകിസ്​താനായിരുന്നു ഇന്ത്യയെ തോൽപിച്ചത്​. ലണ്ടനിലെ ഓവലിൽ നടന്ന ഫൈനലിൽ 180 റൺസി​െൻറ വമ്പൻ തോൽവിയാണ്​ കോഹ്​ലിയും സംഘവും ഏറ്റുവാങ്ങിയത്​​.