മിനിലോറിയും കാറും കൂട്ടിയിടിച്ചു, കാനത്തിന്‍റെ ഭാര്യക്കും മകനും പരിക്ക്; അപകടം തലയോലപ്പറമ്പിൽ

തലയോലപ്പറമ്പ്: മിനിലോറിയും കാറും കൂട്ടിയിടിച്ച് സി.പി.ഐ മുൻ സംസ്ഥാന സെക്രട്ടറി കാനം രാജേന്ദ്രന്‍റെ ഭാര്യ വനജ രാജേന്ദ്രൻ (65), മകൻ സന്ദീപ് രാജേന്ദ്രൻ (42) എന്നിവർക്ക് പരിക്ക്. ഇരുവരെയും എറണാകുളത്തെ സ്വകാര്യ ആശുപത്രിയിൽ പ്രവേശിപ്പിച്ചു.

തലയോലപ്പറമ്പ് വടകര തോട്ടം ജങ്ഷന് സമീപം വെള്ളിയാഴ്ച വൈകീട്ട് 4.30 ഓടെയാണ് അപകടം. വാഴൂർ കാനത്തു നിന്ന് എറണാകുളത്തേക്കു പോയ ഇവരുടെ ഇന്നോവ കാറും തലയോലപ്പറമ്പ് ഇല്ലിത്തൊണ്ടിലുള്ള ഗ്രാനൈറ്റ് കടയിലേക്ക് ലോഡുമായി വന്ന മിനിലോറിയുമാണ് കൂട്ടിയിടിച്ചത്. വനജ രാജേന്ദ്രന്‍റെ തലക്കാണു പരിക്ക്. കാറിന്‍റെ മുൻവശം പൂർണമായി തകർന്നു.