ഗൂബ്രയിൽ ഒമാൻ-തായ്ലൻഡ് മത്സരം ടി.വിയിലൂടെ കാണുന്ന ഒമാൻ ആരാധകർ - വി.കെ. ഷെഫീർ
മസ്കത്ത്: ഖത്തറിൽ നടന്നുകൊണ്ടിരിക്കുന്ന ഏഷ്യൻ കപ്പിലെ ഒമാന്റെ മോശം പ്രകടനത്തിൽ രോഷംകൊണ്ട് ആരാധർ. ആദ്യ മത്സരത്തിൽ സൗദിയോട് തോറ്റതിനു പിന്നാലെ കഴിഞ്ഞ ദിവസം നടന്ന നിർണായക മത്സരത്തിൽ തായ്ലൻഡിനെതിരെ സമനിലകൂടി വഴങ്ങിയതോടെയാണ് ആരാധകരുടെ പ്രതിഷേധ കുറിപ്പുകൾ സമൂഹമാധ്യമങ്ങളിൽ പ്രത്യക്ഷപ്പെട്ടു തുടങ്ങിയത്. ഒമാൻ ഫുട്ബാൾ അസോസിയേഷൻ ചെയർമാൻ സലിം അൽ വഹൈബി രാജിവെക്കണമെന്നും കോച്ച് ബ്രാങ്കോ ഇവാൻകോവിച്ചിനെ പുറത്താക്കണമെന്നുമാണ് ആരാധകർ പറയുന്നത്. സലിം അൽ വഹൈബി രാജിവെക്കണമെന്ന അറബി ഹാഷ്ടാഗ് ഇതിനകം ട്രൻഡിങ്ങാണ് സമൂഹമാധ്യമങ്ങളിൽ. ലോകകപ്പ് യോഗ്യതാ മത്സരങ്ങളിലെയും ലോകകപ്പിനു ഏതാനും ദിവസംമുമ്പ് ജർമൻ ടീമിനെ നാണംകെടുത്തിയ ഒമാന്റെ ടീമും എവിടെയാണെന്ന് ഖത്തർ കമാന്റേറ്റർ യൂസഫ് സെയ്ഫ് ചോദിക്കുന്നു. നിലവിലുള്ള ടീമിന്റെ പ്രകടനം
അത്ഭുതപ്പെടുത്തുന്നതാണെന്നും അദ്ദേഹം പറഞ്ഞു. ഒമാൻ പുതിയ പരിശീലകനെ അന്വേഷിക്കണമെന്നാണ് പ്രശസ്ത ഒമാനി ഫുട്ബാൾ കമാന്റേറ്റർ സലിം അൽ ഹബ്സി പറഞ്ഞത്. ഷബീബ എഫ്.എമ്മിന് നൽകിയ അഭിമുഖത്തിലാണ് ഇക്കാര്യം പറഞ്ഞത്. അതേസമയം, കോച്ചിനെ പുറത്താക്കൽ അത്ര എളുപ്പമാകില്ലെന്നാണ് പ്രമുഖ സ്പോർട്സ് കമാന്റേറ്റർ ഖമീസ് അൽ ബലൂഷി അഭിപ്രായപ്പെട്ടത്. അദ്ദേഹത്തെ പറഞ്ഞയക്കുകയാണെങ്കിൽ ഒ.എഫ്.എ മൂന്ന് ശമ്പളം മുൻകൂറായി കോച്ചിന് നൽകണം. ഇത് അര മില്യൺ ഡോളർ വരും. കരാറിന് മുമ്പ് ഏതെങ്കിലും കക്ഷികൾ അത് അവസാനിപ്പിക്കാൻ ആഗ്രഹിക്കുന്നെന്ന് ഞാൻ കരുതുന്നില്ലെന്നും അദ്ദേഹം എക്സിൽ കുറിച്ചു.
ഞായറാഴ്ച ദോഹയിലെ അബ്ദുല്ല ബിൻ ഖലീഫ സ്റ്റേഡിയത്തിൽ നടന്ന കളിയിൽ തായ്ലൻഡിനെതിരെ ഗോൾരഹിത സമനില വഴങ്ങിയതോടെയാണ് ഒമാന്റെ പ്രീ ക്വാർട്ടർ പ്രവേശനത്തിനു മങ്ങലേറ്റത്. തായ്ലൻഡിനെതിരെ ആക്രമിച്ചു കളിക്കുക എന്ന തന്ത്രമായിരുന്നു ഒമാൻ സ്വീകരിച്ചിരുന്നത്. എന്നാൽ, ഫിനിഷിങ്ങിലെ പാളിച്ചകൾ തിരിച്ചടിയായി. ഇരു പകുതിയിലും മികച്ച അവസരങ്ങൾ ലഭിച്ചിരുന്നെങ്കിലും ലക്ഷ്യം കാണുന്നതിൽ ബ്രാങ്കോ ഇവോകോവിച്ചിന്റെ കുട്ടികൾ പരാജയപ്പടുകയായിരുന്നു. ഇടത് വലത് വിങ്ങുകളിലൂടെ ആക്രമണം കനപ്പിച്ചെങ്കിലും തായ്ലൻഡിന്റെ പ്രതിരോധകോട്ട പൊളിച്ചു മുന്നേറാൻ ഇരുപകുതിയിലും ഒമാന് മുന്നേറാനായില്ല.
പ്രീ ക്വർട്ടർ പ്രവേശനത്തിന് ഇനി രണ്ട് സാധ്യതകളാണ് ഒമാന് മുന്നിലുള്ളത്. ഇതിൽ ഒന്നാമത്തേത് ജനുവരി 25ന് കിർഗിസ്ഥാനെതിരെ മികച്ച മാർജനിൽ ജയിക്കുകയും ഒപ്പം ഭാഗ്യവും തുണച്ചാൽ മികച്ച മൂന്നാംസ്ഥാനക്കാരായി കയറികൂടാം. എന്നാൽ, ആറു ഗ്രൂപ്പുകളിൽനിന്ന് നാല് ടീമുകൾക്കെ ഈ അവസരം ലഭിക്കുകയൊള്ളു. കഴിഞ്ഞ ഏഷ്യൻ കപ്പിലും ഒമാൻ ഇപ്രകാരമായിരുന്നു പ്രീകോർട്ടറിൽ കയറിയിരുന്നത്. മറ്റൊരു സാധ്യത, തായ്ലൻഡിന്റെ അവസാന മത്സരം സൗദിക്കെതിരെയാണ്. ഇതിൽ തായ്ലൻഡ് തോൽക്കണം. ഒപ്പം അവസാന മത്സരത്തിൽ കിർഗിസ്താനെ ഒമാൻ വൻമാർജനിൽ പരാജയപ്പെടുത്തുകയും ചെയ്താൽ റെഡ്വാരിയേഴ്സിനും തായ്ലൻഡിനും തുല്യപോയന്റാകും. ഗോൾ ശരാശരിയിൽ തായ്ലൻഡിനെ മറികടക്കുകയാണെങ്കിൽ ഒരുപക്ഷേ ഒമാന് രണ്ടാം സ്ഥാനക്കാരായി നേരിട്ടും കയറികൂടാനാകും. ഗ്രൂപ് എഫിൽ രണ്ട് കളിയിൽനിന്ന ആറുപോയന്റുമായി സൗദി പ്രീ ക്വാർട്ടർ ഉറപ്പിച്ചിട്ടുണ്ട്. നാല് പോയന്റുമായി തായ്ലൻഡാണ് രണ്ടാം സ്ഥാനത്ത്. മൂന്നും നാലും സ്ഥാനങ്ങളിൽ യഥാക്രമം ഒമാനും കിർഗിസ്താനുമാണുള്ളത്.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.