ദോഹ: 30 ദിവസത്തേക്ക് അൺലിമിറ്റഡ് യാത്രാവാഗ്ദാനവുമായി ദോഹ മെട്രോ, ലുസൈൽ ട്രാമിന്റെ മെട്രോ പാസ്. 120 റിയാൽ നിരക്കുള്ള യാത്രാപാസിൽ ഒരു മാസക്കാലത്തേക്ക് പരിധിയില്ലാതെ ദോഹ മെട്രോയും ലുസൈൽ ട്രാമും ഉപയോഗിക്കാമെന്ന് ഖത്തർ റെയിൽ അധികൃതർ അറിയിച്ചു.
പൊതുജനങ്ങൾക്ക് ദോഹ മെട്രോ ഉപയോഗം കൂടുതൽ ആകർഷകമാക്കുന്നതിന്റെ ഭാഗമായാണ് 30 ദിവസ യാത്രാപാസ് പ്രഖ്യാപിക്കുന്നത്. 120 റിയാലിന്റെ യാത്രാപാസ് ആദ്യ തവണ ടാപ് ചെയ്തത് മുതൽ 30 ദിവസമായിരിക്കും കാലാവധി. സ്റ്റാൻഡേഡ് കോച്ചുകളിൽ ഒരു യാത്രക്ക് രണ്ടു റിയാലാണ് ഈടാക്കുന്നത്. ഗോൾഡ് ക്ലബിൽ പത്ത് റിയാലും. അതേസമയം, ആറ് റിയാലിന്റെ ഡേ പാസ് വഴി ഒരു ദിവസം മുഴുവൻ യാത്ര ചെയ്യാൻ കഴിയും.
ഗോൾഡ് ക്ലബ് യാത്രക്ക് 30 റിയാലാണ് ഡേ പാസിന്റെ നിരക്ക്. പത്ത് റിയാൽ മുടക്കി ട്രാവൽ കാർഡ് വാങ്ങി ടോപ്അപ് ചെയ്ത് യാത്ര ചെയ്യാവുന്നതാണ്. നിലവിലെ ഈ യാത്രാപ്ലാനുകൾക്ക് പുറമേയാണ് പതിവായി മെട്രോ, ട്രാം സർവിസുകളെ ആശ്രയിക്കുന്നവർക്ക് കൂടുതൽ ആശ്വാസമാവുന്ന 30 ദിന അൺ ലിമിറ്റഡ് മെട്രോ പാസ് അധികൃതർ അവതരിപ്പിക്കുന്നത്.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.