ജിദ്ദ: സൗദിയിൽ ടൂറിസം വിദ്യാഭ്യാസ സംരംഭത്തിന് തുടക്കം കുറിച്ചു. സ്കൂൾ, യൂനിവേഴ്സിറ്റി വിദ്യാർഥികളെ ലക്ഷ്യമിട്ടാണ് ഇങ്ങനെയൊരു സംരംഭം സൗദി ടൂറിസം വകുപ്പ് ആരംഭിച്ചിരിക്കുന്നത്. തൊഴിൽ വിപണിക്ക് ആവശ്യമായ ജോലികളിൽ ചേരുന്നതിന് യൂനിവേഴ്സിറ്റി വിദ്യാർഥികൾക്ക് പഠനാവസരങ്ങൾ തുറക്കുന്നതിന് പ്രധാന ദേശീയ അന്തർദേശീയ വിദ്യാഭ്യാസ സ്ഥാപനങ്ങളുമായി സഹകരിക്കാൻ സംരംഭത്തിലൂടെ ശ്രമിക്കുമെന്ന് മന്ത്രാലയം പറഞ്ഞു.
വിദ്യാർഥികളിൽ അവബോധം വളർത്തുകയും അവരുടെ ഭാവി യാത്രയെ ടൂറിസം വിദ്യാഭ്യാസ പാതകളിലേക്ക് നയിക്കുകയും ചെയ്യുന്നതിനാണിത്.
ടൂറിസം, ഹോസ്പിറ്റാലിറ്റി മേഖലകളിലെ വിദ്യാഭ്യാസത്തിെൻറ ഗുണനിലവാരം ഉയർത്തുക, സൗദിയിലെ പ്രതിഭകളെ പിന്തുണക്കുകയും അവരുടെ കഴിവുകൾ വികസിപ്പിക്കുകയും ചെയ്യുക, വിനോദസഞ്ചാര മേഖലയിൽ പ്രവർത്തിക്കാൻ വിദ്യാർഥികളെ പ്രാപ്തരും യോഗ്യരുമാക്കുകയും ചെയ്യുക എന്നിവ ഈ സംരംഭത്തിെൻറ ലക്ഷ്യമാണെന്നും മന്ത്രാലയം വ്യക്തമാക്കി.
ടൂറിസം, ഹോസ്പിറ്റാലിറ്റി, ടൂറിസ്റ്റ് മാർഗ നിർദേശം, ട്രാവൽ ആൻഡ് ടൂറിസത്തിൽ ഡിപ്ലോമ, മൗണ്ടയ്ൻ റിസോർട്ട് മാനേജ്മെൻറ് ഡിപ്ലോമ എന്നിവ ടൂറിസം വിദ്യാഭ്യാസ സംരംഭത്തിലുൾപ്പെടും. കിങ് ഫഹദ് യൂനിവേഴ്സിറ്റി ഓഫ് പെട്രോളിയം ആൻഡ് മിനറൽസ് അടക്കം നിരവധി സഹകരണ വിദ്യാഭ്യാസ സ്ഥാപനങ്ങളുമായി സഹകരണ കരാറുകളിൽ ഒപ്പുവെച്ചതായും മന്ത്രാലയം വൃത്തങ്ങൾ പറഞ്ഞു.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.