കോവിഡ്​ വെല്ലുവിളിയിലും തുറമുഖങ്ങളിൽ ചരക്കുനീക്കത്തിൽ വർധന

ദോഹ: കോവിഡ് -19 ഉയർത്തുന്ന വെല്ലുവിളികൾക്കിടയിലും ആഗസ്​റ്റ് മാസത്തിൽ ഖത്തറിലെ തുറമുഖങ്ങളിലെ ചരക്കുനീക്കത്തിൽ വലിയ വർധനവ് രേഖപ്പെടുത്തിയതായി മവാനി ഖത്തർ.ഹമദ് തുറമുഖം, റുവൈസ്​ തുറമുഖം, ദോഹ തുറമുഖം എന്നിവിടങ്ങളിലാണ് ചരക്കുനീക്കത്തിൽ കഴിഞ്ഞ മാസം വർധനവുണ്ടായിരിക്കുന്നത്. മുൻ മാസത്തെ അപേക്ഷിച്ച് ആഗസ്​റ്റിൽ തുറമുഖങ്ങളിലൂടെയുള്ള വാഹനങ്ങളുടെ നീക്കത്തിൽ 18 ശതമാനം വർധനവ് രേഖപ്പെടുത്തി.

ആഗസ്​റ്റ് മാസത്തിൽ 4091 വാഹനങ്ങളാണ് തുറമുഖങ്ങളിൽ കൈകാര്യം ചെയ്തിരുന്നെങ്കിൽ ജൂലൈ മാസത്തിൽ ഇത് 3496 വാഹനങ്ങളായിരുന്നു.2019 ആഗസ്​റ്റ് മാസത്തെ അപേക്ഷിച്ച് 2020 ആഗസ്​റ്റിൽ തുറമുഖങ്ങളിലെ കണ്ടെയ്നർ നീക്കത്തിലും നാല്​ ശതമാനം വർധനവ് രേഖപ്പെടുത്തിയതായും മവാനി ഖത്തർ ട്വീറ്റ് ചെയ്തു. തുറമുഖങ്ങളിൽ 1,13,795 ടി.ഇ.യു (ട്വൻറി ഫൂട്ട് ഇക്വാലൻറ് യൂനിറ്റ്സ്​) കണ്ടെയ്നറുകളാണ് ഈ മാസം കൈകാര്യം ചെയ്യപ്പെട്ടത്. ജനറൽ കാർഗോ ഇനത്തിൽ 51,450 ടണും ബിൽഡിങ്​ മെറ്റീരിയൽ വിഭാഗത്തിൽ 27,833 ടണും കഴിഞ്ഞ മാസം തുറമുഖങ്ങളിലെത്തി. 263 കപ്പലുകളാണ് കഴിഞ്ഞ മാസം രാജ്യത്തെ തുറമുഖങ്ങളിലായി നങ്കൂരമിട്ടത്.

കടുത്ത പ്രതിസന്ധികൾക്കിടയിലും ചരക്കുനീക്കത്തിൽ മികച്ച പ്രകടനമാണ് ഖത്തറിലെ തുറമുഖങ്ങൾ ഈ വർഷം കാഴ്ചവെച്ചത്.ജനറൽ കാർഗോ ഇനത്തിൽ കഴിഞ്ഞ വർഷത്തെ അപേക്ഷിച്ച് ഈ വർഷം ആദ്യത്തെ ആറുമാസം 102 ശതമാനം വർധനവാണ് രേഖപ്പെടുത്തിയത്. ഈ വർഷം ആദ്യപകുതിയിൽ മൂന്ന് തുറമുഖങ്ങളിലുമായി എത്തിയത് 1509 കപ്പലുകളാണ്. ജനറൽ കാർഗോ ഇനത്തിൽ 7,27,716 ടൺ ഈ വർഷം ആദ്യ പകുതിയിൽ തുറമുഖങ്ങളിലെത്തിയിട്ടുണ്ട്. കഴിഞ്ഞ വർഷം ഇതേ കാലയളവിൽ തുറമുഖത്തെത്തിയിരുന്നത് 3,60,644 ടൺ ആയിരുന്നു. രാജ്യത്തി​െൻറ സാമ്പത്തിക വൈവിധ്യ പ്രക്രിയയിൽ ഹമദ് തുറമുഖം വലിയ പങ്കാണ് വഹിച്ചുകൊണ്ടിരിക്കുന്നത്.

കാലികൾ, ഓട്ടോമൊബൈൽ, ധാന്യങ്ങൾ എന്നിവയുടെ ഇറക്കുമതിയിൽ ഹമദ് തുറമുഖം നിർണായക സാന്നിധ്യമായി പ്രവർത്തിക്കുന്നുണ്ട്.കോവിഡ് -19 പശ്ചാത്തലത്തിൽ വൈറസ്​ പടർന്നുപിടിക്കാതിരിക്കാൻ പൊതുജനാരോഗ്യ മന്ത്രാലയം ഉൾപ്പെടെയുള്ള അതോറിറ്റികളുമായി സഹകരിച്ച് ശക്തമായ മുൻകരുതൽ, പ്രതിരോധ നടപടികളാണ് മവാനി ഖത്തർ സ്വീകരിച്ചിരിക്കുന്നത്. കണ്ടെയ്നറുകളുടെ അണുനശീകരണം, തെർമൽ കാമറ സ്​ഥാപിക്കൽ, തൊഴിലാളികളുടെയും ജീവനക്കാരുടെയും എണ്ണം കുറക്കൽ തുടങ്ങി കർശന നിയന്ത്രണങ്ങളും മുൻകരുതലുകളും തുറമുഖങ്ങളിൽ നടപ്പാക്കിയിട്ടുണ്ട്.