ആസാമി

ജാതി ചോദിക്കരുത്, ചിന്തിക്കരുത്, പറയരുത് എന്നൊക്കെയാണ് പുരോഗമനക്കാ൪ പറയുക. നവോത്ഥാനം തന്ന വെളിവൊക്കെ നമ്മൾ കാറ്റിൽ പറത്തിയിട്ട് കാലം കുറേയായ സ്ഥിതിക്ക് ലേശം ജാതിപറഞ്ഞുകൊണ്ടാവാം ഇത്തവണത്തെ വ്യക്തിവിശേഷം. ബ്രാഹ്മണബുദ്ധികൊണ്ട് ചരിത്രത്തിൻെറ ചക്രം തിരിച്ച ചാണക്യനുശേഷം ഇന്ത്യ കണ്ട കുതന്ത്രങ്ങളുടെ ചക്രവ൪ത്തി സുബ്രുവിനെപ്പറ്റി പറയുമ്പോൾ സ്വൽപം ജാതി പറയേണ്ടിവരും.

നാരായണഗുരു പൊറുക്കട്ടെ!. തമിഴ് ബ്രാഹ്മണകുലത്തിൽനിന്ന് ഇന്ത്യയുടെ രാഷ്ട്രീയ സാമൂഹിക സാംസ്കാരിക മേഖലക്ക് ഊ൪ജം പക൪ന്ന പ്രതിഭകൾ ഏറെയുണ്ട്. സുബ്രഹ്മണ്യഭാരതി, സി.വി. രാമൻ, ശ്രീനിവാസ രാമാനുജൻ, വി.ആ൪. കൃഷ്ണയ്യ൪, ആ൪.വെങ്കിട്ടരാമൻ, ആ൪.കെ. നാരായണൻ, വിശ്വനാഥൻ ആനന്ദ്, മലയാറ്റൂ൪ രാമകൃഷ്ണൻ, രാമചന്ദ്രഗുഹ, എസ്.പി. ബാലസുബ്രഹ്മണ്യം, ടി.എൻ. ശേഷൻ, രാജു നാരായണസ്വാമി തുടങ്ങിയ പേരെടുത്ത പ്രതിഭകൾ. അവരൊന്നും ജാതികൊണ്ട് കളിച്ചിട്ടില്ല. വംശമഹിമയും ഗോത്രവീര്യവും പുലമ്പിയിട്ടില്ല. പക്ഷേ, പഴയ ഹാ൪വാഡ് പ്രഫസ൪ സുബ്രു അങ്ങനെയല്ല. എന്തുകൊണ്ട് അങ്ങനെയല്ല എന്നറിയാൻ ഒരു പഴയ കഥപറയാം.

സിംഹാസനത്തിലിരിക്കുന്നത് ക്ഷത്രിയനാണെങ്കിലും ഭരിക്കുന്നത് ബ്രാഹ്മണനായിരിക്കണമെന്നാണല്ളോ കൗടില്യൻെറ കുടിലസൂത്രങ്ങളുടെ കാലം മുതൽ നമുക്കു കിട്ടിയ ആ൪ഷഭാരതജ്ഞാനം. പാ൪ട്ടിയേതായാലും ബ്രാഹ്മണൻ ഭരിച്ചാൽ മതി എന്ന് ജനാധിപത്യ ഇന്ത്യയിൽ അതിന് ഭാഷാന്തരമുണ്ടായി. ഭരണത്തിൻെറ സ൪വസിരാതന്തുക്കളിലും എണ്ണത്തിൽ കുറഞ്ഞ ബ്രാഹ്മണന്മാ൪ ഓടിനടന്ന് കഷ്ടപ്പെടുന്ന കാലത്ത് ലക്ഷണമൊത്തൊരു തമിഴ് ബ്രാഹ്മണൻ അമേരിക്കയിലെ വാധ്യാ൪പ്പണി വിട്ട് രാഷ്ട്രീയ സ്വയംസേവകനായി.

ഇന്ത്യയെന്നാൽ ഹിന്ദു, ഹിന്ദുവെന്നാൽ ബ്രാഹ്മണൻ എന്നായിരുന്നു സുബ്രഹ്മണ്യം സ്വാമി എന്ന ആ ഹാ൪വാഡ് പ്രഫസറുടെ തീപ്പൊരി ഡയലോഗ്. അതിൽ വീണ് രോമാഞ്ചകഞ്ചുകമണിഞ്ഞ ജനസംഘം സ്വാമിജിയെപ്പിടിച്ച് താത്ത്വികാചാര്യനാക്കി. അത് പഴയ കഥ. കാഴ്ചപ്പാടിൽ ഇപ്പോഴും മാറ്റമേതുമില്ല. നാക്കെടുത്താൽ വ൪ഗീയതയുടെ വിഷം വമിക്കും. മതമൗലികവാദത്തിൽ മോഡിയെയും മുത്തലിക്കിനെയും തൊഗാഡിയയെയും തോൽപ്പിക്കും.

ഹാ൪വാഡിൽ സ്വാമിജി പഠിപ്പിക്കുന്നത് ധനതത്ത്വശാസ്ത്രമാണ്. വമ്പന്മാരെ ലോകത്തിന് സമ്മാനിച്ച സ൪വകലാശാലയാണ് അത്. വ൪ഗീയത അവിടെ പഠിപ്പിക്കാൻ പറ്റില്ല. പക്ഷേ, സ്വാമിജി തൻെറ കാഴ്ചപ്പാടുകൾ ഡി.എൻ.എ എന്ന മുംബൈ പത്രത്തിലെഴുതി. ഇന്ത്യയിലെ മുസ്ലിംപള്ളികളെല്ലാം തക൪ക്കണം എന്നായിരുന്നു സ്വാമിജിയുടെ ആവശ്യം. തങ്ങളുടെ പൂ൪വിക൪ ഹിന്ദുക്കളാണെന്ന് സമ്മതിച്ചാൽ മാത്രമേ ഇന്ത്യയിൽ മുസ്ലിംകൾക്ക് വോട്ടവകാശം നൽകാവൂ എന്നും സുബ്രുവിന് ഒരുൾവിളിയുണ്ടായിരുന്നു. അതും എഴുതിച്ചേ൪ത്തു.

ഹാ൪വാഡിൽ പഠിക്കുന്ന കുട്ടികളൊക്കെ പ്രഫസ൪ സുബ്രുവിനെപ്പോലെയല്ല. സുബ്രുവിനെപ്പോലുള്ള ബുദ്ധിരാക്ഷസന്മാ൪ക്ക് ഒരു പ്രശ്നമുണ്ട്. എല്ലാ സെൻസും വികസിച്ചിരിക്കുന്നതിനാൽ കോമൺസെൻസുണ്ടാവില്ല. ആറാമിന്ദ്രിയംവരെ ഒരു കുറ്റവും കുറവുമില്ലാതെ വ൪ക്കു ചെയ്യും. സാമാന്യബുദ്ധി എന്ന ഒന്നുമാത്രം കാണില്ല. ന്യൂനപക്ഷങ്ങൾക്കെതിരെ ആക്രമണം അഴിച്ചുവിടാൻ ആഹ്വാനം ചെയ്യുന്ന അധ്യാപകനെ വെച്ചുകൊണ്ടിരിക്കാൻ ഹാ൪വാഡിലെ വിദ്യാ൪ഥികൾക്ക് കഴിയുമായിരുന്നില്ല.

സഞ്ജയ് പിൻേറാ, ഉമംഗ് കുമാ൪ എന്നിവരാണ് ലേഖനത്തിലെ വിഷലിപ്തമായ വരികൾ സഹപാഠികളുടെ ശ്രദ്ധയിൽപെടുത്തിയത്. സഹപാഠികളും അധ്യാപകരുമായി 450 പേ൪ ഒപ്പിട്ട പരാതി അധികൃത൪ക്കു കിട്ടി. അതോടെ സുബ്രു ഒൗട്ട്. നാട്ടിലൊരു നിലയും വിലയുമൊക്കെയുള്ളത് ഹാ൪വാഡ് പ്രഫസ൪ എന്ന പേരിലായിരുന്നു. അത് പോയിക്കിട്ടി. സ്വാമി പഠിപ്പിക്കുന്ന കോഴ്സുകൾ സ൪വകലാശാല നി൪ത്തി. ഇനി ഇടക്കിടെ അമേരിക്കയിലേക്ക് പറക്കേണ്ടിവരില്ല. കുട്ടികളിൽ വ൪ഗീയത കുത്തിവെക്കാൻ കഴിയില്ല. രാജ്യാന്തര തലത്തിൽ തന്നെ വ൪ഗീയത കളിക്കുന്നതിൽ വിദഗ്ധനാണ്. വെറുതെയല്ല ഒരിക്കൽ ഇസ്രായേലിൻെറ ആദരംതന്നെ കിട്ടിയത്.

ഇന്ത്യ- ഇസ്രായേൽ ബന്ധം സ്ഥാപിക്കുന്നതിന് ആദ്യമായി മുൻകൈയെടുത്ത വ്യക്തി എന്ന നിലയിൽ സയണിസ്റ്റ് രാഷ്ട്രം 1995ൽ സ്വാമിയെ ആദരിച്ചിരുന്നു. അതിനുള്ള ഉപകരസ്മരണയായി പിന്നീടുള്ള ലേഖനങ്ങളിലുടനീളം ഇസ്രായേലിന് സ്തുതിപാടാനും സ്വാമി മറന്നില്ല.
ഉഗ്രപ്രതാപിയായിരുന്ന പഴയകാലത്തിലേക്കുള്ള ശക്തമായ തിരിച്ചുപോക്കിനാണ് ഇപ്പോൾ ശ്രമം. 2ജി സ്പെക്ട്രം അഴിമതിക്കേസിൽ ആഭ്യന്തരമന്ത്രി ചിദംബരത്തെ പ്രതിയാക്കണമെന്ന് ആവശ്യപ്പെട്ടുകൊണ്ടാണ് കൗടില്യൻെറ പുതിയ കരുനീക്കം.

തിഹാ൪ ജയിലിലായ മുൻമന്ത്രി രാജയെപ്പോലെ തന്നെ ചിദംബരത്തിനും ഇടപാടിൽ പങ്കുണ്ടെന്ന് തുറന്നടിച്ചായിരുന്നു സുബ്രുവിൻെറ വരവ്. കൂടുതൽ തെളിവു നൽകുന്നതിനുവേണ്ടി തന്നെ സാക്ഷിയായി വിസ്തരിക്കണമെന്ന് ആവശ്യപ്പെട്ട് കരു ഒരു കളംകൂടി മുന്നോട്ടുനീക്കി. കേസിൽ സാക്ഷിയായി മൊഴി നൽകാൻ കഴിഞ്ഞയാഴ്ച അനുമതി കിട്ടി. ശനിയാഴ്ച രണ്ടു മണിക്കൂ൪ സ്വാമിയുടെ മൊഴി കോടതി രേഖപ്പെടുത്തി. പളനിയപ്പനെതിരായ പടനീക്കത്തിൻെറ ഒരു ഘട്ടമായതേയുള്ളൂ. അടുത്ത മാസം ഏഴിന് വീണ്ടും മൊഴിയെടുക്കും. അതും കാത്തിരുന്നു കാണാവുന്ന ഒരു സുബ്രു ഗെയിം.

ഇന്ത്യൻ രാഷ്ട്രീയത്തിൽ സുബ്രഹ്മണ്യം സ്വാമി എന്നൊരാൾ ഉണ്ടായിരുന്നില്ളെങ്കിൽ നിശ്ചയമായും നമ്മൾ ഈ സൈസിൽ ഒന്നിനെ നി൪മിച്ചെടുക്കുമായിരുന്നുവെന്നു പറഞ്ഞത് പത്രപ്രവ൪ത്തനരംഗത്തെ അതികായൻ വിനോദ് മേത്തയാണ്. മേത്തയോട് ആരും യോജിക്കും. അതാണ് സുബ്രു എന്ന അവതാരം. പാ൪ലമെൻറിൽ ഏകാംഗകക്ഷിയായിരുന്നിട്ടും ദേശീയ രാഷ്ട്രീയത്തിൽ കിങ്മേക്കറായിരുന്നു. ഇന്ദ്രപ്രസ്ഥത്തിൽ സ്വാമി നൽകിയ വിരുന്നുസൽക്കാരത്തിൽനിന്നാണ് വാജ്പേയി സ൪ക്കാറിൻെറ പതനത്തിനു വഴിതെളിച്ച കൊടുങ്കാറ്റ് രൂപപ്പെട്ടത്. സ്വാമിയുടെ കനിവും ക്രോധവും അനുഭവിച്ചറിയാത്ത കക്ഷികൾ വിരളം.

കാഴ്ചബംഗ്ളാവിൽ മാത്രം കാണാൻ കഴിയുന്ന അപൂ൪വയിനം കക്ഷിയാണ് ജനതാപാ൪ട്ടി. അതിൻെറ നേതാവായിരുന്നിട്ടുകൂടി സ്വാമിക്ക് ഇന്ത്യൻ രാഷ്ട്രീയത്തിലെ അതികായരെ വരച്ചവരയിൽ നി൪ത്താൻ കഴിഞ്ഞിരുന്നു. 98ലെ ലോക്സഭാ തെരഞ്ഞെടുപ്പിൽ അണ്ണാ ഡി.എം.കെക്കാരുടെ വോട്ടുനേടിയാണ് പാ൪ലമെൻറിലെത്തിയത്. തന്നെ മന്ത്രിസഭയിലെടുക്കാത്ത വാജ്പേയിയോടുള്ള വിരോധംകൊണ്ട് സ്വാമി മുന്നണിക്കുള്ളിലിരുന്നുകൊണ്ടുതന്നെ കുടിലതന്ത്രങ്ങൾ തുടങ്ങി.

സ്വാമിയെ അടുപ്പിക്കാത്ത വാജ്പേയിയുടെ വാശിയിൽ പ്രതിഷേധിച്ച് മന്ത്രിസഭക്കുള്ള പിന്തുണക്കത്തു കൊടുക്കാതെ ജയലളിത ബി.ജെ.പിയെ മുൾമുനയിൽ നി൪ത്തി. സുബ്രുവാകട്ടെ, വിരുന്നുസൽക്കാരമൊരുക്കി ജയലളിതയെയും സോണിയയെയും കണ്ടുമുട്ടിച്ച് വാജ്പേയി സ൪ക്കാറിനെ താഴെയിറക്കി. വെറുതെയല്ല, ചാണക്യൻെറ ചോരയാണ് ഞരമ്പിൽ.
1974ൽ കറകളഞ്ഞ ആ൪.എസ്.എസുകാരനായിരുന്നു. പിന്നീട് ജനതാപാ൪ട്ടിയിൽ. അവിടെ കാലുറക്കാതെ വന്നപ്പോൾ ചരൺസിങ്ങിനോടൊപ്പം ലോക്ദളിൽ. കുറേക്കാലം അവിടെ പയറ്റി.

പിന്നീട് തറവാടായ ജനതാപാ൪ട്ടിയിൽ. പാ൪ട്ടി പിന്നീട് ജനതാദളായപ്പോൾ അതിലായി. ചന്ദ്രശേഖ൪ പ്രധാനമന്ത്രിയായപ്പോൾ കാബിനറ്റ് മന്ത്രിയായി. നാലു മാസംകൊണ്ട് മന്ത്രിസഭ പൊളിഞ്ഞു. സ്വാമി വീണ്ടും ജനതാപാ൪ട്ടിയുണ്ടാക്കി. ഇപ്പോഴും സ്വന്തമായി കൊണ്ടുനടക്കുന്നു.
1939 സെപ്റ്റംബ൪ 15ന് ചെന്നൈയിലെ മൈലാപ്പൂരിൽ ജനനം. അമ്മ തൃശൂ൪ക്കാരിയാണ്. ദൽഹി യൂനിവേഴ്സിറ്റിയിൽനിന്ന് ഗണിതത്തിൽ ബിരുദം. സ്റ്റാറ്റിസ്റ്റിക്സിൽ മാസ്റ്റ൪ ബിരുദം. ഹാ൪വാഡ് യൂനിവേഴ്സിറ്റിയിൽനിന്ന് ഡോക്ടറേറ്റ്. 1964 മുതൽ അവിടെ പഠിപ്പിക്കാൻ തുടങ്ങി.

1969ൽ അസോസിയേറ്റ് പ്രഫസറായി. രാഷ്ട്രീയത്തിൽ സജീവമായിട്ടും സമ്മ൪ കോഴ്സുകൾ പഠിപ്പിക്കാൻ അവിടെ പോവുന്ന പതിവുണ്ടായിരുന്നു. ഡോ. റോക്സ്നയാണ് ഭാര്യ. അവ൪ സുപ്രീംകോടതി അഭിഭാഷകയാണ്. ഗീതാഞ്ജലി സ്വാമി, സുഹാസിനി ഹൈദ൪ എന്നിവ൪ മക്കൾ. സുഹാസിനി സി.എൻ.എൻ.ഐ.ബി. എന്നിൽ മാധ്യമപ്രവ൪ത്തകയാണ്. വീട്ടിൽ മാത്രം മതേതരത്വം പുലരുന്നുണ്ട്. ഭാര്യ പാഴ്സി വംശജ, മരുമകൻ മുസ്ലിം, സഹോദരീഭ൪ത്താവ് ജൂതൻ, സഹോദരഭാര്യ ക്രിസ്ത്യാനി. കുടുംബത്തിലെ ഈ വിശാലമനസ്സ് സമൂഹത്തിലെത്തുമ്പോൾ ചുരുങ്ങിപ്പോവുന്നതാണ് സുബ്രുസ്വാമിയുടെ ദുര്യോഗം.