മലഞ്ചെരുവിൽ കുടുങ്ങി​ മരണം മുന്നിൽക്കണ്ട്​ സുഡാനി ഇടയൻ; രക്ഷപ്പെടുത്തി സൗദി സന്നദ്ധസംഘം​

ദമ്മാം: മലഞ്ചെരുവിൽ കുടുങ്ങി മരണം മുന്നിൽക്കണ്ട സുഡാനി ഇടയനെ സൗദി സന്നദ്ധസംഘം രക്ഷപ്പെടുത്തി. റിയാദിൽനിന്ന്​ 320 കിലോമീറ്റർ തെക്കുപടിഞ്ഞാറ് അൽഖസ്​റ പട്ടണത്തിന്​ അടുത്തുള്ള മലഞ്ചെരുവിലാണ്​ വഴിതെറ്റി സുഡാനി ആട്ടിടയൻ തളർന്നുവീണത്​. പർവതനിരയിൽ​ തെരച്ചിൽ നടത്തുന്നതിനുവേണ്ടി പ്രത്യേകം സജ്ജീകരിച്ച വാഹനങ്ങളും ഗ്ലൈഡറുകളും ഉപയോഗിച്ച്​ സംഘം നടത്തിയ തെരച്ചിലിനൊടുവിലാണ്​ മൃതപ്രായനായ നിലയിൽ ഇയാളെ കണ്ടെത്തിയത്​. മോശം കാലാവസ്ഥയിലും ജീവൻ പണയം വെച്ച്​ നടത്തിയ തെരച്ചിലിനൊടുവിലാണ്​ ഇയാളെ രക്ഷിക്കാനായത്​.

ഇടയനെ കാണാനില്ലെന്ന്​ ബുധനാഴ്ചയാണ്​ സൗദി പൊലീസിന്​ കുടുംബം പരാതി നൽകിയത്​​. പൊലീസ്​ നൽകിയ ഔദ്യോഗിക കത്തുമായി കുടുംബം സൗദി സന്നദ്ധ സംഘത്തിന്‍റെ സഹായം തേടുകയായിരുന്നു. കടുത്ത ചൂടും വരണ്ട കാറ്റുമുണ്ടായിരുന്നെങ്കിലും തെരച്ചിൽ ആരംഭിച്ച്​ ഒരു മണിക്കൂറിനകം ഇയാളെ കണ്ടെത്താൻ കഴിഞ്ഞു. രണ്ട്​ ദിവസത്തോളം മലമുകളിൽ പെട്ടുപോയ ഇയാൾ കടുത്ത ചൂടിൽ നിർജ്ജലീകരണം സംഭവിച്ച സ്ഥിതിയിലായിരുന്നു.

ഉടൻതന്നെ സുരക്ഷിതസ്ഥാനത്തേക്ക്​ മാറ്റി പ്രാഥമിക ശു​ശ്രൂഷകൾ നൽകിയതിന്​ ശേഷം ആശുപത്രിയിലേക്ക്​ മാറ്റി. ഇത്​ ഞങ്ങൾക്ക്​ ഏറെ സന്തോഷം നൽകുന്നതാണെന്നും ഇത്തരത്തിൽ കുടുങ്ങിപ്പോയ പലരേയും ജീവനോടെ തിരിച്ചുകിട്ടിയിട്ടില്ലെന്നും ടീമിലെ അംഗമായ അബു അബ്ബാസ്​ പറഞ്ഞു.

രക്ഷപ്പെടുത്തുന്ന വിഡിയോയും ചിത്രങ്ങളും സാമൂഹിക മാധ്യമങ്ങളിൽ പ്രചരിച്ചതോടെ സന്നദ്ധ സംഘത്തിന്​ ലോകത്തിന്‍റെ വിവിധ ഭാഗങ്ങളിൽനിന്ന്​ അനുമോദന പ്രവാഹമാണ്​. പർവതങ്ങളിലേക്കോ മരുഭൂമിയിലേക്കോ പോകാൻ ആഗ്രഹിക്കുന്ന ആളുകൾ യാത്രയ്ക്ക് മുമ്പ് ഉപഗ്രഹങ്ങൾ വഴി മൊബൈൽ നെറ്റുവർക്കുകൾക്ക് പ്രവർത്തിക്കുന്ന സ്മാർട്ട് ഉപകരണങ്ങളിൽ നാവിഗേഷൻ ആപ്പുകൾ എന്നിവ ഡൗൺലോഡ് ചെയ്യണമെന്നും അബ്ബാസ് ​ആവശ്യപ്പെട്ടു.

മൊബൈൽ നെറ്റുവർക്കുകൾ കിട്ടാത്ത ഇടങ്ങളിലേക്ക്​ പോകുമ്പോൾ കുടുംബത്തെ യാത്രയുടെ വിശദവിവരങ്ങൾ അറിയിക്കണമെന്നും സംഘം ആളുകളോട്​ ആവശ്യപ്പെട്ടു. കൂടാതെ വെള്ളവും ഭക്ഷണവും കൂടുതലായി കരുതുകയും വേണം. രണ്ട് വർഷം മുമ്പ് രൂപവത്​കരിച്ച ഈ സന്നദ്ധ സംഘം, മരുഭൂമിയിലോ പർവതങ്ങളിലോ കുടുങ്ങിപ്പോയ 120 ഓളം ആളുകളെ രക്ഷപ്പെടുത്തി ജീവിതത്തിലേക്ക്​ തിരികെ എത്തിച്ചിട്ടുണ്ട്​.