ഈ വർഷത്തെ ഹജ്ജ്​ വിജയകരം -മക്ക ഗവർണർ

ജിദ്ദ: ഈ വർഷത്തെ ഹജ്ജ്​ വിജയകരമെന്ന്​ മക്ക ഗവർണറും സൗദി ഹജ്ജ്​ കമ്മിറ്റി അധ്യക്ഷനുമായ അമീർ ഖാലിദ്​ അൽഫൈസൽ. തീർഥാടകർക്കിടയിൽ അപകടങ്ങളോ പകർച്ചവ്യാധികളോ ഒന്നും റിപ്പോർട്ട്​ ചെയ്യപ്പെടാതെയും സുരക്ഷ, സേവനം, ആരോഗ്യം തുടങ്ങി എല്ലാ തലങ്ങളിലും ഒരുക്കിയ നടപടികളും ക്രമീകരണങ്ങളും വിജയകരമായും തികച്ചും സംതൃപ്​തികരമായ ഒരു പരിസമാപ്​തി കുറിക്കാൻ ഇത്തവണത്തെ ഹജ്ജിന്​ ആയെന്ന്​​ പ്രഖ്യാപിക്കുന്നതിൽ തനിക്ക് ഏറെ​ സന്തോഷമുണ്ടെന്നും ദൈവത്തിന്​ സ്​തുതിയെന്നും മക്ക ഗവർണർ പറഞ്ഞു.

സന്തോഷകരമായ ഈ അവസരത്തിൽ തീർഥാടകരുടെ സേവനത്തിനായി പ്രവർത്തിക്കുന്ന എല്ലാ സഹപ്രവർത്തകരുടെ പേരിലും സൽമാൻ രാജാവിനു വേണ്ടിയും എല്ലാവർക്കും അഭിനന്ദനങ്ങളും അനുഗ്രഹങ്ങളും അറിയിക്കുന്നു. ഈ വിജയം കൈവരിക്കുന്നതിൽ വലിയ സ്വാധീനം ചെലുത്തിയ ഈ വർഷത്തെ ഹജ്ജ്​ സുരക്ഷാപദ്ധതികളുടെ പിന്തുണയ്ക്കും തുടർനടപടികൾക്കും അംഗീകാരത്തിനും ആഭ്യന്തര മന്ത്രിയോടും നന്ദി പറയുന്നു.

മഹത്തായ പ്രവർത്തനങ്ങൾ ചെയ്​തു തീർഥാടകരുടെ സേവനത്തിൽ അഭിമാനകരമായ പ്രവർത്തനം കാഴ്​ചവെച്ച എല്ലാ വകുപ്പുകൾക്കും നന്ദിയും അഭിനന്ദനവുമുണ്ട്​. പ്രത്യേകിച്ച്​ തീർഥാടകരെ സേവിക്കുന്നതിനും അവരെ സുരക്ഷിതരാക്കുന്നതിനും അവർക്ക് ആവശ്യമായ മെഡിക്കൽ സേവനങ്ങൾ നൽകുന്നതിനും പ്രവർത്തിച്ച സുരക്ഷാ ഉദ്യോഗസ്ഥർക്കും മെഡിക്കൽ സ്​റ്റാഫുകൾക്കും പ്രത്യേകം നന്ദി പറയുന്നു. ഓരോ ഹജ്ജിലും നാം കാണുന്ന വിജയങ്ങൾ യാദൃശ്ചികമായി ഉണ്ടായതല്ല, മറിച്ച് സ്ഥാപക രാജാവായ അബ്​ദുൽ അസീസ് ബിൻ അബ്​ദുറഹ്​മാ​െൻറ കാലഘട്ടം മുതൽ സൽമാൻ രാജാവി​െൻറ കാലം വരെയുള്ള വിജയം ദൈവത്തി​െൻറ കാരുണ്യം കൊണ്ടാണ്​.

'രണ്ട് വിശുദ്ധ മസ്​ജിദുകളുടെ സൂക്ഷിപ്പുകാരൻ' എന്ന പേര് തെരഞ്ഞെടുത്തത് ഇരുഹറമുകളോടും അവിടെ എത്തുന്നവരോടും കാണിക്കുന്ന കരുതലി​െൻറയും ശ്രദ്ധയുടെയും ഏറ്റവും മികച്ച തെളിവാണ്. തീർഥാടകർക്ക്​ സേവനം ചെയ്യാനുള്ള ഭാഗ്യം സൗദി ജനതക്ക്​ ദൈവം നൽകിയിട്ടുണ്ട്. ആ രംഗത്ത്​ അതുല്യവും വിശിഷ്ടവുമായ മാതൃകയാകാൻ അവർ അശ്രാന്ത പരിശ്രമം തുടരുമെന്നും മക്ക ഗവർണർ പറഞ്ഞു.