ദുബൈ: ഈ വർഷം ആദ്യ പകുതി പിന്നിടുമ്പോൾ ദുബൈയിൽ ടാക്സി ഉപയോഗിച്ചവരുടെ എണ്ണത്തിൽ വൻ കുതിപ്പ് രേഖപ്പെടുത്തിയതായി ദുബൈ റോഡ് ഗതാഗത അതോറിറ്റി. ആറു മാസത്തിനിടെ ദുബൈ ടാക്സി ഉപയോഗിച്ചത് 9.69 കോടി പേരാണ്. കഴിഞ്ഞ വർഷം ഇതേ കാലയളവിൽ ടാക്സി ഉപയോഗിച്ചവരുടെ എണ്ണം 9.62 കോടിയായിരുന്നു. ആറു മാസത്തിനിടെ ടാക്സി ട്രിപ്പുകളുടെ എണ്ണം 5,57,000 ആയും ഉയർന്നിട്ടുണ്ട്.
കഴിഞ്ഞ വർഷം ഇതേ കാലയളവിൽ ടാക്സി ട്രിപ്പുകളുടെ എണ്ണം 5,53,000 ആയിരുന്നു. എമിറേറ്റിൽ ഡ്രൈവർമാരുടെ എണ്ണത്തിലും വർധനയുണ്ടായിട്ടുണ്ട്. 26,000ത്തിൽനിന്ന് 30,000 ആയാണ് വർധിച്ചത്. ടാക്സികളുടെ എണ്ണം 12,778 ആയി വർധിച്ചു. കഴിഞ്ഞ വർഷം ഇതേ കാലയവളിനേക്കാൾ 644 ടാക്സികളാണ് കൂടിയത്.
കഴിഞ്ഞ അഞ്ചു വർഷമായി എമിറേറ്റിലെ പൊതുഗതാഗത വ്യവസായ മേഖലയിൽ തുടർച്ചയായ വളർച്ചയാണ് രേഖപ്പെടുത്തുന്നതെന്ന് ആർ.ടി.എയുടെ പ്ലാനിങ് ആൻഡ് ബിസിനസ് ഡെവലപ്മെന്‍റ് ഡയറക്ടർ ആദിൽ ശാക്രി പറഞ്ഞു. ടാക്സി ട്രിപ്പുകളുടെയും ഡ്രൈവർമാരുടെയും വാഹനങ്ങളുടെ എണ്ണം ഉയർന്നതിലൂടെ ഉപഭോക്താക്കളുടെ വർധിച്ചുവരുന്ന യാത്ര ആവശ്യങ്ങൾ നിറവേറ്റുന്നുവെന്ന് ഉറപ്പുവരുത്താൻ അതോറിറ്റിക്ക് കഴിയുന്നതായും അദ്ദേഹം കൂട്ടിച്ചേർത്തു.
ഹാല ടാക്സിയുടെ ഇ-ഹെയ്ൽ സേവനങ്ങളിലൂടെയാണ് റെക്കോഡ് വളർച്ച നേടിയത്. കാരണം, ഈ വർഷം ആദ്യ പകുതിയിൽ ആകെ യാത്ര ചെയ്തവരിൽ 40 ശതമാനം പേർ ഇ-ബുക്കിങ് വഴി യാത്ര ബുക്ക് ചെയ്തവരാണ്. കൂടാതെ, 2024ന്‍റെ ആദ്യ പകുതിയിൽ 76 ശതമാനം ഹാല യാത്രകൾക്കും ശരാശരി 3.5 മിനിറ്റിൽ താഴെയുള്ള സമയത്തിനുള്ള യാത്രക്കാരന് അടുത്തെത്താനും സാധിച്ചു.
കഴിഞ്ഞ വർഷം ഇതേ കാലയളവിൽ നേടിയ 73 ശതമാനമായിരുന്നു ഇത്. ഉപഭോക്താക്കളുടെ ആവശ്യങ്ങളോടുള്ള പ്രതികരണത്തിന്‍റെ കാര്യക്ഷമത വർധിപ്പിച്ചതിന്‍റെ പ്രതിഫലനമാണിതെന്നും അദ്ദേഹം കൂട്ടിച്ചേർത്തു.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.