സാമ്പത്തിക വൈവിധ്യവത്​കരണം: നിർണായക ശക്തിയായി ഉൽപാദന മേഖല

ദോഹ: രാജ്യത്തിെൻെറ സാമ്പത്തിക വൈവിധ്യവത്​കരണ പ്രക്രിയയിൽ ഉൽപാദന മേഖല നിർണായക ശക്തിയാകുന്നു. കെ. പി.എം. ജി റിപ്പോർട്ടിലാണ്​ ഇതുമായി ബന്ധപ്പെട്ട വിവരങ്ങൾ ഉള്ളത്​. ഖത്തർ നാഷനൽ വിഷൻ 2030​െൻറ ഭാഗമായി വികസന മേഖലയിലെ സുസ്​ഥിരതയും ജനങ്ങളുടെ ഉയർന്ന ജീവിതനിലവാരവും സാധ്യമാക്കുന്നതിന്​ ഉൽപാദന മേഖലക്ക്​ വൻ പ്രാധാന്യമാണുള്ളത്​. ഹൈഡ്രോകാർബണെ മാത്രം ആശ്രയിച്ചുള്ള സമ്പദ്​വ്യവസ്​ഥയിൽ നിന്നും സാമ്പത്തിക വൈവിധ്യവത്​കരണത്തിലൂന്നിയുള്ള സമ്പദ്​വ്യവസ്​ഥയാണ് ഖത്തർ ദേശീയനയം ലക്ഷ്യമിടുന്നത്. വിവരാധിഷ്ഠിത സാമ്പത്തിക വ്യവസ്​ഥയിലേക്കുള്ള നിക്ഷേപത്തി െൻറ ചലനവും സ്വകാര്യ മേഖലയുടെ വളർച്ചയും ഇതിൽ പ്രധാന പങ്കുവഹിക്കും.

മാലിന്യവും മറ്റും പുനഃചംക്രമണം ചെയ്യുന്ന മേഖലയിൽ നിലവിൽ 135 വ്യവസായ ശാലകളാണ് പ്രവർത്തിച്ചുകൊണ്ടിരിക്കുന്നത്. 215 ഉൽപന്നങ്ങളാണ് ഇവിടെനിന്ന്​ ഉൽപാദിപ്പിക്കുന്നത്. 62 ഫാക്ടറികളിൽനിന്നായി 78 പേപ്പർ ഉൽപന്നങ്ങളും ഉൽപാദിപ്പിക്കുന്നുണ്ടെന്നും വാണിജ്യ വ്യവസായ മന്ത്രാലയം പുറത്തുവിട്ട റിപ്പോർട്ടുകളിൽ വ്യക്തമാക്കുന്നു. കഴിഞ്ഞ വർഷം ഉൽപാദന മേഖലയിൽ നിന്നുള്ള മാലിന്യങ്ങൾ റീസൈക്ലിങ് ചെയ്തതിലൂടെ 434000 ടൺ കെട്ടിട നിർമാണ വസ്​തുക്കളാണ് ഉൽപാദിപ്പിച്ചത്​. 482402 ടയറുകൾ പുനരുൽപാദിപ്പിച്ചതായി മുനിസിപ്പാലിറ്റി പരിസ്​ഥിതി മന്ത്രാലയം നേരത്തേ പുറത്തുവിട്ടിരുന്നു.

നിർമാണ സാമഗ്രികൾക്കും കെമിക്കൽ ഉൽപന്നങ്ങൾക്കുമായി 281 ഫാക്ടറികളാണ് ഖത്തറിൽ പ്രവർത്തിക്കുന്നത്. 392 ഉൽപന്നങ്ങൾ ഇവിടെനിന്ന്​ ഉൽപാദിപ്പിക്കുന്നു. അഞ്ച് ഫാക്ടറികളിൽ നിന്നായി 22 മെഡിക്കൽ ഉൽപന്നങ്ങളും ഉൽപാദിപ്പിക്കുന്നുണ്ട്. പെട്രാേളിയം പെട്രാേകെമിക്കൽ മേഖലയിൽ 28 ഫാക്ടറികൾ പ്രവർത്തിക്കുന്നുണ്ട്. 64 ഉൽപന്നങ്ങളാണ് ഈ മേഖലയിൽനിന്ന്​ ഉൽപാദിപ്പിക്കപ്പെടുന്നത്.

ഉരുക്ക് മേഖലയിൽ 179 ഫാക്ടറികളിൽ നിന്നായി 291 ഉൽപന്നങ്ങളും ഖത്തറിൽ ഉണ്ടാക്കുന്നുണ്ട്. ഗാർമെൻറ്സ്​, തുണിത്തര മേഖലയിൽ 42 ഉൽപന്നങ്ങളാണ് 15 വ്യവസായശാലകളിൽ നിന്നുമായി ഉൽപാദിപ്പിക്കുന്നത്​. പ്രാദേശിക ഉൽപാദകരെ പിന്തുണക്കുന്നതിനുള്ള ഖത്തർ ഗവൺമെൻറിൻെറ ശ്രമങ്ങൾ രാജ്യത്തിൻെറ ഉൽപാദക മൂല്യം വർധിപ്പിക്കുന്നതിന് ഇടയാക്കിയിട്ടുണ്ട്. അടുത്ത ഏതാനും വർഷങ്ങൾക്കുള്ളിൽ ഇത് 30 ശതമാനമായി ഉയരുമെന്നും കെ.പി.എം.ജി പുറത്തുവിട്ട റിപ്പോർട്ടുകളിൽ വ്യക്തമാക്കുന്നു.