കേളിദിനം 2025 സംഘാടക സമിതി രൂപവത്കരണയോഗം
രക്ഷാധികാരി സെക്രട്ടറി കെ.പി.എം. സാദിഖ് ഉദ്ഘാടനം
ചെയ്യുന്നു
റിയാദ്: കേളി കലാസാംസ്കാരിക വേദി 24ാം വാർഷികം ആഘോഷിക്കുന്നു. ‘കേളിദിനം 2025’ എന്ന പേരിൽ ജനുവരി മൂന്നിന് നടത്തുന്ന ആഘോഷങ്ങളുടെ ഏകോപനത്തിനായി 251 അംഗ സംഘാടകസമിതി രൂപവത്കരിച്ചു. ബത്ഹ ലൂഹ ഓഡിറ്റോറിയത്തിൽ സംഘടിപ്പിച്ച രൂപവത്കരണ യോഗത്തിൽ പ്രസിഡൻറ് സെബിൻ ഇഖ്ബാൽ അധ്യക്ഷത വഹിച്ചു. രക്ഷാധികാരി സെക്രട്ടറി കെ.പി.എം. സാദിഖ് ഉദ്ഘാടനം ചെയ്‌തു.
2001 ജനുവരി ഒന്നിന് പിറവിയെടുത്ത കേളി 24 വർഷങ്ങൾ പിന്നിടുന്നു. തുടർച്ചയായ ഏട്ടാം വർഷവും ‘ജീവസ്പന്ദനം’ എന്ന പേരിൽ ഹജ്ജിനോടനുബന്ധിച്ച് ആയിരത്തിലധികം പ്രവാസികളെ പങ്കെടുപ്പിച്ചുകൊണ്ട് നടത്തിയ രക്തദാന ക്യാമ്പ്, ഈ അധ്യയന വർഷത്തിൽ തുടർപഠനത്തിന് അർഹത നേടിയ 240 വിദ്യാർഥികൾക്ക് നൽകിയ ‘പ്രതീക്ഷ’ വിദ്യാഭ്യാസ പുരസ്കാരം, നിരാലംബരും പ്രത്യേകം പരിചരണം ആവശ്യമായവരെ ചേർത്തുപിടിക്കുന്നവരുമായി ചേർന്ന് ‘ഹൃദയപൂർവം കേളി’ പദ്ധതി വഴി കേരളത്തിൽ നൽകിയ 70,000ൽപരം പൊതിച്ചോറുകൾ, പ്രകൃതി ദുരന്തത്തിൽ തകർന്ന വയനാട്ടിന്റെ പുനരുദ്ധാരണത്തിനായി മുഖ്യമന്ത്രിയുടെ ദുരിതാശ്വാസ നിധിയിലേക്ക് പ്രഖ്യാപിച്ച ഒരു കോടി രൂപ തുടങ്ങി വലിയ പദ്ധതികളുൾപ്പെടെ കേളി കഴിഞ്ഞകാലങ്ങളിൽ നടത്തിയ പ്രവർത്തനങ്ങളാണ്.
ഇന്ത്യൻ എംബസി സഹായത്തോടെ, കൊലക്കുറ്റം ചുമത്തി ജയിലിലടക്കപ്പെട്ട അന്യസംസ്ഥാനക്കാരെ നിരപരാധിത്വം തെളിയിച്ച് നാട്ടിലെത്തിക്കാൻ കഴിഞ്ഞതും മൃതദേഹങ്ങൾ നാട്ടിലെത്തിക്കുന്നതും രോഗങ്ങളാൽ ദുരിതമനുഭിക്കുന്നവരെ സഹായിക്കുന്നതുമടക്കം ചെയ്യുന്ന ജീവകാരുണ്യ പ്രവർത്തനങ്ങൾ വേറെയുമുണ്ടെന്നും കെ.പി.എം. സാദിഖ് പറഞ്ഞു.
കേളി അംഗങ്ങളുടെയും കുട്ടികളുടെയും സർഗവാസനകൾ പ്രകടിപ്പിക്കുന്നതിനും പ്രോത്സാഹിപ്പിക്കുന്നതിനും കൂടിയാണ് കേളി വാർഷികം മുൻതൂക്കം നൽകുന്നത്. സംഘാടക സമിതി രൂപവത്കരണയോഗത്തിൽ ജോ.സെക്രട്ടറി മധു ബാലുശ്ശേരി പാനൽ അവതരിപ്പിച്ചു. കേന്ദ്ര രക്ഷാധികാരി സമിതി അംഗങ്ങളായ ജോസഫ്‌ ഷാജി, ഷമീർ കുന്നുമ്മൽ, പ്രഭാകരൻ കണ്ടോന്താർ, ഫിറോഷ് തയ്യിൽ, ചന്ദ്രൻ തെരുവത്ത്, ഗീവർഗീസ് ഇടിച്ചാണ്ടി, സുരേന്ദ്രൻ കൂട്ടായ്, കുടുംബവേദി സെക്രട്ടറി സീബാ കൂവോട് എന്നിവർ സന്നിഹിതരായിരുന്നു.
രജീഷ് പിണറായി (ചെയർ.), ശ്രീഷ സുകേഷ്, നൗഫൽ സിദ്ദീഖ് (വൈസ് ചെയർ.), റഫീക്ക് ചാലിയം (കൺവീനർ), ലാലി രജീഷ്, റഫീഖ് പാലത്ത് (ജോ. കൺ.), സുനിൽ സുകുമാരൻ (സാമ്പത്തിക കൺവീനർ), സുജിത് (ജോ. കൺവീനർ) എന്നിവരാണ് ഭാരവാഹികൾ.
ഫൈസൽ കൊണ്ടോട്ടി, ഷെബി അബ്ദുൽ സലാം (പ്രോഗ്രാം), ബിജു തായമ്പത്ത്, സതീഷ് കുമാർ വളവിൽ (പബ്ലിസിറ്റി), കിഷോർ ഇ. നിസ്സാം, നിസാർ റാവുത്തർ (ഗതാഗതം), റിയാസ് പള്ളത്ത്, ഷാജഹാൻ (സ്റ്റേജ് ആൻഡ് ഡെക്കറേഷൻ), കരീം പെരിങ്ങാട്ടൂർ, സുനിൽ ബാലകൃഷ്ണൻ (ഭക്ഷണം) എന്നിവരെ യഥാക്രമം കൺവീനറും ജോ.കൺവീനർമാരായും തിരഞ്ഞെടുത്തു.
ബിജി തോമസ് (സ്റ്റേഷനറി ചുമതല), ഗഫൂർ ആനമങ്ങാട് (വളൻറിയർ ക്യാപ്റ്റൻ) എന്നിവരും അടങ്ങിയ 251 അംഗ സംഘാടക സമിതിയാണ് രൂപവത്കരിച്ചത്. ജോ. സെക്രട്ടറി സുനിൽ കുമാർ സ്വാഗതവും സംഘാടക സമിതി കൺവീനർ റഫീഖ് ചാലിയം നന്ദിയും പറഞ്ഞു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.