12ാം ക്ലാസ്​ വിദ്യാർഥികളുടെ കുത്തിവെപ്പ്​ തുടങ്ങി

മസ്​കത്ത്​: അവസാന വർഷ പരീക്ഷക്ക്​ ഒരുങ്ങുന്ന 12ാം ക്ലാസ്​ വിദ്യാർഥികളുടെ കോവിഡ്​ പ്രതിരോധ കുത്തിവെപ്പ്​ ആരംഭിച്ചു. രാജ്യത്തെ മുഴുവൻ ഗവർണറേറ്റുകളിലും വാക്​സിൻ വിതരണം നടക്കുന്നുണ്ട്​. അടുത്ത രണ്ടാഴ്​ച കാമ്പയിൻ തുടരുമെന്ന്​ ആരോഗ്യ മന്ത്രാലയം വക്​താവ്​ അറിയിച്ചു. വിദ്യാഭ്യാസ മന്ത്രാലയവുമായി ചേർന്നാണ്​ കാമ്പയിൻ പൂർത്തീകരിക്കുക.

പരീക്ഷ പരിഗണിച്ചാണ്​ ജനറൽ ഡിപ്ലോമ വിദ്യാർഥികളെ കുത്തിവെപ്പി​െൻറ മുൻഗണന പട്ടികയിൽ ഉൾപ്പെടുത്തിയത്​. രാജ്യത്ത്​ നിലവിൽ പ്രായമായവരും രോഗികളും ആരോഗ്യപ്രവർത്തകരും സുരക്ഷാ മേഖലയിൽ ജോലി ചെയ്യുന്നവരും മാത്രമാണ്​ മുൻഗണന പട്ടികയിലുള്ളത്​. എന്നാൽ പ്ര​ത്യേക പരിഗണന നൽകിയാണ്​ വിദ്യാർഥികളെ ഇതിൽ ഉൾപ്പെടുത്തിയത്​. പരീക്ഷക്ക്​ നേതൃത്വം നൽകുന്ന അധ്യാപകരും അനധ്യാപക ജീവനക്കാര​ും മൂല്യനിർണയത്തിന്​ വരുന്നവും കുത്തിവെപ്പ് സ്വീകരിക്കണം. നിലവിൽ രണ്ട്​​ ലക്ഷത്തിലേറെ പേർക്കാണ്​ രാജ്യത്ത്​ ആകെ കുത്തിവെപ്പ് നൽകിയത്​. അടുത്ത മാസം 15 ലക്ഷം പേർക്ക്​ കുത്തിവെപ്പ്​ നൽകാനാണ്​ സർക്കാർ പദ്ധതിയിട്ടിരിക്കുന്നത്​.