പൊലീസ്​ നടപടി അപകടകരം​ -പോപുലര്‍ ഫ്രണ്ട്

കോഴിക്കോട്​: ഭരണകൂട-സംഘ്പരിവാര്‍ താല്‍പര്യത്തിനുവഴങ്ങി നീതി നിര്‍വഹണം അട്ടിമറിക്കാന്‍ പൊലീസ് നടത്തുന്ന നീക്കം അപകടകരമെന്ന് പോപുലര്‍ ഫ്രണ്ട് ഓഫ് ഇന്ത്യ സംസ്ഥാന പ്രസിഡന്റ് സി.പി. മുഹമ്മദ് ബഷീര്‍ വാര്‍ത്തസമ്മേളനത്തില്‍ പറഞ്ഞു. പോപുലര്‍ ഫ്രണ്ട് ഓഫ് ഇന്ത്യ ആലപ്പുഴയില്‍ സംഘടിപ്പിച്ച സമ്മേളനത്തില്‍ ആർ.എസ്​.എസ്​ വിരുദ്ധ മുദ്രാവാക്യം വിളിച്ചതിന്‍റെ പേരില്‍ സമാനതകളില്ലാത്ത വേട്ടയാണ് നടത്തുന്നത്. നാടുനീളെ മുസ്​ലിം വിദ്വേഷം പ്രചരിപ്പിക്കുകയും ആയുധമേന്തി തെരുവുകളില്‍ കലാപാഹ്വാനം നടത്തുകയും ചെയ്യുന്ന ആർ.എസ്​.എസ് ഭീകരര്‍ക്ക് ഗുഡ് സര്‍ട്ടിഫിക്കറ്റ് നല്‍കിയ സര്‍ക്കാറാണ് കേവലം മുദ്രാവാക്യത്തിന്‍റെ പേരില്‍ 153 എ വകുപ്പ് ചുമത്തി പോപുലര്‍ ഫ്രണ്ടിനെ വേട്ടയാടുന്നത്. പോപുലര്‍ ഫ്രണ്ട് ഡിവിഷന്‍ ഭാരവാഹികള്‍ ഉൾപ്പെടെ ഇരുപത്തഞ്ചിലധികം പ്രവര്‍ത്തകരെയാണ് ജയിലിലടച്ചത്. സംഘ്പരിവാര പ്രചാരണത്തിന്‍റെ പേരില്‍ സമുദായത്തെയും സംഘടനയെയും വേട്ടയാടാനും ഇസ്‍ലാമോഫോബിയ പ്രചരിപ്പിക്കാനും അനുവദിക്കില്ല. സംസ്ഥാന സെക്രട്ടറി സി.എ. റഊഫും വാര്‍ത്തസമ്മേളനത്തില്‍ പങ്കെടുത്തു.