അജ്മാൻ ഡ്യുവാത്ത്ലോണിൽ പങ്കെടുക്കുന്നവർ (ഫയൽ ചിത്രം)
അജ്മാൻ: അജ്മാൻ ടൂറിസം വികസന വകുപ്പിന്റെ ആഭിമുഖ്യത്തില് സംഘടിപ്പിക്കുന്ന അജ്മാൻ ഡ്യുവാത്ത്ലോൺ മത്സരത്തിന്റെ നാലാം പതിപ്പ് ഒക്ടോബര് ഒന്നിന് നടക്കും. അജ്മാന് അൽ സഫിയയില് സംഘടിപ്പിക്കുന്ന മത്സരങ്ങളിലെ ആദ്യത്തെ മൂന്നു വിജയികള്ക്ക് ആകർഷകമായ സമ്മാനങ്ങള് വിതരണം ചെയ്യും. വ്യത്യസ്ത പ്രായങ്ങൾ ഉൾക്കൊള്ളുന്ന വിഭാഗങ്ങള്, ഇമാറാത്തി വിഭാഗം, വ്യത്യസ്ത ലിംഗഭേദങ്ങളിൽ നിന്നുള്ള ഓപൺ വിഭാഗങ്ങൾ എന്നിങ്ങനെയാണ് മത്സരങ്ങള് അരങ്ങേറുന്നത്. ദീർഘദൂരത്തില് അഞ്ചു കി.മീ,10 കി.മീ ഓട്ട മത്സരവും 40 കി.മീ സൈക്കിള് മത്സരവും സ്പ്രിന്റ് മത്സരത്തില് അഞ്ചു കിലോമീറ്റര്, 2.5 കിലോമീറ്റര് ദൂരം ഓട്ടവും 20 കിലോമീറ്റര് സൈക്കിള് മത്സരവും നടക്കും.
സൂപ്പർ സ്പ്രിന്റ് മത്സരത്തില് 2.5 കിലോമീറ്റര്, 2.5 കിലോമീറ്റര് ദൂരം ഓട്ടവും 10 കിലോമീറ്റര് സൈക്കിള് മത്സരവും അരങ്ങേറും. ഒരു ടീമിൽ രണ്ടോ മൂന്നോ അംഗങ്ങള് വരെ പങ്കെടുക്കാം. ടീമിൽ രണ്ട് അംഗങ്ങളുണ്ടെങ്കിൽ ഒരാൾക്ക് ഓട്ടത്തിലും മറ്റൊരാൾക്ക് സൈക്കിൾ മത്സരത്തിലും പങ്കെടുക്കാം. ടീമിൽ മൂന്ന് അംഗങ്ങളുണ്ടെങ്കിൽ ഒരാൾക്ക് ആദ്യ വിഭാഗത്തിലെ ഓട്ടത്തിലും മറ്റേയാൾക്ക് സൈക്കിൾ വിഭാഗത്തിലും അവസാനത്തെയാൾക്ക് രണ്ടാമത്തെ വിഭാഗത്തിലെ ഓട്ടത്തിലും പങ്കെടുക്കാം. ഒക്ടോബര് ഒന്നിന് നടക്കുന്ന മത്സരങ്ങളിലേക്കുള്ള രജിസ്ട്രേഷന് ആരംഭിച്ചു. രാവിലെ 6.35ന് ആരംഭിക്കുന്ന മത്സരങ്ങളിലെ സൈക്കിള് മത്സരങ്ങളില് പങ്കെടുക്കുന്നവര്ക്ക് സ്വന്തം സൈക്കിള് ഉപയോഗിക്കാനും അവസരമുണ്ട്. കൂടുതല് വിവരങ്ങള്ക്ക് Ajman Duathlon 2023 എന്ന വെബ്സൈറ്റ് വഴി ബന്ധപ്പെടാം.
വായനക്കാരുടെ അഭിപ്രായങ്ങള് അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.