ദമ്മാം, ഖത്തീഫ് നഗരങ്ങളിലെ പൊതു ഗതാഗത ബസ് സർവിസ് ഉദ്ഘാടനം അമീർ സൗദ് ബിൻ നായിഫ് നിർവഹിക്കുന്നു
ജുബൈൽ: ദമ്മാം, ഖത്തീഫ് നഗരങ്ങളിലെ പൊതു ഗതാഗത ബസ് നിരക്ക് 3.45 റിയാലായി നിശ്ചയിച്ചു. കിഴക്കൻ പ്രവിശ്യയിലെ ആദ്യ യാത്രയും ദമ്മാം കോർണിഷ് ഉൾപ്പെടെ നിരവധി വികസനപദ്ധതികളും അമീർ സൗദ് ബിൻ നായിഫ് ഉദ്ഘാടനം ചെയ്തു. കിഴക്കൻ പ്രവിശ്യയിലെ നഗരങ്ങളെ മാനുഷികമാക്കുന്നതിനും അവിടത്തെ ജീവിതനിലവാരം ഉയർത്തുന്നതിനും ഗതാഗതം സുഗമമാക്കുന്നതിനും പദ്ധതി ലക്ഷ്യമിടുന്നു.
അഞ്ച് വർഷത്തേക്ക് സൗദി പബ്ലിക് ട്രാൻസ്‌പോർട്ട് കമ്പനിയുമായി (സാപ്‌റ്റ്‌കോ) 149.6 മില്യൺ ഡോളറിന്റെ പൊതു ബസ് ഗതാഗത കരാർ ഒപ്പിട്ടുകഴിഞ്ഞു. ദമ്മാമിലെ പ്രധാന സ്റ്റേഷനിൽ നിന്ന് ദമ്മാം, അൽഖോബാർ, ദഹ്‌റാൻ, ഖത്തീഫ് നഗരങ്ങൾക്കുള്ളിലെ വിവിധ പാതകളിൽ ബസ് സർവിസ് നടത്തും. വിഷൻ 2030 ന്റെ ലക്ഷ്യങ്ങൾ കൈവരിക്കുന്നതിന് സംഭാവന ചെയ്യാൻ ശ്രമിക്കുന്ന മറ്റ് പദ്ധതികൾക്ക് പുറമെ, പൊതു ബസ് ഗതാഗതപദ്ധതിയുടെ പ്രാധാന്യവും ഗതാഗതവും സാമ്പത്തിക വികസനവും മെച്ചപ്പെടുത്തുന്നതിൽ അത് വഹിക്കുന്ന പങ്കും ചടങ്ങിൽ അമീർ സൗദ് ഊന്നിപ്പറഞ്ഞു.
6,10,000 ചതുരശ്ര മീറ്ററിൽ വ്യാപിച്ചുകിടക്കുന്ന ദമ്മാം കോർണിഷ് വികസന പദ്ധതിയും അമീർ ഉദ്ഘാടനം ചെയ്തു. അതിൽ കുടുംബങ്ങൾക്കുള്ള അഞ്ച് അടിസ്ഥാന മേഖലകൾ, ആഘോഷങ്ങൾ, കായിക മത്സരങ്ങൾ, വിനോദങ്ങൾ എന്നിവയും ഒരു പൊതു ഇടവും സാംസ്കാരിക പരിപാടികൾക്കുള്ള സ്ഥലവും ഉൾപ്പെടുന്നു. നഗരങ്ങളിലേക്കുള്ള പ്രവേശന കവാടങ്ങളിലെ ഹരിത പ്രദേശങ്ങൾ 80 ശതമാനമായി ഉയർത്തുന്നതിനും ദമ്മാം നഗരത്തിലേക്കുള്ള മൂന്ന് പ്രധാന കവാടങ്ങൾ വികസിപ്പിക്കുന്നതിനുള്ള പദ്ധതിയും ഉദ്ഘാടനം ചെയ്തു. ദഹ്‌റാൻ അൽ ജുബൈൽ റോഡ്, കിങ് ഫഹദ് റോഡ്, കിങ് ഫഹദ് റോഡിന്റെ കവല, അബു ഹാദ്രിയ റോഡ് എന്നിവ ഉൾപ്പെടെ പ്രതിനിധീകരിക്കുന്ന 9,00,000 ചതുരശ്ര മീറ്റർ വരെയുള്ള പ്രദേശങ്ങൾ ഉൾക്കൊള്ളുന്നു.
പദ്ധതിയിൽ 85 ആധുനിക ബസുകൾ, നഗരങ്ങളിലെയും ഗവർണറേറ്റുകളിലെയും ഭൂരിഭാഗം ലക്ഷ്യസ്ഥാനങ്ങളും ഉൾക്കൊള്ളുന്ന മൊത്തം 212 സ്റ്റേഷനുകൾ, 400 കി.മീ ദീർഘവും ഉൾപ്പെടുന്നു. സൗകര്യങ്ങളും സുരക്ഷയും പ്രത്യേക ആവശ്യങ്ങളുള്ള ആളുകൾക്ക് സേവനം നൽകുന്നതിനു കൂടിയാണ് ബസുകൾ സജ്ജീകരിച്ചിരിക്കുന്നത്. ഒരു ബസിന്റെ ശേഷി 81 യാത്രക്കാരാണ്. ഇത് ആഴ്ചയിൽ ഏഴ് ദിവസവും പുലർച്ചെ 5:30 മുതൽ രാത്രി 11:30 വരെ 18 മണിക്കൂർ പ്രവർത്തിക്കുന്നു.
ബസ് സർവിസിന് ഒരു യാത്രക്ക് 3:45 റിയാൽ ചെലവാകും. ദമ്മാം നഗരത്തിലെയും അൽ-ഖത്തീഫ് ഗവർണറേറ്റിലെയും താമസക്കാർക്കും സന്ദർശകർക്കും ഒന്നിലധികം ഗതാഗത ഓപ്ഷനുകൾ നൽകുന്നുണ്ട്. തിരക്കേറിയ പ്രദേശങ്ങളിലും ലക്ഷ്യസ്ഥാനങ്ങളിലും സഞ്ചാരം സുഗമമാക്കാനും ഇത് സഹായിക്കും. ജീവിതനിലവാരം മെച്ചപ്പെടുത്തുന്നതിനും ഗതാഗതക്കുരുക്ക് ലഘൂകരിക്കുന്നതിനൊപ്പം വ്യക്തിഗത വാഹനങ്ങളുടെ പതിവ് ഉപയോഗവും ഊർജ ഉപഭോഗവും മൂലമുണ്ടാകുന്ന കാർബൺ ഉത്ഭവത്തിന്റെ വ്യാപ്തി ഇത് കുറക്കുകയും ചെയ്യും.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.