സൗദിയിൽ തൊഴിൽപ്രശ്നങ്ങളിൽ കുടുങ്ങിയ മൂന്ന്​ ഇന്ത്യൻ വീട്ടുവേലക്കാരികൾക്ക്​ കൂടി മോചനം

ദമ്മാം: വിവിധ തൊഴിൽ പ്രശ്നങ്ങളിൽ പെട്ട്​ ഇന്ത്യൻ എംബസിയുടെ അഭയകേന്ദ്രത്തിൽ മാസങ്ങളോളം കഴിഞ്ഞ മൂന്ന് ഇന്ത്യൻ​ വീട്ടുവേലക്കാരികൾ നാട്ടിലേക്ക്​ മടങ്ങി. ഹൈദരാബാദ്​ സ്വദേശിനി സക്കീന ഫാത്തിമ, ബീഹാർ സ്വദേശിനി നജ്​മിൻ ബീഗം, ബംഗളുരു സ്വദേശിനി അസ്മത്​ എന്നിവരാണ്​ സാമൂഹിക പ്രവർത്തകരുടെ ഇടപെടലിലുടെ നിയമക്കുരുക്കഴിച്ച്​ നാടണഞ്ഞത്​. ഹഫർ അൽ ബാത്വിനിലെ സ്വദേശിയുടെ വീട്ടിൽ വേലക്കാരിയായി എത്തിയ സക്കീന ഫാത്തിമ നാലുമാസം മാത്രമേ ജോലിചെയ്തുള്ളു.

തൊഴിൽ കാഠിന്യവും മാനസിക പീഢനവും സഹിക്കാനാവാതെ ഇവർ വീട്ടിലുള്ളവരുമായി തർക്കത്തിലാവുകയും പൊലീസ്​ കേസാവുകയും ചെയ്തു. ഇതിനിടയിൽ സക്കീന റിയാദിലെ ഇന്ത്യൻ എംബസ്സിയുടെ അഭയ കേന്ദ്രത്തിൽ എത്തിപ്പെട്ടെങ്കിലും പൊലീസ്​ കേസ്​ ഉള്ളതിനാൽ എക്​സിറ്റ്​ ​ ലഭ്യമാകാതെ മാസങ്ങൾ നീണ്ടുപോവുകയായിരുന്നു. പിന്നീട്​ എംബസി പ്രതിനിധി ഇവരുമായി ഹഫർ അൽ ബാത്വിനിലെത്തി പൊലീസ്​ കേസ്​ പരിഹരിച്ചതിന്​ ശേഷം എക്സിറ്റ്​ ലഭ്യമാക്കാൻ ദമ്മാമിലെ സാമൂഹിക പ്രവർത്തക മഞ്​ജു മണിക്കുട്ടന്​ കൈമാറുകയായിരുന്നു.

ജയിലിൽ കിടക്കാതെ എക്​സി​റ്റ്​ ലഭ്യമാക്കണമെങ്കിൽ ഇഖാമയുടെ പിഴ സംഖ്യ അടക്കേണ്ടതുണ്ടായിരുന്നു. ഹൈദരാബാദി​ റസ്​റ്റോറൻറ്​ ഷാലിമാറി​ന്റെ ഉടമ സഹായവുമായി രംഗത്ത്​ വന്നതോടെ അതിനും പരിഹാരമായി. 10 മാസത്തിലധികം ജോലിചെയ്തിട്ടും മൂന്ന്​ മാസത്തെ ശമ്പളം കിട്ടാതായതോടെയാണ്​ എംബസിയുടെ ഔട്​സോഴ്​സ്​ സെൻററിൽ അഭയം തേടിയത്​. അവർ അറിയിച്ചതനുസരിച്ച്​ എത്തിയ മഞ്​ജു മണിക്കുട്ടൻ അവരെ രണ്ട്​ മാസത്തോളം വീട്ടിൽ താമസിപ്പിച്ച്​ രേഖകൾ പൂർത്തിയാക്കി എക്​സിറ്റ്​ ലഭ്യമാക്കുകയായിരുന്നു.

ബംഗളുരു സ്വദേശിനി അസ്മത്​ എത്തിയിട്ട്​ നാലുവർഷം കഴിഞ്ഞു. ആദ്യത്തെ സ്​പോൺസറുടെ പക്കൽ നിന്ന്​ ഓടിപ്പോയ അസ്മത്​ മറ്റൊരു സ്വദേശിയുടെ വീട്ടിൽ ജോലിചെയ്യുകയായിരുന്നു. ‘ഹുറൂബ്’​ ആയതിനാൽ ഡീപോട്ടേഷൻ വഴി എക്​സിറ്റ്​ ലഭ്യമാക്കുകയായിരുന്നു. മിർസാ ബേഗ്​ ഇവർക്ക്​ ടിക്കറ്റ്​ നൽകാൻ തയ്യാറായതോടെ മൂന്നുപേരുടെ യാത്രയും സുഗമമായി. ഇവർക്കാവശ്യമായ സാധനങ്ങൾ നൽകാൻ പല സുമനസ്സുകളും തയ്യാറായതോടെ ദുരിതകാലം മറന്ന്​ സന്തോഷത്തോടെ നാടണയാൻ സാധിച്ചത്​ സന്തോഷകരമെന്ന്​​ മഞ്​ജു മണിക്കുട്ടൻ ‘ഗൾഫ്​ മാധ്യമ’ത്തോട്​ പറഞ്ഞു.