ഈദുൽ ഫിത്വർ; സ്​നേഹവും സ​ന്തോഷവും സഹാനുഭൂതിയും പ്രചരിപ്പിക്കാനുള്ള സുദിനം -സൽമാൻ രാജാവ്​

ജിദ്ദ: സമൂഹത്തിൽ സ്​നേഹവും സ​ന്തോഷവും സഹാനുഭൂതിയും പ്രചരിപ്പിക്കാനുള്ള സുദിനമാണ്​ ഈദുൽഫിത്വറെന്ന്​ സൗദി ഭരണാധികാരി സൽമാൻ രാജാവ്​ പറഞ്ഞു. ഈദുൽഫിത്വറിനോടനുബന്ധിച്ച്​ രാജ്യത്തെ പൗരന്മാരെയും താമസക്കാരെയും ലോകമുസ്​ലിംകളെയും അഭിസംബോധന ചെയ്​തുള്ള പ്രസംഗത്തിലാണ്​ രാജാവ് ഇക്കാര്യം പറഞ്ഞത്​. ആക്​ടിങ്​ ഇൻഫർമേഷൻ മന്ത്രി ഡോ. മാജിദ്​ ബിൻ അബ്​ദുല്ല അൽഖസബിയാണ്​ സൽമാൻ രാജാവിന്റെ പ്രസംഗം വായിച്ചത്​. ബാഹ്യവും അന്തരികവുമായ ധാരാളം അനുഗ്രഹം ദൈവം നമുക്ക്​ നൽകിയിരുന്നു. ആ അനുഗ്രഹങ്ങളിലൊന്നാണ്​ ഈദുൽഫിത്വറും. ലോകമെമ്പാടുമുള്ള ജനങ്ങൾ പരീക്ഷണങ്ങളിലൂടെയാണ്​ കടന്നുപോയികൊണ്ടിരിക്കുന്നത്​. കോവിഡിനെ തുടർന്ന്​ ആരോഗ്യം, സാമൂഹികം, സാമ്പത്തികം എന്നീ മേഖലകളിൽ ലോകമെമ്പാടും സംഭവിച്ച വേദനയെ മറികടക്കാനുള്ള അവസരമാകട്ടെ ഈദുൽഫിത്വർ. ലോകത്തുള്ളവർക്ക്​ നന്മ, അറബ്​ലോകത്ത്​ സ്ഥിരത കൈവരിക്കാനുള്ള നല്ല നടപടികളെക്കുറിച്ച ശുഭാപ്​തി വിശ്വാസം, അങ്ങനെ ലോകത്തെ എല്ലാ ഭാഗങ്ങളിലും സുരക്ഷയും സമൃദ്ധിയും നിലനിൽക്കട്ടെയെന്ന്​ ആശംസിക്കുന്നുവെന്നും സൽമാൻ രാജാവ്​ പറഞ്ഞു.

അബ്​ദുൽ അസീസ്​ രാജാവി​െൻറ കാലംതൊട്ട്​ സൗദി അറേബ്യ സഹിഷ്​ണുതയുടെ മതമായ ഇസ്​ലാമിക ശരീഅത്തിനനുസരിച്ച്​ പ്രവർത്തിക്കുന്ന രാജ്യമാണ്​. തീവ്രവാദത്തെ നിരാകരിക്കുകയും അതിനെതിരെ പോരാടുകയും ചെയ്യുന്നു. ലോക സുരക്ഷക്കും സമാധാനത്തിനും സഹായിക്കുന്ന എല്ലാ കാര്യങ്ങളിലും അന്താരാഷ്​ട്ര സമൂഹവുമായി ചേർന്ന്​ പ്രവർത്തിക്കുന്നു. ഇരുഹറമുകളെയും അവിടെയെത്തുന്നവരെയും സേവിക്കാനും ദൈവം നമ്മെ അനുഗ്രഹിച്ചിരിക്കുന്നു. അതിൽ നാം അഭിമാനം കൊള്ളുന്നു. തീർഥാടകരുടെ സുരക്ഷ, സുഖം, സമാധാനം എന്നിവക്ക്​ വലിയ പ്രധാന്യവും ശ്രദ്ധയുമാണ്​ നാം കാണിക്കുന്നത്​. കോവിഡ്​ പ്രതിസന്ധിയുടെ വെളിച്ചത്തിൽ തീർഥാടകരെ സംരക്ഷിക്കുന്നതിനും ഉയർന്ന സുരക്ഷ ഉറപ്പുവരുത്തുന്നതിനും ലക്ഷ്യമിട്ടുള്ളതാണ്​ സർക്കാർ സ്വീകരിച്ച നടപടികൾ. ഹജ്ജ്​, ഉംറ സുരക്ഷ ടീമിലെ സ്​ത്രീകളുടെ സംഭാവനയിൽ അഭിമാനിക്കുന്നുവെന്നും സൽമാൻ രാജാവ്​ പറഞ്ഞു.

ലോകത്തെ ബാധിച്ച മഹാമാരിയെ നേരിടാൻ സാമൂഹിക അകലം പാലിക്കുക, പ്രതിരോധ കുത്തിവെപ്പെടുക്കുക എന്നിങ്ങനെയുള്ള ആരോഗ്യ മുൻകരുതൽ നടപടികൾ പാലിക്കാൻ ആരോഗ്യ മന്ത്രാലയം ന​മ്മോട്​ ആവശ്യപ്പെടുന്നുണ്ട്​. പൗരന്മാരും താമസക്കാരും ഉൾപ്പെടെയുള്ള സമൂഹത്തെ ശക്തിപ്പെടുത്താൻ ​സഹായിക്കുന്നതാണ്​ ഇതെല്ലാം. കോവിഡിനെ നേരിടാൻ അന്താരാഷ്​ട്ര സമൂഹവുമായി ചേർന്നുള്ള പ്രവർത്തനം നാം തുടരുകയാണ്​. കോവിഡിനെ നേരിടാൻ നടത്തിയ പ്രവർത്തനങ്ങൾ സൗദി അറേബ്യയുടെ മാനുഷികമായ പങ്ക്​ സ്ഥിരീകരിക്കുന്നതാണെന്നും സൽമാൻ രാജാവ്​ പറഞ്ഞു. പെരുന്നാൾ ദിനത്തിൽ കുടുംബത്തിൽ നിന്നെല്ലാം അകന്ന്​ സൈനിക, സിവിൽ, ആരോഗ്യ മേഖലയിൽ ജോലിയിലേർപ്പെട്ടവർക്ക്​ എല്ലാവർക്കും പ്രത്യേകം​ നന്ദി രേഖപ്പെടുത്തുന്നതായും രാജാവ് പറഞ്ഞു. രോഗം ബാധിച്ചർക്ക്​ വേഗം ശമനമുണ്ടാകട്ടെയെന്നും മരിച്ചുപോയവരെ ദൈവം അനുഗ്രഹിക്കട്ടെയെന്നും സൽമാൻ രാജാവ്​ പ്രാർത്ഥിച്ചു.