ജിദ്ദ സൂപ്പർ ഡോമിൽ അന്താരാഷ്ട്ര പുസ്തകമേള ആരംഭിച്ചപ്പോൾ
ജിദ്ദ: അന്താരാഷ്ട്ര പുസ്തകമേളക്ക് ജിദ്ദ സൂപ്പർ ഡോമിൽ ഗംഭീര തുടക്കം. സാഹിത്യ, പ്രസിദ്ധീകരണ, വിവർത്തന അതോറിറ്റിയുടെ ആഭിമുഖ്യത്തിൽ നടക്കുന്ന മേള ഡിസംബർ 21 വരെ നീളും. ഇത്തവണ 450 ഓളം പവിലിയനുകളിലായി 22 രാജ്യങ്ങളിൽനിന്നുള്ള ആയിരത്തോളം പ്രാദേശിക, അന്തർദേശീയ പ്രസിദ്ധീകരണ സ്ഥാപനങ്ങളും ഏജൻസികളും പങ്കെടുക്കുന്നുണ്ട്. സെമിനാറുകൾ, വർക്ഷോപ്പുകൾ എന്നിവയിൽ 170 ഓളം പ്രമുഖ പ്രഭാഷകർ പങ്കെടുക്കും.
സമ്പന്നമായ നൂറിലധികം സാംസ്കാരിക പരിപാടികളാണ് അരങ്ങേറുക. കുട്ടികൾക്ക് പ്രത്യേക ഏരിയയുണ്ട്. എഴുത്ത്, നാടകം, അനിമേഷൻ നിർമാണം, വിവിധ സംവേദനാത്മക പ്രവർത്തനങ്ങൾ തുടങ്ങിയ മേഖലകളിൽ യുവാക്കളെ ലക്ഷ്യമിട്ടുള്ള സാംസ്കാരിക പരിപാടികളും മേളയിലുണ്ട്.
സൗദി രചയിതാക്കൾക്കായി പ്രത്യേക കോർണറുണ്ട്. അതിൽ ഏറ്റവും പുതിയ പ്രസിദ്ധീകരണങ്ങൾ സന്ദർശകരെ പരിചയപ്പെടുത്തും. വിലക്കിഴിവുള്ള പുസ്തകങ്ങൾക്കായി പ്രത്യേക ഏരിയയുമുണ്ട്. വായനയെ പ്രോത്സാഹിപ്പിക്കുന്നതിനും പുസ്തകങ്ങൾ എല്ലാവർക്കും ലഭ്യമാക്കുന്നതിനുമുള്ള ശ്രമങ്ങളുടെ ഭാഗമായി സൗജന്യ വായന ഏരിയയയും മേളയിലുണ്ട്.
സൗദിയിൽ സംസ്കാരത്തെയും സാഹിത്യത്തെയും പിന്തുണക്കുന്നതിനും വികസിപ്പിക്കുന്നതിനും പ്രചരിപ്പിക്കുന്നതിനുമുള്ള ഭരണകൂട താൽപര്യത്തെ പ്രതിഫലിപ്പിക്കുന്നതാണ് ജിദ്ദ പുസ്തകമേളയെന്ന് അതോറിറ്റി പബ്ലിഷിങ് ഡിപ്പാർട്മെൻറ് ഡയറക്ടർ ഡോ. അബ്ദുൽ ലത്തീഫ് അൽവാസൽ പറഞ്ഞു.
സാമൂഹിക പരിപാടികളിലൂടെയും അന്താരാഷ്ട്ര നിലവാരത്തിലുള്ള പ്രവർത്തനങ്ങളിലൂടെയും പ്രാദേശിക, അറബ്, അന്തർ ദേശീയ സാഹിത്യങ്ങളുടെയും എഴുത്തുകാരുടെയും പ്രയത്‌നങ്ങളെ ഉയർത്തിക്കാട്ടുന്നതിനാൽ ജിദ്ദ പുസ്തകമേളക്ക് വലിയ പ്രധാന്യമുണ്ടെന്നും അൽവാസൽ പറഞ്ഞു.
വിവിധ കലാസാഹിത്യ രൂപങ്ങളിൽ സന്ദർശകർക്ക് സംവേദനാത്മക അവസരങ്ങൾ സൃഷ്ടിക്കുകയും ഒരു ചരിത്ര സാംസ്കാരിക കേന്ദ്രമെന്ന നിലയിൽ ജിദ്ദയുടെ സ്ഥാനം ശക്തിപ്പെടുത്തുകയും ചെയ്യുന്നു. പ്രദർശനം ‘ഒട്ടക വർഷം 2024’ഉം ആഘോഷിക്കുന്നു. ചരിത്രത്തിന്റെ ഉദയം മുതൽ അറേബ്യൻ ഉപഭൂഖണ്ഡത്തിലെ ജനങ്ങളുടെ ജീവിതത്തിൽ ഒട്ടകം പ്രതിനിധീകരിക്കുന്ന സാംസ്കാരിക മൂല്യം കണക്കിലെടുത്താണിതെന്നും അൽവാസൽ പറഞ്ഞു.
മേളയിൽ ദിവസവും രാവിലെ 11 മുതൽ രാത്രി 12 വരെയും വെള്ളിയാഴ്ച ഉച്ചക്ക് രണ്ട് മുതൽ രാത്രി 12 വരെയുമാണ് സന്ദർശനസമയം. ജിദ്ദ പുസ്തകമേള രാജ്യത്ത് ഈ വർഷം നടക്കുന്ന മൂന്നാമത്തെ മേളയാണ്. കഴിഞ്ഞ ഒക്ടോബറിലാണ് റിയാദ് പുസ്തകമേള നടന്നത്. ആഗസ്റ്റിൽ മദീന പുസ്തകമേളയും നടന്നു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.