കുവൈത്ത്​ അമീർ ​ഫ്രഞ്ച്​ പ്രസിഡൻറിന്​ കത്തയച്ചു

കുവൈത്ത്​ സിറ്റി: കുവൈത്ത്​ അമീർ ശൈഖ്​ നവാഫ്​ അൽ അഹ്​മദ്​ അൽ ജാബിർ അസ്സബാഹ്​ ഫ്രഞ്ച്​ പ്രസിഡൻറ്​ ഇമ്മാനുവൽ മാക്രോണിന്​ കത്തയച്ചു. ഫ്രാൻസിലെ ചർച്ചിൽ തീവ്രവാദി കത്തി ആക്രമണത്തിൽ മൂന്നുപേർ കൊല്ലപ്പെട്ട സംഭവത്തെ അപലപിച്ചും ഇരകളുടെ ദുഃഖത്തിൽ പങ്കുചേർന്നുമാണ്​ കുവൈത്ത്​ ഭരണാധികാരി കത്തയച്ചത്​.

നിരപരാധികളെ ലക്ഷ്യമിട്ടുള്ള ആക്രമണങ്ങൾ മതമൂല്യങ്ങൾക്കും മാനവിക മൂല്യങ്ങൾക്കും എതിരായ കുറ്റകൃത്യമാണെന്ന്​ അമീർ കത്തിൽ ചൂണ്ടിക്കാട്ടി. കിരീടാവകാശി ശൈഖ്​ മിശ്​അൽ അൽ അഹ്​മദ്​ അൽ ജാബിർ അസ്സബാഹ്​, പ്രധാനമന്ത്രി ശൈഖ്​ സബാഹ്​ ഖാലിദ്​ അൽ ഹമദ്​ അസ്സബാഹ്​ എന്നിവരും രണ്ട്​ വ്യത്യസ്​ത സന്ദേശങ്ങളിൽ തീവ്രവാദി ആക്രമണത്തെ അപലപിച്ചു.

പ്രവാചകനെ അവഹേളിക്കുന്ന കാർട്ടൂൺ വിവാദത്തിൽ ഫ്രാൻസി​െൻറ ഒൗദ്യോഗിക നിലപാടിനെതിരെ കുവൈത്ത്​ വിദേശകാര്യ മന്ത്രാലയം പ്രസ്​താവന ഇറക്കിയതിന്​ പിന്നാലെയാണ്​ കുവൈത്ത്​ അമീറി​െൻറ കത്ത്​.

കാർട്ടൂൺ വിവാദത്തെ തുടർന്ന്​ ഫ്രഞ്ച്​ ഉൽപന്നങ്ങൾ ബഹിഷ്​കരിക്കാനാവശ്യപ്പെട്ട്​ കുവൈത്ത്​ ഉൾപ്പെടെ രാജ്യങ്ങളിൽ ഹാഷ്​ടാഗ്​ കാമ്പയിൻ നടക്കുന്നുണ്ട്​.