ജോസ്​ കെ. മാണിക്ക്​ മറുപടി; ആരും വെള്ളം അടുപ്പത്ത്​ വെച്ചിട്ടില്ലെന്ന്​ സണ്ണി ജോസഫ്​

കോട്ടയം: ആരും വെള്ളം അടുപ്പത്ത്​ വെച്ചിട്ടില്ല, പിന്നെയെങ്ങ​നെ വാങ്ങിവെക്കുമെന്ന്​ ജോസ്​ കെ. മാണിയോട്​ ചോദ്യമുന്നയിച്ച്​ കെ.പി.സി.സി പ്രസിഡന്‍റ്​ സണ്ണി ജോസഫ്​. മുന്നണി മാറ്റം സ്വപ്നംകണ്ട്​ ആരെങ്കിലും വെള്ളം അടുപ്പത്ത്​ വെച്ചിട്ടുണ്ടെങ്കിൽ അവരത്​ വാങ്ങിവെക്കുന്നതാണ്​ നല്ലതെന്ന്​ കഴിഞ്ഞ ദിവസം കേരള കോൺഗ്രസ്​ എം ചെയർമാൻ ജോസ്​ കെ. മാണി പറഞ്ഞതിനോട്​ കോട്ടയം പ്രസ്​ക്ലബിൽ നടന്ന മീറ്റ്​ ദ​ പ്രസിൽ പ്രതികരിക്കുകയായിരുന്നു സണ്ണി ജോസഫ്.

കേരള കോൺഗ്രസ്​ എമ്മുമായി ഒരു ചർച്ചയും നടത്തിയിട്ടില്ലെന്ന്​ അദ്ദേഹം കൂട്ടിച്ചേർത്തു. 2026 ൽ കോൺഗ്രസ് മുഖ്യമന്ത്രി വരുമെന്ന്​ എല്ലാവരും പറയുന്നതിൽ സന്തോഷമുണ്ട്. താനുൾപ്പെടെ ആർക്കും മുഖ്യമന്ത്രിയാകാൻ അയോഗ്യതയില്ല. ശശി തരൂരിന്‍റെ നിലപാട് എ.ഐ.സി.സി. ശ്രദ്ധിക്കുന്നുണ്ട്. ഉചിതമായ സമയത്ത് തീരുമാനമുണ്ടാകും. അദ്ദേഹവുമായി ബന്​ധപ്പെട്ട വിഷയത്തിൽ കെ.പി.സി.സിക്ക്​ പ്രത്യേക റോളില്ല.

നിലമ്പൂരിൽ വെൽഫെയർ പാർട്ടിയുടെ പിന്തുണ തങ്ങൾ സ്വീകരിച്ചില്ല. അവർ വോട്ട് ചെയ്യാൻ വന്നാൽ വേണ്ടെന്ന്​ പറയുമോ. ചേലക്കരയിൽ തോറ്റെങ്കിലും അവിടെയുൾപ്പെടെ യു.ഡി.എഫിന്‍റെ ജനപിന്തുന്ന വർധിക്കുകയാണ്. പി.വി. അൻവറുമായി സഹകരിക്കുന്ന വിഷയം മുന്നണി യോഗത്തിൽ ചർച്ച ചെയ്തിട്ടില്ല. ബന്ധപ്പെട്ടവരുമായി ചർച്ച ചെയ്തുവേണം സ്കൂൾ സമയം പുനഃക്രമീകരിക്കുന്നതിൽ സർക്കാർ തീരുമാനമെടുക്കാൻ. ഈ മാസം18 ന് കോട്ടയത്ത്​ നടക്കുന്ന ഉമ്മൻ ചാണ്ടിയുടെ ചരമവാർഷിക ചടങ്ങിൽ രാഹുൽഗാന്ധി പ​ങ്കെടുക്കുമെന്നും അദ്ദേഹം പറഞ്ഞു. കെ.പി.സി.സി വർക്കിങ്​ പ്രസിഡന്‍റ്​ പി.സി. വിഷ്ണുനാഥ്​, പ്രസ്​ക്ലബ്​ പ്രസിഡന്‍റ്​ അനീഷ്​ കുര്യൻ, സെക്രട്ടറി ജോബിൻ സെബാസ്റ്റ്യൻ എന്നിവരും സന്നിഹിതരായിരുന്നു.