എസ്​.പി.ബിയുടെ ആരോഗ്യനിലയെ കുറിച്ച്​ ഇംഗ്ലീഷിൽ സംസാരിക്കുന്നതെന്തുകൊണ്ട്​? മറുപടിയുമായി ചരൺ

ന്യൂഡൽഹി: കോവിഡ്​ ബാധിതനായി ചികിത്സയിൽ കഴിയുന്ന ഗായകൻ എസ്.പി ബാലസുബ്രഹ്മണ്യത്തി​െൻറ ആരോഗ്യനിലയെ കുറിച്ച്​ ആരാധകരോട്​ വിരവങ്ങൾ പങ്കുവെക്കാറുള്ളത്​ മകൻ എസ്. പി ചരൺ ആണ്​. മെഡിക്കൽ സംഘവുമായി സംസാരിച്ച ശേഷം ചരൺ അപ്പയുടെ ആരോഗ്യനില സംബന്ധിച്ച വിവരങ്ങൾ വിഡിയോയിലൂടെ പങ്കുവെക്കാറുണ്ട്​. എന്നാൽ ചരൺ വിഡിയോയിൽ ഇംഗ്ലീഷിൽ സംസാരിക്കുന്നതിനെതിരെ വിമർശനമുയർന്നിരിക്കുകയാണ്​. എസ്​.പി.ബിയെ പോലെ തമിഴകം നെഞ്ചിലേറ്റിയ വ്യക്തിയെ കുറിച്ച്​ തമിഴിൽ സംസാരിക്കാത്തത്​ എന്തുകൊണ്ടാണ്​ എന്നാണ്​ ചോദ്യമുയരുന്നത്​. ഇതിന്​ മറുപടിയായി ചരൺ മറ്റൊരു വിഡിയോ ഇൻസ്​റ്റഗ്രാമിൽ പോസ്​റ്റ്​ ചെയ്​തു.

''എസ്​.പി.ബിയുടെ ആരോഗ്യനിലം സംബന്ധിച്ച പോസ്റ്റുകൾ തമിഴിൽ ഇടാൻ ധാരാളം ആളുകൾ എന്നോട് ആവശ്യപ്പെട്ടിട്ടുണ്ട്. ഡാഡിക്ക് രാജ്യമെമ്പാടും ധാരാളം ആരാധകരുണ്ട് എന്നതുകൊണ്ടാണ്​ ഞാൻ സംസാരിക്കാൻ ഇംഗ്ലീഷ്​ ഭാഷ തെരഞ്ഞെടുത്തത്​. തമിഴ്, മലയാളം, തെലുങ്ക്, ഹിന്ദി, കന്നഡ എന്നിങ്ങനെ നിരവധി ഭാഷകളിൽ അ​ദ്ദേഹം പാടിയിട്ടുണ്ട്​. അദ്ദേഹം പാടിയ എല്ലാ ഭാഷകളിലും ആരോഗ്യനില സംബന്ധിച്ച പോസ്റ്റുകൾ ഇടുന്നതിന്​ വള​രെ സമയമെടുക്കും. ഡോക്ടർമാരുമായുള്ള ആശയവിനിമയത്തിനും പ്രാർത്ഥനകൾക്കും ഇടയിലാണ്, അദ്ദേഹത്തിൻെറ ആരാധകർക്കായി അപ്‌ഡേറ്റുകൾ ഇടുന്നത്​. അതിനാൽ ദയവായി മനസിലാക്കുക. ഞാൻ‌ പറയുന്നത്‌ മനസിലാക്കാൻ‌ കഴിയാത്തവരുണ്ടെങ്കിൽ, ദയവായി അത് അവർക്ക് വേണ്ടി വിശദീകരിച്ചു നൽകുക''- ചരൺ പറഞ്ഞു. 

കോവിഡ്​ ബാധിച്ചതിനെ തുടർന്ന് ആഗസ്റ്റ്​ അഞ്ചിനാണ് 74 കാരനായ എസ്.പി.ബിയെ എം.ജി.എം ഹെൽത്ത്​കെയർ ആശുപത്രിയിൽ പ്രവേശിപ്പിച്ചത്​. വിഡിയോയിൽ എസ്.പി.ബിയുടെ ആരോഗ്യനിലയെ കുറിച്ച്​ സംസാരിച്ച ചരൺ അദ്ദേഹം സുഖപ്പെട്ടുവരുന്നതായി അറിയിച്ചു. എസ്​.പി.ബി ചികിത്സയോട്​ പ്രതികരിച്ചു തുടങ്ങിയെന്നും 90 ശതമാനവും ബോധാവസ്ഥയിൽ എത്തിയിട്ടുണ്ടെന്ന്​ ഡോക്​ടർമാർ അറിയിച്ചതായും ചരൺ വിശദീകരിച്ചു. പിതാവിന്​ നൽകുന്ന സ്​നേഹത്തിനും പ്രാർഥനകൾക്കും നന്ദി അറിയിക്കുന്നതായും മികച്ച ചികിത്സ നൽകാൻ ഉത്സാഹത്തോടെ പ്രവർത്തിക്കുന്ന ഡോക്ടർമാരോടും കടപ്പാടുണ്ടെന്നും ചരൺ പറഞ്ഞു.

ആഗസ്റ്റ് 13 ന് എസ്​.പി.ബിയുടെ നില വഷളാവുകയും തുടർന്ന്​ തീവ്രപരിചരണ വിഭാഗത്തിലേക്ക് മാറ്റുകയും ചെയ്തിരുന്നു.