ന്യൂയോര്‍ക്: ഇന്ത്യയുടെ ലിയാണ്ടര്‍ പേസിന്‍െറയും രോഹന്‍ ബൊപ്പണ്ണയുടെയും സഖ്യം യു.എസ് ഓപണ്‍ പുരുഷ ഡബ്ള്‍സില്‍ ആദ്യ റൗണ്ടില്‍ തന്നെ പുറത്ത്. മിക്സഡ് ഡബ്ള്‍സില്‍ സാനിയ സഖ്യം ജയത്തോടെ തുടങ്ങി. ജര്‍മനിയുടെ ആന്ദ്രെ ബെഗെമാന്‍-പേസ് സഖ്യം സ്റ്റെഫാന്‍ റോബര്‍ട്ട് (ഫ്രാന്‍സ്)- ഡുഡി സെല (ഇസ്രായേല്‍) സഖ്യത്തോടാണ് തോറ്റത്. സ്കോര്‍: 6-2, 5-7, 4-6. ഡെന്മാര്‍ക്കിന്‍െറ ഫ്രെഡറിക് നീല്‍സനുമായി ചേര്‍ന്ന് റാക്കറ്റേന്തിയ ബൊപ്പണ്ണക്ക് അമേരിക്കയുടെ ബ്രയാന്‍ ബേക്കര്‍-ന്യൂസിലന്‍ഡിന്‍െറ മാര്‍കസ് ഡാനിയല്‍ സഖ്യത്തോടാണ് തോല്‍വി പിണഞ്ഞത്. സ്കോര്‍: 2-6, 6-7. ക്രൊയേഷ്യയുടെ ഇവാന്‍ ഡോഡിജുമായി ചേര്‍ന്നാണ് മിക്സഡ് ഡബ്ള്‍സില്‍ സാനിയ ആദ്യ റൗണ്ടില്‍ ജയത്തോടെ മുന്നേറിയത്. അമേരിക്കയുടെ ഡൊണാള്‍ഡ് യങ്- ടെയ്ലര്‍ ടൗണ്‍സെന്‍ഡ് ജോടിയെയാണ് ഒരു മണിക്കൂര്‍ നീണ്ട പോരാട്ടത്തില്‍ സാനിയ സഖ്യം തോല്‍പിച്ചത് (6-4, 6-4).
കാനഡയുടെ ഗബ്രിയേല ഡബ്രോവ്സ്കിക്കൊപ്പം മിക്സഡ് ഡബ്ള്‍സില്‍ ബൊപ്പണ്ണ ആദ്യ റൗണ്ട് പിന്നിട്ടു. ആതിഥേയരുടെ നോവ റൂബിന്‍- ജാമി ലോയ്ബ് സഖ്യത്തെയാണ് തോല്‍പിച്ചത്. സ്കോര്‍: 7-5, 6-4. ജൂനിയര്‍ പെണ്‍കുട്ടികളില്‍ ഇന്ത്യയുടെ പ്രഞ്ജാല യാദ്ലപ്പള്ളി അമേരിക്കയുടെ വിക്ടോറിയ എമ്മയെ ഒന്നാം റൗണ്ടില്‍ മറികടന്നു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.