ഇന്നുമുതൽ സ്കൂളുകൾ സജീവം

ദോഹ: കോവിഡ്​ കേസുകൾ കുത്തനെ കുറയുകയും നിയന്ത്രണങ്ങളിലെ ഇളവുകൾ പ്രാബല്യത്തിലാവുകയും ചെയ്തതിനു പിന്നാലെ ഇന്ന്​ മുതൽ സ്കൂൾ ക്ലാസ്​ മുറികളും സജീവമാകുന്നു.

അർധവാർഷിക അവധിക്കു പിന്നാലെ ക്ലാസുകൾ പുനരാരംഭിക്കാനുള്ള ഒരുക്കത്തിനിടെയാണ്​ ഒമിക്രോൺ കേസുകൾ ഉയർന്നു തുടങ്ങിയത്​.

ഇതോടെ, ആദ്യ ഘട്ടത്തിൽ ഒരാഴ്ചയും പിന്നീട്​ ജനുവരി 27 വരെയും പൊതു-സ്വകാര്യ സ്കൂളുകളിലെ ക്ലാസുകൾ ഓൺലൈനിലായി.

ഇപ്പോ​ൾ രോഗവ്യാപനം കുറഞ്ഞ പശ്ചാത്തലത്തിലാണ്​ വീണ്ടും പഠനം ക്ലാസ് മുറികളിലേക്ക്​ തിരികെയെത്തുന്നത്​. ഉന്നത വിദ്യാഭ്യാസ മന്ത്രാലയവും ആരോഗ്യ മന്ത്രാലയവും നിർദേശിച്ച മാനദണ്ഡങ്ങൾ പാലിച്ച്​ ക്ലാസുകൾ തുടങ്ങാൻ ഒരുങ്ങിയതായി സ്കൂൾ മേധാവികൾ പറഞ്ഞു. ചില രക്ഷിതാക്കൾ സമൂഹ മാധ്യമങ്ങളിൽ ആ​ശങ്ക പങ്കുവെച്ചെങ്കിലും കാര്യമായ സുരക്ഷയോടെയാണ്​ സ്കൂളുകൾ പ്രവർത്തനം ആരംഭിക്കുന്നത്​. കിൻഡർ ഗാർട്ടൻ മുതൽ എല്ലാ ക്ലാസുകളിലും ഇന്ന്​ മുതൽ സ്കൂളുകളിൽ തന്നെ പഠനം തുടങ്ങും. 11, 12 ക്ലാസുകളിൽ നേരത്തെ തന്നെ ചില സ്കൂളുകളിൽ നേരിട്ട്​ പഠനം തുടർന്നിരുന്നു. 100 ശതമാനം ശേഷിയോടെയാണ്​ സ്കൂളുകൾ സജീവമാകുന്നത്​.

മാസ്ക്​ അണിയൽ, സാമൂഹിക അകലം പാലിക്കൽ, സാനിറ്റൈസ്​ ചെയ്യൽ തുടങ്ങിയ കോവിഡ്​ പ്രതിരോധ പ്രവർത്തനങ്ങൾക്കൊപ്പം റാപ്പിഡ്​ ആന്‍റിജെൻ പരിശോധനാ ഫലവും വിദ്യാർഥികൾ കരുതണം.

ഇതുസംബന്ധിച്ച മാർഗനിർദേശങ്ങളും സാക്ഷ്യപത്രത്തിന്‍റെ മാതൃകയും മന്ത്രാലയം നേരത്തെ പുറത്തിറക്കിയിരുന്നു.

ആഴ്ചയിൽ ഒരിക്കൽ എന്ന തോതിൽ, ആദ്യ രണ്ട്​ ആഴ്ച ഹോം കിറ്റ്​ ഉപയോഗിച്ച്​ പരിശോധന നടത്താനാണ്​ നിർദേശം. തുടർന്ന്​ കോവിഡ്​ വ്യാപനം വിലയിരുത്തിയ ശേഷം തീരുമാനമെടുക്കും. വാക്സിൻ എടുത്തവരും കോവിഡ്​ വന്ന്​ ഭേദമായവരും വാക്സിൻ സ്വീകരിക്കാത്തവരും ഉൾപ്പെടെ എല്ലാ വിദ്യാർഥികളും ആന്‍റിജെൻ പരിശോധന നടത്തണം. വെള്ളി, ശനി ദിവസങ്ങളിൽ പരിശോധന നടത്തി നെഗറ്റിവാണെന്ന രക്ഷിതാവിന്‍റെ സാക്ഷ്യപത്രവുമായാണ്​ കുട്ടികൾക്ക്​ പ്രവേശനം നൽകൂ. പോസിറ്റിവാണെങ്കിൽ അടുത്ത ഹെൽത്ത്​ സെന്‍ററിലെത്തി പരിശോധന നടത്തണം. സ്കൂളുകളിൽ ഞായറാഴ്ച മുതൽ ഹാജർ രേഖപ്പെടുത്താനും ആരംഭിക്കും.

കോവിഡ്​ നിയന്ത്രണങ്ങളിൽ നൽകിയ ഇളവുകൾ ശനിയാഴ്ച മുതൽ പ്രാബല്യത്തിൽ വന്നു. കുട്ടികൾക്ക്​ പള്ളിയിൽ പ്രവേശനം, മാളുകളിൽ എല്ലാവിഭാഗം ആളുകൾക്കും ​പ്രവേശനാനുമതി, ദോഹ മെട്രോ ഉൾപ്പെടെ ​പൊതുഗതാഗത സർവിസുകളിൽ 75 ശതമാനം ശേഷിയിൽ പ്രവേശനം തുടങ്ങിയ ഇളവുകളാണ്​ ഇത്​.