ഖത്തറിലെ ആദ്യയാത്രക്കാരിൽ ഗർഭിണികളും അടിയന്തരചികിൽസ ആവശ്യമുള്ളവരും

ദോഹ: ഖത്തറിൽനിന്ന് നാട്ടിലേക്ക്​ മടങ്ങുന്ന ആദ്യസംഘത്തിലെ യാത്രക്കാരിൽ ഗർഭിണികളും  അടിയന്തര ചികിത്സ ആവശ്യമുള്ള രോഗികളും പ്രായമായവരും. ദോഹയിലെ ഇന്ത്യൻ എംബസിയിൽ  ആദ്യഘട്ടത്തിൽ പേര്​ രജിസ്​റ്റർ ചെയ്​ത 40000 പേരിൽനിന്ന്​ തെരഞ്ഞെടുത്ത 400 പേരെയാണ്​ ആദ്യ ആഴ്​ ചയിൽ രണ്ട്​ വിമാനങ്ങളിലായി അയക്കുന്നത്​. 

കൂടുതൽ വിമാനങ്ങൾ ഖത്തറിലേക്ക്​ അനുവദിക്കാൻ ശ്രമങ്ങൾ നടത്തിവരികയാണെന്ന്​ ഇന്ത്യൻ എംബസി അധികൃതർ ‘ഗൾഫ്​മാധ്യമ’ത്തോട്​ പറഞ്ഞു. രജിസ്​റ്റർ  ചെയ്​തവരിൽ 25000ലധികവും മലയാളികളാണ്​. കൊച്ചിയിലേക്കുള്ള യാത്രക്കാരെ വഹിച്ചുകൊണ്ടുള്ള ആദ്യ വിമാനം പോകുന്നത് മേയ് ഏഴിൽനിന്ന് ഒമ്പതിലേക്കു മാറ്റിയിരുന്നു. 

ഒമ്പതിന് ഖത്തർ സമയം ഏഴിനായിരിക്കും  എയർ ഇന്ത്യ വിമാനം പുറപ്പെടുക. ആദ്യ യാത്രക്കുള്ളവരുടെ ടിക്കറ്റ് വിതരണം അബുഹമൂറിലെ ഇന്ത്യൻ  കൾച്ചറൽ സ​​െൻററിലാണ്​ നടത്തിയത്​. എയർഇന്ത്യയുടെ കൗണ്ടർ ഇവിടെ സജ്ജീകരിക്കുകയായിരുന്നു. 

ആദ്യ  യാത്രയിൽ 200 പേ​രെയാണ്​ കൊണ്ടുപോവുക. ഇതിൽ പ്രസവമടുത്ത ഗർഭിണികളാണ്​ കൂടുതലും. ഇവർക്കൊപ്പം മറ്റൊരാളെയും കുട്ടികളെയും അനുവദിച്ചിട്ടുണ്ട്​. പിന്നീടുള്ള യാത്രക്കാരിലധികവും വിവിധ  അസുഖങ്ങളുള്ള ആളുകളാണ്​. 
ഹൃദ്രോഗം, കാൻസർ പോലുള്ള അസുഖങ്ങൾക്ക്​ നാട്ടിൽ അടിയന്തര  ചികിത്സ ആവശ്യമുള്ളവരാണിവർ. ഇവർ മിക്കവരും 60 വയസിന്​ മുകളിൽ പ്രായമുള്ളവരാണ്​. 

വിസിറ്റ്​  വിസയിൽ വന്ന്​ കുടുങ്ങിപ്പോയവരുമുണ്ട്​. 155ലധികം ടിക്കറ്റുകൾ ആദ്യദിവസം തന്നെ യാത്രക്കാർ  കൈപറ്റി​. രജിസ്​റ്റർ ചെയ്​ത ചുരുക്കം ചിലർ ഇപ്പോൾ പോകുന്നില്ലെന്ന്​ അറിയിച്ചിട്ടുമുണ്ട്​. ഇന്ത്യൻ  എംബസിയിൽ നിന്നാണ്​ തെരഞ്ഞെടുത്ത യാത്രക്കാരെ വിവരമറിയിക്കുന്നത്​. മേയ് പത്തിന് മറ്റൊരു വിമാനം ദോഹയിൽ നിന്ന്​ തിരുവനന്തപുരം വിമാനത്താവളത്തിലേക്കുമുണ്ട്. ഇതിലും 200 യാത്രക്കാരെയാണ്  കൊണ്ടുപോകുന്നത്. 16000 രൂപയാണ്​ ടിക്കറ്റ്​ നിരക്ക്​. 
ഇത്​ യാത്രക്കാർ തന്നെ വഹിക്കണം. 

അതേസമയം ഖത്തറിൽ 146 പേർക്കുകൂടി ബുധനാഴ്​ച കോവിഡ്​ ഭേദമായിട്ടുണ്ട്​. ഇതോടെ ആകെ രോഗം  ഭേദമായവർ 2070 ആയി. ബുധനാഴ്​ച 830 പേർക്ക്​ കൂടി രോഗം ബാധിച്ചു​. 15890 പേരാണ്​ നിലവിൽ  ചികിൽസയിലുള്ളത്​. 112963 പേരെ ആകെ പരിശോധിച്ചപ്പോൾ 17972 പേർക്കാണ്​ വൈറസ്​ ബാധ സ്​ ഥിരീകരിച്ചത്​. മരിച്ചവരും രോഗം ഭേദമായവരും ഉൾ​െപ്പടെയാണിത്​. ആകെ 12 പേരാണ്​ മരിച്ചത്​.