സ്​തനാർബുദ ഗവേഷണം:​ സഹായവുമായി ഖത്തർ എയർവേസ്​ ജീവനക്കാർ

ദോഹ: സ്​തനാർബുദ ബോധവത്കരണ മാസാചരണത്തിന്‍റെ ഭാഗമായി അർബുദ ഗവേഷണത്തിനുള്ള സാമ്പത്തിക പിന്തുണ നൽകുന്നതിന് ഖത്തർ എയർവേസ്​ ജീവനക്കാർ പിരിച്ചത് 287,000 റിയാൽ.

'തിങ്ക് പിങ്ക്' പ്രമേയമായി സ്​തനാർബുദ ബോധവത്കരണ മാസാചരണവുമായി ബന്ധപ്പെട്ട് ഖത്തർ കാൻസർ സൊസൈറ്റിക്ക് സഹായവുമായാണ് ഖത്തർ എയർവേസ്​ ഗ്രൂപ് ജീവനക്കാർ രംഗത്തെത്തിയത്.

സ്​തനാർബുദ മാസാചരണത്തിന്റെ ഭാഗമായി ജീവനക്കാർക്കിടയിൽ മെഡിക്കൽ ജീവനക്കാരുടെ സഹകരണത്തോടെ വ്യത്യസ്​തമായ പരിപാടികളും സംഘടിപ്പിച്ചു. ഗ്രൂപ്പിലെ വനിത ജീവനക്കാർക്കായി കിങ് ഹുസൈൻ കാൻസർ ഫൗണ്ടേഷൻ ആൻഡ് സെൻററുമായി സഹകരിച്ച് പ്രത്യേക ബോധവത്കരണ പരിപാടിയും ശിൽപശാലയും നടത്തി. ജീവനക്കാർക്ക് സൗജന്യ അൾട്രാ സൗണ്ട് സ്​കാൻ ചെക്കപ്പും കാമ്പയിന്റെ ഭാഗമായി നടത്തി. നിരന്തര പരിശോധന, നേരത്തേ രോഗം കണ്ടെത്തി കാൻസറിനെ പ്രതിരോധിക്കൽ തുടങ്ങിയവയുടെ പ്രാധാന്യം വിശദീകരിച്ച് ബോധവത്കരണ സന്ദേശങ്ങളും ജീവനക്കാർക്കിടയിൽ പ്രചരിപ്പിച്ചു. റൈഡ് ഫോർ പിങ്ക് സ്​പിൻ ബൈക്ക് ചാലഞ്ച്, വനിതകൾക്കായുള്ള യോഗ സെഷൻ, ചാരിറ്റി ബസാർ, ബേക്ക് സെയിൽ ഫണ്ട് റെയ്സിങ് ഇവൻറ്, ഹാൻഡ് മെയ്ഡ് പെയിൻറിങ്സ്​ ആൻഡ് ആർട്ട്വർക്ക്, ഹെന്ന ഡിസൈൻസ്​, ഫുഡ് സ്​റ്റേഷൻ, പ്രശ്നോത്തരി, ലേലം, റാഫിൾ ഡ്രോ തുടങ്ങിയ വ്യത്യസ്​ത പരിപാടികളും ഖത്തർ എയർവേസ്​ ഗ്രൂപ് ജീവനക്കാർക്കായി നടത്തി.

തുടർച്ചയായ ഏഴാം വർഷമാണ് ഖത്തർ എയർവേസ്​ സ്​തനാർബുദ ബോധവത്കരണ മാസാചരണ ഭാഗമാകുന്നതെന്ന് ഗ്രൂപ് സി.ഇ.ഒ അക്ബർ അൽ ബാകിർ പറഞ്ഞു. ഖത്തർ എയർവേസ്​ കുടുംബം ഒരിക്കൽക്കൂടി സ്​തനാർബുദ പ്രതിരോധ മേഖലയിൽ അതിന്റെ പ്രതിബദ്ധത ഉയർത്തിപ്പിടിച്ചിരിക്കുകയാണ്. കോവിഡ് മഹാമാരി ഉയർത്തിയ വെല്ലുവിളികൾക്കിടയിലും ഗ്രൂപ് ജീവനക്കാർ വലിയൊരു തുക ഖത്തർ കാൻസർ സൊസൈറ്റിക്കായി ശേഖരിച്ചിരിക്കുകയാണെന്നും അൽ ബാകിർ കൂട്ടിച്ചേർത്തു.

തങ്ങളുടെ ബ്ലോസം കാമ്പയിന് അകമഴിഞ്ഞ പിന്തുണ നൽകിയ ഖത്തർ എയർവേസ്​ ഗ്രൂപ്പിന് നന്ദി അറിയിക്കുകയാണെന്ന് ഖത്തർ കാൻസർ സൊസൈറ്റി ചെയർമാൻ ശൈഖ് ഡോ. ഖാലിദ് ബിൻ ജബർ ആൽഥാനി പറഞ്ഞു.