ഷാർജയുടെ ചരിത്രം സമ്പന്നവും ആഴത്തിൽ വേരൂന്നിയതുമാണ്. മാനവരാശിയുടെ കിതപ്പറിയാത്ത ഓരോ കുതിപ്പിലും ഷാർജയുടെ പതറാത്ത കാലടിപ്പാടുകൾ ഒറ്റയടിക്ക് കണ്ടെത്താനാകും. പുരോഗതിയുടെ ഓരോ അടരുകളിൽ നിന്നും ശാസ്ത്ര-സാഹിത്യ-സാമ്പത്തിക വളർച്ചയുടെ കുതിപ്പ് പര്യവേക്ഷണം ചെയ്യാനുള്ള സവിശേഷമായ അവസരം ആവോളം പകർന്നു നൽകുന്നുണ്ട് ഷാർജ ആർക്കിയോളജി മ്യൂസിയം.
ക്രിസ്തുവിന് മുമ്പ് തന്നെ വികസനത്തിന്റെ രാജപാതയിലായിരുന്നു ഷാർജയെന്ന് വ്യക്തമാക്കുന്ന തെളിവുകളാണ് മൺപാളികളിൽ നിന്ന് ഗവേഷകർ പുറത്തെടുത്ത് ഷാർജ ടെലിവിഷൻ കേന്ദ്രത്തിന് സമീപത്തുള്ള ആർക്കിയോളജി മ്യൂസിയത്തിൽ പ്രദർശിപ്പിച്ചിരിക്കുന്നത്. ഒരു ജനതയുടെ പുരോഗതിയുടെ ഗാഥകൾ അക്ഷരതെറ്റില്ലാതെ വായിച്ചെടുക്കാൻ ഷാർജ അർക്കിയോളജിയിലെത്തിയാൽ മതി.
പൗരാണിക കാഴ്ച്ചകൾ മതിവരുവോളം കാണാനുള്ള അവസരമുണ്ട്. 1,25,000 വർഷത്തിലേറെയായി ഷാർജയിൽ മനുഷ്യവാസം ഉണ്ടെന്നാണ് നിരവധി ഉദ്ഖനനങ്ങളുടെയും പര്യവേഷണങ്ങളുടെയും റിപ്പോർട്ടുകൾ വ്യക്തമാക്കുന്നത്. ശിലായുഗം മുതൽ ഇസ്ലാമിന്റെ ഉയർച്ച വരെയുള്ള കാലഘട്ടത്തിലെ പ്രദേശവാസികളുടെ ജീവിതരീതിയെക്കുറിച്ച് മ്യൂസിയം വർത്തമാനത്തിലേക്ക് വെളിച്ചം വീശുന്നു.
ഷാർജയിൽ നിന്ന് കണ്ടെത്തിയ എല്ലാ പുരാവസ്തുക്കളും മ്യൂസിയത്തിൽപ്രദർശിപ്പിച്ചിട്ടുണ്ട്.. 1973 ലെ ഖനനത്തിന്റെ തുടക്കം മുതൽ ഇന്നുവരെ ഷാർജയിൽ നിന്ന് കണ്ടെത്തിയ എല്ലാ വസ്തുക്കളും സംരക്ഷിക്കുക, വ്യാഖ്യാനിക്കുക, പ്രദർശിപ്പിക്കുക എന്നിവയാണ് മ്യൂസിയത്തിന്റെ ദൌത്യം.
എല്ലാ ഖനനങ്ങളും ഷാർജക്ക് അഭിമാനകരവും സമ്പന്നവും ആഴത്തിൽ വേരൂന്നിയതുമായ ചരിത്രമുണ്ടെന്ന് കണക്കുകൾ നിരത്തി വ്യാഖ്യാനിക്കുന്നു. ശിലായുഗം മുതൽ ഇന്നുവരെ ഈ പ്രദേശത്ത് വികസിച്ച നാഗരികതകളെക്കുറിച്ച് സന്ദർശകർക്ക് മ്യൂസിയത്തിൽ പ്രദർശിപ്പിച്ചിരിക്കുന്ന കരകൗശല വസ്തുക്കൾ, നാണയങ്ങൾ, ആഭരണങ്ങൾ, മൺപാത്രങ്ങൾ, പുരാതന ആയുധങ്ങൾ എന്നിവയിലൂടെ കണ്ടറിയാനും വായിച്ചറിയാനും അവസരമുണ്ട്.
കിഴക്കൻ സിന്ധുനദീതട താഴ്വരയിൽ നിന്ന് പടിഞ്ഞാറൻ മെഡിറ്ററേനിയൻ ദ്വീപുകളിലേക്ക് വാണിജ്യബന്ധങ്ങളുടെ വ്യാപനവും മ്യൂസിയം അക്ഷരതെറ്റില്ലാതെ വായിച്ചുതരും. ശവകുടീരങ്ങൾ, ശ്മശാനങ്ങൾ, വീടുകൾ, നാണയങ്ങൾ, കാർഷികോപകരണങ്ങൾ തുടങ്ങിയവയെ കണ്ടറിയാനും 2,500 വർഷങ്ങൾക്ക് മുമ്പ് ഈ പ്രദേശത്ത് പ്രത്യക്ഷപ്പെട്ട ആദ്യത്തെ സാഹിത്യ രചനകളെക്കുറിച്ച് അടുത്തറിയുകയും ചെയ്യാം. ഷാർജ ആർക്കിയോളജി മ്യൂസിയം വാതിലുകൾ തുറന്നത് 1993ലാണ്. 1997മെയ് 10നാണ് ഹൽവാനിലേക്ക് മാറിയത്.
പോകാനുള്ള വഴി: ഹൽവാൻ ചിൽഡ്രൻ സെന്ററിനും ഷാർജ കോപ്പറേറ്റീവ് സൊസൈറ്റിക്കും ഇടയിലുള്ള അൽ അബാർ പ്രദേശത്ത്, ശൈഖ് റാഷിദ് ബിൻ സഖർ അൽ ഖാസിമി റോഡിൽ നിന്നാണ് ഷാർജ സയൻസ് മ്യൂസിയത്തിലേക്കും ഷാർജ ബ്രോഡ്കാസ്റ്റിംഗ് അതോറിറ്റിയിലേക്കുമുള്ള വഴി.
തുറക്കുന്ന സമയം: ശനി മുതൽ വ്യാഴം വരെ രാവിലെ 8:00 മുൽ വൈകീട്ട് 8:00 വരെയും വെള്ളിയാഴ്ച: വൈകീട്ട് 4:00 മുതൽ രാത്രി 8:00 വരെയുമാണ്.
●രണ്ടു വയസ്സിന് താഴെയുള്ള കുട്ടികൾക്ക് സൗജന്യം
●രണ്ടു മുതൽ 12 വയസ്സുവരെ 5ദിർഹം
●മുതിർന്നവർക്ക് 10ദിർഹം
●60ന് മുകളിൽ പ്രായമുള്ളവർക്ക് പ്രവേശനം സൗജന്യം
●അന്താരാഷ്ട്ര മ്യൂസിയം ദിനം, രക്തസാക്ഷി ദിനം, യു.എ.ഇ ദേശീയ ദിനം തുടങ്ങിയ പ്രധാനപ്പെട്ട ദിവസങ്ങളിൽ പ്രവേശനം സൗജന്യമാണ്
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.