വിമാന സർവിസ്​ പുനരാരംഭിക്കൽ: ഇന്ത്യൻ എംബസി, സൗദി സിവിൽ ഏവിയേഷൻ അതോറിറ്റി കൂടിക്കാഴ്​ച

റിയാദ്​: ഇന്ത്യക്കും സൗദി അറേബ്യക്കുമിടയിൽ വിമാന സർവിസ്​ പുനരാരംഭിക്കുന്നതിനെ കുറിച്ച്​ ചർച്ച സജീവമാക്കി ഇരുപക്ഷവും. റിയാദിലെ ഇന്ത്യൻ എംബസിയിൽ പുതുതായി ചുമതലയേറ്റ ഡെപ്യൂട്ടി ചീഫ്​ ഒാഫ്​ മിഷൻ (ഡി.സി.എം) എൻ. റാം പ്രസാദ്​ ബുധനാഴ്​ച സൗദി സിവിൽ ഏവിയേഷൻ ജനറൽ അതോറിറ്റി (ഗാക) അധികൃതരുമായി ഇൗ വിഷയത്തിൽ കൂടിക്കാഴ്​ച നടത്തി. കോവിഡ്​ പശ്ചാത്തലത്തിലുണ്ടായ യാത്രാ​നിരോധനം നീക്കുക, ഇരുഭാഗത്തുനിന്നുമുള്ള വിമാന സർവിസിന്​ വേണ്ടി എയർ ബബിൾ കരാർ ഒപ്പിടുക, നിർത്തിവെച്ച വിമാന സർവിസ്​ സാധ്യമായ വേഗത്തിൽ പുനസ്ഥാപിക്കുക എന്നീ ഷയങ്ങളിലാണ്​ ചർച്ച നടന്നതെന്ന്​ എംബസി വൃത്തങ്ങൾ അറിയിച്ചു.

സിവിൽ ഏവിയേഷൻ ജനറൽ അതോറിറ്റി അസിസ്​റ്റൻറ്​ പ്രസിഡൻറ്​ ഡോ. ബദർ അൽസഗ്​രിയുടെ നേതൃത്വത്തിലുള്ള ഗാക സംഘത്തെയാണ്​ അതോറിറ്റി ആസ്ഥാനത്ത്​ ഡി.സി.എം എൻ. റാം പ്രസാദും എംബസി സെക്കൻഡ്​ സെക്രട്ടറി അസീം അൻവറും നേരിൽ കണ്ട്​ ചർച്ച നടത്തിയത്​. ചർച്ചകൾ പുരോഗമിക്കുകയാണെന്നും ഗാക അധികൃതർക്ക്​ അനുകൂല നിലപാടാണുള്ളതെന്നും എന്നാൽ ആരോഗ്യമന്ത്രാലയത്തി​െൻറ അഭിപ്രായം കൂടി ആശ്രയിച്ചാണ് അന്തിമ തീരുമാനമുണ്ടാവുകയെന്നും എംബസി പ്രസ് സെക്രട്ടറി കൂടിയായ അസീം അൻവർ 'ഗൾഫ്​ മാധ്യമ'ത്തോട്​ പറഞ്ഞു. ആരോഗ്യമ​ന്ത്രാലയത്തെ ബന്ധപ്പെട്ടും ചർച്ച നടത്തുകയാണ്​. രണ്ട്​ ദിവസം മുമ്പ്​ അംബാസഡർ ഡോ. ഒൗസാഫ്​ സഇൗദ്​ ആരോഗ്യ വകുപ്പ്​ ഡെപ്യൂട്ടി മന്ത്രി അബ്​ദുറഹ്​മാൻ അൽ​െഎബാൻ, അസിസ്​റ്റൻറ്​ ഡെപ്യൂട്ടി മന്ത്രി സാറ അൽസഇൗദ്​ എന്നിവരുമായി ഇൗ വിഷയത്തിൽ വെർച്വലായി ചർച്ച നടത്തിയിരുന്നെന്നും പ്രതീക്ഷയോടെ കാത്തിരിക്കുകയാണെന്നും അസീം അൻവർ കൂട്ടിച്ചേർത്തു.

വിമാന സർവിസ് എത്രയും വേഗം​ പുനരാരംഭിക്കാനുള്ള ചർച്ചകൾ നടക്കുന്നതായി രണ്ടാഴ്​ച മുമ്പ്​ ജിദ്ദയിൽ വാർത്താസമ്മേളനത്തിൽ ഇന്ത്യൻ അംബാസഡർ ഡോ. ഒൗസാഫ്​ സഇൗദും​ വ്യക്തമാക്കിയിരുന്നു. സൗദിയധികൃതരുമായി ചർച്ച നടത്തിവരികയാണെന്നും പുരോഗതിയുണ്ടെന്നുമാണ്​ അന്നദ്ദേഹം വ്യക്തമാക്കിയത്​. അതോടെ ​പ്രവാസികൾക്കിടയിൽ പ്രതീക്ഷ വാനോളം ഉയർന്നു. അവധിക്ക്​ പോയവരും പുതിയ വിസയിൽ വരാൻ കാത്തുനിൽക്കുന്നവരുമായ നിരവധിയാളുകളാണ് സൗദിയിലേക്ക്​ നേരിട്ട്​ വിമാന സർവിസ്​ പുനരാരംഭിക്കുന്നത്​ കാത്ത്​​ ഇന്ത്യയിൽ ജിജ്ഞാസയോടെ കഴിയുന്നത്​. യാത്രാസൗകര്യം പുനഃസ്ഥാപിക്കുന്ന കാര്യത്തിൽ കേന്ദ്രസർക്കാർ അടിയന്തര ഇടപെടൽ നടത്തണമെന്ന്​ പ്രവാസികൾക്കിടയിൽ നിന്ന്​ ശക്തമായ ആവശ്യമാണ്​ ഉയർന്നത്​. ഇൗ പശ്ചാത്തലത്തിലാണ്​ ഇന്ത്യൻ വിദേശകാര്യമ​ന്ത്രാലയം വിമാന സർവിസ്​ പുനരാരംഭിക്കണമെന്ന്​ ഗൾഫ്​ രാജ്യങ്ങളോട്​ ആവശ്യപ്പെട്ടത്​.

വിദേശകാര്യ മന്ത്രി എസ്. ജയശങ്കര്‍ കഴിഞ്ഞയാഴ്ച ജി.സി.സി അധികൃതരുമായി നടത്തിയ ചർച്ചയില്‍ ഇന്ത്യൻ പ്രവാസികൾക്ക്​ ഗൾഫ്​ രാജ്യങ്ങളിലെ ജോലി സ്ഥലത്തേക്ക് മടങ്ങാൻ സൗകര്യം ഒരുക്കണമെന്ന്​ ആവശ്യപ്പെട്ടു​. തുടർന്നാണ്​ ഇന്ത്യൻ മിഷൻ സൗദിയധികൃതരെ ബന്ധപ്പെട്ട്​ ഇൗ വിഷയത്തിൽ ചർച്ച സജീവമാക്കിയത്​. ഇൗ വഴിയിലെ ഒടുവിലത്തെ സംഭവവികാസമാണ്​ എംബസി ഉന്നതസംഘം ബുധനാഴ്​ച ഗാക അധികൃതരുമായി നടത്തിയ കൂടിക്കാഴ്​ച. ഇന്ത്യക്കും സൗദിക്കുമിടയിൽ നേരിട്ട്​ വിമാന സർവിസ്​ ഇല്ലാത്തതിനാൽ പ്രവാസികൾ വളരെ ദുരിതത്തിലാണ്​. അത്യാവശ്യമായി സൗദിയിലെത്തേണ്ടവര്‍ ദുബൈയിലും മറ്റുമെത്തി അവിടെ 14 ദിവസം താമസിച്ച് കോവിഡ് നെഗറ്റീവ്​ സർട്ടിഫിക്കറ്റുമായി വരേണ്ട പണച്ചെലവും അലച്ചിലുമേറെയുള്ള ദുർഘടമായ മാർഗമാണ്​ ഇപ്പോൾ ആശ്രയിക്കുന്നത്​. ഇതിനൊരു പരിഹാരമാകണമെന്നാണ്​ എല്ലാവരും ആഗ്രഹിക്കുന്നതും അധികൃതരുടെ പുതിയ നീക്കങ്ങളിൽ പ്രതീക്ഷയർപ്പിച്ച്​ കാത്തിരിക്കുന്നതും.