കുവൈത്ത് സിറ്റി: ദേശീയ ദിനം ആഘോഷിക്കുന്ന ഖത്തറിന് ആശംസയുമായി കുവൈത്ത്. അമീർ ശൈഖ് മിശ്അൽ അൽ അഹമ്മദ് അൽ ജാബിർ അസ്സബാഹ്, കിരീടാവകാശി ശൈഖ് സബാഹ് ഖാലിദ് അൽ ഹമദ് അൽ മുബാറക് അസ്സബാഹ്, പ്രധാനമന്ത്രി ശൈഖ് അഹ്മദ് അബ്ദുല്ല അൽ അഹമ്മദ് അസ്സബാഹ് എന്നിവർ ഖത്തർ അമീർ ശൈഖ് തമീം ബിൻ ഹമദ് ആൽഥാനിയെ ആശംസ അറിയിച്ചു.
ഖത്തറിന്റെ ശ്രദ്ധേയമായ വികസന നേട്ടങ്ങളെക്കുറിച്ച് കുവൈത്ത് അമീർ ആശംസ സന്ദേശത്തിൽ അഭിനന്ദിച്ചു.ഖത്തർ അമീറിന് ആയുരാരോഗ്യം നേർന്ന അമീർ, ഖത്തറിനും ജനങ്ങൾക്കും കൂടുതൽ പുരോഗതിയും വികസനവും ആശംസിച്ചു. രാജകുടുംബങ്ങളും രാജ്യങ്ങളും ജനങ്ങളും തമ്മിലുള്ള ദൃഢമായ സാഹോദര്യ ബന്ധത്തെയും പ്രശംസിച്ചു.
കുവൈത്തും ഖത്തറും തമ്മിൽ വിവിധ മേഖലകളിൽ നിലവിലുള്ള സഹകരണത്തിന്റെ വശങ്ങൾ പ്രോത്സാഹിപ്പിക്കുന്നതിനും വികസിപ്പിക്കുന്നതിനുമുള്ള താൽപര്യവും വ്യക്തമാക്കി. ഖത്തർ അമീർ ശൈഖ് തമീം ബിൻ ഹമദ് ആൽഥാനിയുടെ നേതൃത്വത്തിൽ ഖത്തറിന് കൂടുതൽ പുരോഗതിയും വികസനവും കൈവരട്ടേയെന്ന് കിരീടവകാശിയും പ്രധാനമന്ത്രിയും സന്ദേശത്തിൽ വ്യക്തമാക്കി.
ദേശീയ ദിനത്തിൽ ആശംസകൾ അറിയിച്ച് ഒന്നാം ഉപപ്രധാനമന്ത്രിയും പ്രതിരോധ-ആഭ്യന്തര മന്ത്രിയുമായ ശൈഖ് ഫഹദ് യൂസഫ് അസ്സബാഹ് ഖത്തർ ഉപപ്രധാനമന്ത്രിയും പ്രതിരോധകാര്യ സഹമന്ത്രിയുമായ ശൈഖ്സൗദ് ബിൻ അബ്ദുൽറഹ്മാൻ ആൽഥാനി, ആഭ്യന്തര മന്ത്രി ശൈഖ് ഖലീഫ ബിൻ ഹമദ് ആൽഥാനി എന്നിവർക്കും സന്ദേശം അയച്ചു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.