ലോകത്തിന്​ വീണ്ടും ശ്വസിക്കാൻ കഴിയണമെന്ന്​ ഫലസ്​തീൻ; ബൈഡൻെറ വിജയത്തിൽ ലോകരാജ്യങ്ങൾ

വാഷിങ്​ടൺ: ജോ ബൈഡൻെറ യു.എസ്​ തെരഞ്ഞെടുപ്പിലെ വിജയത്തെ കുറിച്ചിള്ള വാർത്തകൾ വന്നതിന്​ പിന്നാലെ ലോകരാജ്യങ്ങൾ അദ്ദേഹത്തെ അഭിനന്ദിച്ച്​ രംഗത്തെത്തി. 77കാരനായ ഡെമോക്രാറ്റിക്​ സ്ഥാനാർഥി 270 എന്ന മാന്ത്രിക സംഖ്യ നേടിയതോടെയാണ്​ വിജയത്തോടടുത്തത്​. ട്രംപിൻെറ തോൽവി പുതിയൊരു അമേരിക്കയെ സൃഷ്​ടിക്കുമെന്നാണ്​ ചില രാജ്യങ്ങൾ പ്രതീക്ഷ പ്രകടിപ്പിച്ചത്​. ബൈഡൻെറ വിജയത്തിൽ വിവിധ രാജ്യങ്ങളുടെ പ്രതികരണമറിയാം.

കാനഡ

ഇരു രാജ്യങ്ങളും സുഹൃത്തുക്കളാണെന്നും ബൈഡനും കമലഹാരിസിനുമൊപ്പം നല്ല പ്രവർത്തനം കാഴ്​ചവെക്കാനാണ്​ ആഗ്രഹിക്കുന്നതെന്നും​ കനേഡിയൻ പ്രധാനമന്ത്രി ജസ്​റ്റിൻ ട്രൂഡോ പറഞ്ഞു. ഇരുവരുടെയും വിജയത്തിൽ അദ്ദേഹം ആശംസകൾ അർപ്പിക്കുകയും ചെയ്​തു.

യു.കെ

കാലാവസ്ഥമാറ്റം, വ്യാപാരം, സുരക്ഷ തുടങ്ങിയ വിവിധ വിഷയങ്ങളിൽ ഭാവിയിൽ ഒരുമിച്ച്​ പ്രവർത്തിക്കാനാവുമെന്ന്​ ബ്രിട്ടീഷ്​ പ്രധാനമന്ത്രി ബോറിസ്​ ജോൺസൺ പറഞ്ഞു. മതിലുകൾക്ക്​ പകരം പാലങ്ങൾ നിർമിക്കേണ്ട കാലമാണ്​ വരുന്നതെന്ന്​ ലണ്ടൻ മേയർ സാദിഖ്​ ഖാനും വ്യക്​തമാക്കി.

പാകിസ്​താൻ

അഫ്​ഗാനിസ്​താനിൽ സമാധാനം പുനഃസ്ഥാപിക്കുന്നതിനായി പുതിയ യു.എസ്​ ഭരണാധികാരികളുമായി ചേർന്ന്​ പ്രവർത്തിക്കുമെന്ന്​ പാകിസ്​താൻ പ്രധാനമന്ത്രി ഇംറാൻ ഖാൻ പറഞ്ഞു. നികുതി സ​മ്പ്രദായങ്ങളിലെ മാറ്റങ്ങൾക്കായും നിലകൊള്ളുമെന്നും അദ്ദേഹം പറഞ്ഞു.

ഇറാൻ

വിനാശകരമായ യു.എസിൻെറ നയത്തിൽ മാറ്റം വരുമെന്ന പ്രതീക്ഷ ഇറാൻ വൈസ്​ പ്രസിഡൻറ്​ ഇഷാഖ്​ ജഹാങ്കരി പ്രകടിപ്പിച്ചു. യു.എസിൻെറ നയങ്ങളിൽ വ്യതിയാനമുണ്ടാകുമെന്നാണ്​ പ്രതീക്ഷ. അന്താഷ്​ട്ര നിയമങ്ങളേയും കരാറുകളേയും അവർ മാനിക്കുമെന്ന്​ പ്രതീക്ഷിക്കുന്നതായും ഇറാൻ വൈസ്​ പ്രസിഡൻറിനെ ഉദ്ധരിച്ച്​ മാധ്യമങ്ങൾ റിപ്പോർട്ട്​ ചെയ്​തു.

ഫ്രാൻസ്​

​ജോ ബൈഡനും കമല ഹാരിസിനും അഭിനന്ദനങ്ങൾ, ലോകം നേരിടുന്ന വെല്ലുവിളികളെ മറികടക്കാൻ ഒരുമിച്ച്​ പ്രവർത്തിക്കാൻ കഴിയുമെന്നാണ്​ പ്രതീക്ഷയെന്ന്​ ഫ്രഞ്ച്​ പ്രസിഡൻറ്​ ഇമാനുവൽ മാക്രോൺ പറഞ്ഞു. അമേരിക്കക്ക്​ വീണ്ടും സ്വാഗതമെന്നായിരുന്നു പാരീസ്​ മേയർഅന്ന ഹിഡാൽഗോയുടെ പ്രതികരണം.

ഫലസ്​തീൻ

ലോകത്തിന്​ വീണ്ടും ശ്വസിക്കാൻ കഴിയണമെന്നായിരുന്നു ഫലസ്​തീൻ ലിബറേഷൻ ഓർഗനൈസേഷൻ അംഗവും നേതാവുമായ ഹനാൻ അശ്​ഹരാവിയുടെ ട്വീറ്റ്​. ട്രംപിൻെറ നയങ്ങളെ സൂക്ഷ്​മമായി പരിശോധിച്ച്​ അതിന്​ പകരം മനുഷത്വവും നിയമപരവുമായ കാര്യങ്ങൾ നടപ്പിലാക്കണമെന്നും അവർ ആവശ്യപ്പെട്ടു.

ജർമ്മനി

ബൈഡനേയും കമലയേയും അഭിനന്ദിക്കുകയാണെന്ന്​ ജർമ്മൻ ചാൻസലർ അംഗല മെർക്കൽ വ്യക്​തമാക്കി. ഈ സമയത്തെ വെല്ലുവിളികളെ ഒരുമിച്ച്​ നേരിടാമെന്നും പറഞ്ഞു.

ഇറാഖ്​

ജോ ബൈഡൻ വിശ്വസ്​ത സുഹൃത്തായിരിക്കുമെന്ന്​ ഇറാഖ്​ പ്രസിഡൻറ്​ ബർഹാം സാലിഹ്​ പറഞ്ഞു.മിഡിൽ ഈസ്​റ്റിൽ സമാധാനവും സുസ്ഥിരതയും കൊണ്ടു വരുന്നതിനായി ഒരുമിച്ച്​ പ്രവർത്തിക്കും. അതാണ്​ ഇരുരാജ്യങ്ങളുടെയും പ്രധാനലക്ഷ്യമെന്നും അദ്ദേഹം പറഞ്ഞു.

യുറോപ്യൻ യൂണിയൻ

പ്രസിഡൻറായി തെരഞ്ഞെടുക്കപ്പെട്ട ജോ ബൈഡനേയം വൈസ്​ പ്രസിഡൻറ്​ കമലഹാരിസിനേയും അഭിനന്ദിക്കുന്നു. എക്കാലവും നല്ല സുഹൃത്ത്​ ബന്ധം യുറോപ്യൻ യൂണിയനും അമേരിക്കയും തമ്മിലുണ്ടായിരുന്നുവെന്ന്​ യുറോപ്യൻ യൂണിയൻ പ്രതികരിച്ചു.

നാറ്റോ

നാറ്റോ സഖ്യത്തെ ശക്​തമായി പിന്തുണക്കുന്നയാളാണ്​ ബൈഡനെന്ന്​ സെക്രട്ടറി ജനറൽ ജെൻസ്​ സ്​റ്റോളൻബെർഗ്​ പറഞ്ഞു. ശക്​തമായ നാ​റ്റോ സഖ്യം വടക്കേ അമേരിക്കക്കും യുറോപ്പിനും അത്യാവശ്യമാണെന്നും അദ്ദേഹം പറഞ്ഞു.