റിയാദ്: 2034 ഫിഫ ലോകകപ്പിന് ആതിഥേയരാകുന്ന സൗദി അറേബ്യ, വിപുലമായ സൗകര്യങ്ങളുള്ള 15 അത്യാധുനിക സ്റ്റേഡിയങ്ങൾ ഒരുക്കി ലോകത്തെ കായികപ്രേമികൾക്ക് പുത്തൻ അനുഭവം നൽകാൻ തയാറെടുപ്പ് നടത്തുകയാണ്. റിയാദ്, ജിദ്ദ, അൽ ഖോബാർ, അബഹ, നിയോം എന്നീ അഞ്ച് പ്രധാന നഗരങ്ങളിലാണ് സ്റ്റേഡിയങ്ങൾ ലോകകപ്പിനായി ഒരുക്കുന്നത്.
ലോകകപ്പിലെ പകുതിയോളം മത്സരങ്ങൾക്ക് വേദിയാവുന്ന തലസ്ഥാന നഗരിയായ റിയാദിലാണ് 15 സ്റ്റേഡിയങ്ങളിൽ എട്ടും. നിലവിലുള്ള നാല് സ്റ്റേഡിയങ്ങൾ നവീകരിച്ചാണ് ലോകകപ്പിന് ഒരുക്കുക. ബാക്കി11ഉം പുതുതായി നിർമിക്കുന്നതാണ്മൂന്ന് സ്റ്റേഡിയത്തിന്റെ നിർമാണം പുരോഗമിക്കുകയാണ്.
2034 ഫിഫ ലോകകപ്പിന്റെ ഉദ്ഘാടന മത്സരവും ഫൈനലുമൊക്കെ നടക്കുമെന്ന് പ്രതീക്ഷിക്കുന്ന കിങ് സൽമാൻ ഇന്റർനാഷനൽ സ്റ്റേഡിയം 92,000 സീറ്റുകളുള്ള ആധുനിക കായിക സ്മാരകമായിരിക്കും. ഭാവി കായികവേദികൾക്ക് മാതൃകയാവുന്ന ഈ സ്റ്റേഡിയത്തിന്റെ രൂപകൽപന, പരമ്പരാഗത അറേബ്യൻ വാസ്തുവിദ്യ രീതിയും ആധുനിക സാങ്കേതികവിദ്യയും സംയോജിപ്പിച്ച് സൃഷ്ടിച്ചതാണ്.
പരിസ്ഥിതി സൗഹൃദം മുൻനിർത്തി, സ്റ്റേഡിയത്തിൽ സോളാർ പാനലുകളും മഴവെള്ള ശേഖരണ സംവിധാനങ്ങളും ഉൾപ്പെടുത്തിയിട്ടുണ്ട്. 2032ൽ പൂർണമായി നിർമാണം പൂർത്തിയാകുന്ന ഈ സ്റ്റേഡിയം, ലോകകപ്പിനായി എല്ലാ ഫിഫ മാനദണ്ഡങ്ങളും പാലിക്കുന്ന അത്യാധുനിക സൗകര്യങ്ങൾ ഒരുക്കുന്നു.
ലോകകപ്പ് മത്സരങ്ങളെ കൂടാതെ, മറ്റ് രാജ്യാന്തര മേളകളും വിനോദപരിപാടികളും നടത്താൻ അനുയോജ്യമായ ഈ കായികദുർഗം സൗദി അറേബ്യയുടെ 21ാം നൂറ്റാണ്ടിന്റെ അഭിമാനത്തെ പ്രതിനിധീകരിക്കുന്നതായിരിക്കും.
പുതുതായി നിർമിക്കുന്ന 47,000 ഇരിപ്പിട ശേഷിയുള്ള ലോകകപ്പിന്റെ മറ്റൊരു സുപ്രധാന വേദിയാണ് പ്രിൻസ് മുഹമ്മദ് ബിൻ സൽമാൻ സ്റ്റേഡിയം. സൗദി തലസ്ഥാനനഗരത്തോട് ചേർന്നുള്ള നിർദിഷ്ട ഖിദ്ദിയ വിനോദ നഗരപദ്ധതിക്കുള്ളിലാണ് ഈ സ്റ്റേഡിയം നിർമിക്കുന്നത്.
റിയാദ് നഗരത്തിന്റെ തെക്കുവടക്കു ഭാഗത്തായി നിലകൊള്ളുന്ന ശക്തിദുർഗമായ തുവൈഖ് മലനിരകൾക്കിടയിൽ വിസ്മയകരമായ ലൊക്കേഷനിലാണ് ഈ സ്റ്റേഡിയത്തിന്റെ നിർമാണം. ഒളിമ്പിക് മ്യൂസിയവും ഇതിനോട് അനുബന്ധമായി നിർമിക്കുന്നുണ്ട്. 2026ൽ നിർമാണം ആരംഭിക്കും. 2029ൽ പൂർത്തിയാവും. ലോകകപ്പിലെ ഗ്രൂപ് റൗണ്ട് മത്സരങ്ങളാണ് ഇവിടെ പ്രധാനമായും നടക്കുക.
2034 ഫിഫ ലോകകപ്പിനായി നവീകരിച്ചുകൊണ്ടിരിക്കുന്ന 70,000 സീറ്റുകളുള്ള വിസ്മയകരമായ കളിക്കളമാണ് കിങ് ഫഹദ് ഇന്റർനാഷനൽ സ്റ്റേഡിയം. 1987ൽ തുറക്കപ്പെട്ട ഈ സ്റ്റേഡിയം, അറബ് ലോകത്തെ ആദ്യ വമ്പൻ മത്സരവേദികളിലൊന്നായി ചരിത്രം സൃഷ്ടിച്ചതാണ്.
ലോകകപ്പിനായി, സ്റ്റേഡിയം പുതിയ ശബ്ദ, പ്രകാശ, കൂളിങ് സാങ്കേതിക വിദ്യകളാൽ സമ്പന്നമാക്കുകയും ഫിഫയുടെ സുസ്ഥിരത മാനദണ്ഡങ്ങൾക്ക് അനുയോജ്യമായ പരിസ്ഥിതി സൗഹൃദ മാറ്റങ്ങൾ ഉൾക്കൊള്ളിച്ചാണ് നവീകരിക്കുന്നത്. പരമ്പരാഗത അറേബ്യൻ ഡിസൈനിനെയും ആധുനികതയെയും സമന്വയിപ്പിക്കുന്ന ഈ സ്റ്റേഡിയം, 2031ഓടെ പുനർനിർമാണം പൂർത്തിയാക്കി രാജ്യത്തെ വലിയ ടൂർണമെന്റുകൾക്കും ലോകകപ്പിനുമായി ഒരുങ്ങും.
പുതുതായി നിർമിക്കപ്പെടുന്ന, 45,000 ഇരിപ്പിടങ്ങളുള്ള സ്റ്റേഡിയത്തിന്റെ രൂപകൽപന പാരബോളിക് ശൈലിയിലാണ്. ഇത് ശബ്ദ ഗുണനിലവാരത്തിൽ സുതാര്യതയും ആവേശജനകമായ കാണികളുടെ അനുഭവവും ഉറപ്പാക്കുന്നു.
പരിസ്ഥിതി സൗഹൃദമായ ഈ സ്റ്റേഡിയത്തിൽ സോളാർ പാനലുകൾ, മഴവെള്ള ശേഖരണ സംവിധാനം, ഉയർന്ന നിലവാരത്തിലുള്ള കാർബൺ നിയന്ത്രണ സാങ്കേതികവിദ്യ എന്നിവ ഉൾപ്പെടുത്തിയിട്ടുണ്ട്. ഫിഫയുടെ ഗ്രീൻ മാനദണ്ഡങ്ങൾക്ക് അനുസൃതമായ ഈ സ്റ്റേഡിയം 2031ഓടെ പൂർണമായി സജ്ജമാകും. റോഷൻ സ്റ്റേഡിയം വിവിധ അന്താരാഷ്ട്ര കായികമേളകൾക്ക് അനുയോജ്യമായ നിർമിതി കൂടിയാണ്.
2034 ഫിഫ ലോകകപ്പിന് മുഖ്യവേദികളിലൊന്നായി പരിഗണിക്കുന്ന വമ്പൻ കളിക്കളമാണ് കിങ് അബ്ദുല്ല സ്പോർട്സ് സിറ്റി. 58,000 സീറ്റുകളുള്ള ഈ സ്റ്റേഡിയം മനോഹരമായ ‘തിളങ്ങുന്ന രത്നം’ എന്ന പേരിനോട് നീതി പുലർത്തുന്ന അത്യാധുനിക ആകൃതിയിലുള്ള ശ്രദ്ധേയ രൂപകൽപനയാണ്. ജ്യോമിതീയ ഡിസൈൻ ശൈലിയും സ്വാഭാവിക വെളിച്ചത്തിനും ശീതീകരണത്തിനുമുള്ള സംവിധാനങ്ങളുമാണ് പ്രത്യേകത.
ലോകകപ്പിനായി സ്റ്റേഡിയം പുനർനിർമിക്കുമ്പോൾ സുസ്ഥിരത പ്രോത്സാഹിപ്പിക്കുന്ന ഘടകങ്ങൾ, ജൈവപദ്ധതികൾ, സോളാർ എനർജി ഉപയോഗം എന്നിവ ഉൾപ്പെടുത്തുന്നുണ്ട്. 2032ഓടെ പുനർനിർമാണം പൂർത്തിയാക്കാൻ ലക്ഷ്യമിട്ടിരിക്കുന്ന ഈ വേദി ഇതര ടൂർണമെൻറുകൾക്കും വലിയ കലാപരിപാടികൾക്കുമായി ഉപയോഗിക്കാവുന്ന രീതിയിൽ കൂടുതൽ വാണിജ്യവത്കൃത സംവിധാനങ്ങളോടെയാണ് വികസിപ്പിക്കുന്നത്.
2034 ഫിഫ ലോകകപ്പിനായി അൽ ഖോബറിൽ നിർമിക്കുന്ന 45,000 ഇരിപ്പിടങ്ങളുള്ള അത്യാധുനിക കളിക്കളമാണ് അരാംകോ സ്റ്റേഡിയം. പ്രാദേശിക ദവ്വാമ പ്രതിഭാസത്തെ പ്രതിഫലിപ്പിക്കുന്ന ചുഴലിക്കാറ്റ് പ്രചോദിത രൂപകൽപനയിൽ, പായ്ക്കപ്പലിന്റെ പായയുടെ ആകൃതികളും തിരമാല രൂപങ്ങളും സമന്വയിപ്പിച്ച് തീരദേശ ഭൂപ്രകൃതിയുമായി ഇണങ്ങിച്ചേരുന്ന രീതിയിലാണ് ഡിസൈൻ ചെയ്തിരിക്കുന്നത്.
പരിസ്ഥിതി സൗഹൃദ ഘടകങ്ങൾ ഉൾക്കൊള്ളിച്ച് സോളാർ പാനലുകളും മഴവെള്ള ശേഖരണ സംവിധാനങ്ങളും ഉപയോഗിച്ച് പുനരുപയോഗമുള്ള ഊർജ്ജ സ്രോതസ്സുകളെ പ്രോത്സാഹിപ്പിക്കുന്നതുമായിരിക്കും ഈ സ്റ്റേഡിയം. 2033ഓടെ പൂർണമായി സജ്ജമാവുന്ന ഈ സ്റ്റേഡിയം, ഫിഫയുടെ പരിസ്ഥിതി മാനദണ്ഡങ്ങൾ പൂർണമായി പാലിക്കുന്നതോടൊപ്പം കാണികൾക്ക് അനുയോജ്യമായ ശീതീകരണവും സൗകര്യങ്ങളുമൊരുക്കുന്നു.
പ്രിൻസ് ഫൈസൽ ബിൻ ഫഹദ് സ്പോർട്സ് സിറ്റി സ്റ്റേഡിയം, 2034 ലോകകപ്പിനായി റിയാദിൽ നിർമിക്കുന്ന ഏറ്റവും പുതിയ പ്രോജക്ടുകളിൽ ഒന്നാണ്. സൽമാനി ആർക്കിടെക്ചർ ശൈലിയിൽ ആധുനിക ഡിസൈനോടെ ഒരുക്കുന്ന ഈ സ്റ്റേഡിയം, സൗദിയുടെ ആധുനിക കായിക സൗകര്യങ്ങളുടെ മാറ്റത്തിന്റെ ഉദാഹരണമാണ്. ആകർഷകമായ ഡിസൈനിനു പുറമെ, ഇത് കാർബൺ-കുറഞ്ഞ സാങ്കേതികവിദ്യകളും പരിസ്ഥിതിയോടനുസരിച്ചുള്ള മാതൃകാപരമായ സവിശേഷതകളും ഉൾക്കൊള്ളുന്നു.
50,000-60,000 പ്രേക്ഷകർക്ക് സംവേദന സജ്ജമാക്കുന്ന ഈ സ്റ്റേഡിയം, 2033-ഓടെ പൂർണമായും സജ്ജമാകും. ലോകകപ്പിനു ശേഷവും ഇതിന്റെ വലിയ സൗകര്യങ്ങൾ ദേശീയ-ആഗോള ടൂർണമെന്റുകൾക്കും സാംസ്കാരിക ഇവന്റുകൾക്കും വേദിയായിരിക്കുമെന്ന് പ്രതീക്ഷിക്കുന്നു.
റിയാദിൽ പുതിയതായി പുനർനിർമിക്കാൻ പദ്ധതി തയാറാക്കിയ 46,000 സീറ്റുകളുള്ള സ്റ്റേഡിയമാണ് കിങ് സഊദ് യൂനിവേഴ്സിറ്റി സ്റ്റേഡിയം. ഈ സ്റ്റേഡിയത്തിന്റെ പ്രധാന പ്രത്യേകത ഗ്രീൻ ടെക്നോളജികളെയും ആധുനിക സൗകര്യങ്ങളെയും ഉപയോഗപ്പെടുത്തി പുനരുപയോഗ ഊർജ സ്രോതസ്സുകൾ ഉൾപ്പെടുത്തി നവീകരിക്കുന്നു എന്നതാണ്.
രാജ്യാന്തര കായിക മത്സരങ്ങൾക്ക് മാത്രമല്ല, വിദ്യാഭ്യാസ, സാമൂഹിക പ്രവർത്തനങ്ങൾക്കും ഒരു പ്രധാന കേന്ദ്രമായിരിക്കും 2030 ഓടെ നവീകരണം പൂർത്തിയാകുമെന്ന് പ്രതീക്ഷിക്കുന്ന തലസ്ഥാന നഗരിയിലെ ഈ കായിക കേന്ദ്രം. യൂനിവേഴ്സിറ്റി വിദ്യാർഥി കായിക മേഖലക്കും വനിത കായികമേഖലക്കും ഉണർവ് നൽകുന്ന സമഗ്രപദ്ധതിയുടെ ഭാഗം കൂടിയാണ് ഈ സ്റ്റേഡിയം നവീകരണം.
2034 ലോകകപ്പിനായി ജിദ്ദയിൽ നിർമിക്കുന്ന 46,000 ഇരിപ്പിടങ്ങളുള്ള കളിക്കളമാണ് ഖിദ്ദിയ കോസ്റ്റ് സ്റ്റേഡിയം. ഈ സ്റ്റേഡിയത്തിന്റെ ഡിസൈൻ ആളുകളും ജലവും ഊർജവും ദ്രവ്യവും തമ്മിലുള്ള ചലനാത്മക ബന്ധത്തെ പ്രതീകപ്പെടുത്താൻ രൂപകൽപന ചെയ്തിട്ടുള്ളതാണ്.
മെക്‌സിക്കൻ തരംഗത്തിന്റെ അലകളുടെ പ്രഭാവത്തെ അനുസ്മരിപ്പിക്കുന്ന തരത്തിൽ അലയടിക്കുന്ന രൂപങ്ങളും വർണ പാലറ്റും രൂപകൽപനയിൽ ഉൾപ്പെടുന്നു.
പുതിയതായി നിർമിക്കുന്ന കായിക വേദിയെന്ന നിലയിൽ, പരിസ്ഥിതിയോട് ചേർന്ന സംവിധാനങ്ങൾ ഉൾപ്പെടുത്തി, സോളാർ എനർജി, പരിസ്ഥിതി സൗഹൃദ ഡിസൈൻ, മഴവെള്ള ശേഖരണം തുടങ്ങിയ സുസ്ഥിര സാങ്കേതികവിദ്യകളും പ്രോത്സാഹിപ്പിച്ചിട്ടുണ്ട്. 2032ഓടെ പൂർണമായും സജ്ജമാകുന്ന ഈ സ്റ്റേഡിയം, ലോകകപ്പിന് ശേഷം രാജ്യാന്തര ടൂർണമെന്റുകൾ, വിനോദ പരിപാടികൾ, സാംസ്കാരിക മേളകൾ എന്നിവക്കായി ഉപയോഗിക്കപ്പെടും.
2034 ലോകകപ്പിന്റെ ഭാഗമായി നിർമിക്കുന്ന അത്യാധുനിക കായികവേദിയാണ് നിയോം സ്റ്റേഡിയം. നിയോം നഗരത്തിന്റെ ഭാഗമായാണ് ഈ സ്റ്റേഡിയം ഉയരുന്നത്. സുസ്ഥിരത, ശക്തമായ സോളാർ എനർജി സിസ്റ്റം, പരിസ്ഥിതിയുമായി ഒത്തുചേരുന്ന ആധുനിക കെട്ടിട സാങ്കേതികവിദ്യകൾ എന്നിവയുള്ള ഡിസൈൻ സ്റ്റേഡിയത്തിന്റെ പ്രധാന പ്രത്യേകതയാണ്. ഭാവിയിൽ സാംസ്കാരിക, വിനോദ, വാണിജ്യ പ്രവർത്തനങ്ങളുടെയൊക്കെ മുഖ്യ കേന്ദ്രമാക്കാനാണ് ലക്ഷ്യമിടുന്നത്.
2033ൽ പൂർണമായും സജ്ജമാകുന്ന ഈ സ്റ്റേഡിയം, ആഗോള കായിക മേഖലയിൽ പുതിയ ചിന്തകളുടെ മുന്നണിയായി മാറും. സമഗ്ര കാർബൺ-ഫ്രീ അനുഭവങ്ങളും കായിക പരിപാടികളും നടത്താൻ അനുയോജ്യമായ ഈ വേദി ലോകകപ്പോടെ വൈവിധ്യപ്രദമായ കായിക പരിസ്ഥിതിയും സൃഷ്ടിക്കും.
റിയാദിലെ ന്യൂ മുറബ്ബ ഡെവലപ്മെൻറ് പ്രോജക്റ്റിെൻറ ഭാഗമായി നിർമിക്കപ്പെടുന്ന, ലോകോത്തര സൗകര്യങ്ങളുള്ള ആധുനിക കായികവേദിയാണ് ന്യൂ മുറബ്ബ സ്റ്റേഡിയം. ആധുനിക ഡിസൈൻ സാങ്കേതികവിദ്യയും കലയും ചേർന്ന് തിളങ്ങുന്ന അതുല്യ വാസ്തുവിദ്യ ശൈലിയിൽ പ്രേക്ഷകർക്ക് അന്താരാഷ്ട്ര നിലവാരത്തിലുള്ള അനുഭവങ്ങൾ നൽകുന്നതാവും ഈ സ്റ്റേഡിയം.
ലോകകപ്പിന്റെ പ്രധാന മത്സരങ്ങൾ ഉൾപ്പെടെ നിരവധി കളികൾക്കായി ഉപയോഗിക്കുന്ന സ്റ്റേഡിയം, 80,000 ത്തോളം ആളുകളെ ഏറ്റുവാങ്ങാൻ കഴിയുന്ന ഭീമൻ സൗകര്യങ്ങളോടെ 2031-32 കാലയളവിൽ പൂർണമായും സജ്ജമാക്കും. സൗദിയുടെ ആധുനിക നഗരവിപ്ലവത്തിന്റെ ഒരു ചിഹ്നമായും രാജ്യത്തിന്റെ കായിക സൗകര്യങ്ങൾ ഉയർത്തിപ്പിടിക്കുന്ന കേന്ദ്രമായും ന്യൂ മുറബ്ബ സ്റ്റേഡിയം മാറും.
പാരമ്പര്യവും ആധുനികതയും ചേർന്ന കലാസൃഷ്ടിയാണ് 2034 ലോകകപ്പിനായി നിർമിക്കപ്പെടുന്ന ജിദ്ദ സെൻട്രൽ ഡെവലപ്മെന്റ് സ്റ്റേഡിയം. ഈ സ്റ്റേഡിയത്തിന്റെ രൂപകൽപന ജിദ്ദയിലെ പാരമ്പര്യ വാസ്തുവിദ്യാശൈലികളായ അൽ ബലദ് പ്രദേശത്തിന്റെ വാസ്തുവിദ്യയിൽനിന്ന് പ്രചോദനം സ്വീകരിച്ചിരിക്കുന്നു.
ജിദ്ദയുടെ പാരമ്പര്യവും ആധുനികതയും ഒരുമിച്ച് ചേർത്തുപിടിക്കുന്നതിന്റെ ഉദാഹരണമായിരിക്കും 2033ഓടെ പൂർണമായും സജ്ജമാകുന്ന 46,000ത്തിലധികം ആളുകളെ ഉൾക്കൊള്ളാൻ ശേഷിയുള്ള ഈ സ്റ്റേഡിയം. ലോകകപ്പിനു ശേഷം, ഈ സ്റ്റേഡിയം ദേശീയ-ആഗോള കായിക, സാംസ്കാരിക പരിപാടികൾക്കും ഒരുപോലെ ഉപയോഗപ്പെടുമെന്ന് കരുതപ്പെടുന്നു.
പരിസ്ഥിതിയുമായി സമന്വയം പുലർത്തുന്ന കായികവേദികളിൽ ഒന്നാണ് ചെങ്കടൽ തീരത്തുള്ള കിങ് അബ്ദുല്ല ഇക്കണോമിക് സിറ്റി സ്റ്റേഡിയം. സമുദ്രത്തിന്റെ പ്രകൃതിദൃശ്യങ്ങളിൽനിന്ന് പ്രചോദനം ഉൾക്കൊണ്ട് രൂപകൽപന ചെയ്തിരിക്കുന്നു. പ്രാദേശിക പവിഴപ്പുറ്റുകളിൽനിന്ന് പ്രചോദനം ഉൾക്കൊണ്ടുള്ള രൂപകൽപന വൈവിധ്യത്തിനും ജൈവ സൗന്ദര്യശാസ്ത്രത്തിനും ഊന്നൽ നൽകുന്നു.
46,000 ആളുകളെ ഉൾക്കൊള്ളാൻ ശേഷിയുള്ള ഈ സ്റ്റേഡിയം, ആധുനിക സാങ്കേതികവിദ്യയോടെ, സുസ്ഥിര സൗകര്യങ്ങൾ ഉൾപ്പെടുത്തിയാണ് നിർമിക്കുന്നത്. 2033ഓടെ പൂർണമായും സജ്ജമാവുന്ന സ്റ്റേഡിയം, ലോകകപ്പിനുശേഷം സൗദി അറേബ്യയുടെ സമുദ്ര തീരപ്രദേശത്തിന്റെ പ്രധാന കായിക-സാംസ്കാരിക കേന്ദ്രമായിരിക്കും.
നിലവിൽ സർവകലാശാല കായിക മത്സരങ്ങൾക്ക് ഉപയോഗിക്കുന്ന പർവതസൗന്ദര്യത്തിന്റെ പശ്ചാത്തലത്തിൽ അബഹയിൽ സ്ഥിതി ചെയ്യുന്ന ഈ കായികവേദി, ലോകകപ്പ് ആവശ്യമനുസരിച്ച് നവീകരിച്ചും വിപുലീകരിച്ചും പുനരുദ്ധരിക്കുകയാണ്. 45,000-ത്തിലധികം ആളുകളെ ഉൾക്കൊള്ളാനാകുന്ന വിധം ഇതിന്റെ നിലവിലുള്ള സൗകര്യങ്ങൾ വിപുലീകരിക്കുന്നു.
പർവതമേഖലയായ അബഹയുടെ സവിശേഷമായ പ്രകൃതിദൃശ്യങ്ങൾക്കൊപ്പം നിലകൊള്ളുന്ന ഈ സ്റ്റേഡിയം, പ്രകൃതിയോടൊത്തുചേരുന്ന സുസ്ഥിര ഡിസൈനോടെയാണ് നവീകരിക്കുന്നത്. സൗദി അറേബ്യയുടെ പ്രാദേശിക കായിക വിപ്ലവത്തിനും അന്താരാഷ്ട്ര ടൂർണമെന്റുകൾക്കും പ്രധാന കേന്ദ്രമാകുമെന്ന് പ്രതീക്ഷിക്കുന്ന സ്റ്റേഡിയം 2033ഓടെ പൂർണമായും സജ്ജമാവും.
2034 ലോകകപ്പിനായി റിയാദിന്റെ ദക്ഷിണ മേഖലയിൽ നിർമിക്കുന്ന അത്യാധുനിക കായികവേദിയാണ് സൗത്ത് റിയാദ് സ്റ്റേഡിയം. പരിസ്ഥിതി സൗഹൃദ സവിശേഷതകൾ ഉൾക്കൊള്ളുന്ന ഈ സ്റ്റേഡിയം, സുസ്ഥിരതയെ മുൻനിർത്തി രൂപകൽപന ചെയ്തിരിക്കുന്നു. സൗരോർജവും ജലസംരക്ഷണ സംവിധാനങ്ങളും ഉപയോഗിച്ചുള്ള നവീന സാങ്കേതിക വിദ്യകൾ ഇതിനായി ഉൾപ്പെടുത്തിയിരിക്കുന്നു.
45,000-50,000 പ്രേക്ഷകർക്കുള്ള സ്ഥലസൗകര്യവും ദക്ഷിണ റിയാദിന്റെ തനതായ താപനിലയോട് അനുയോജ്യമായ ഡിസൈനും ഈ സ്റ്റേഡിയത്തിന്റെ പ്രത്യേകതകളാണ്. 2032ഓടെ പൂർണമായും സജ്ജമാകുന്ന സൗത്ത് റിയാദ് സ്റ്റേഡിയം, ലോകകപ്പ് മത്സരങ്ങൾക്കു പുറമെ, പ്രാദേശിക-ആഗോള കായിക, സാംസ്കാരിക ഇവൻറുകൾക്കുള്ള കേന്ദ്രമാകും.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.