ഷാർജ: കേരളത്തിന്‍റെ ഖ്യാതി ലോകത്തോളം വളർത്തിയ ‘കമോൺ കേരള’, അറബ് നാടിന്‍റെ സാംസ്കാരിക നഗരിയായ ഷാർജയിൽ വീണ്ടുമെത്തുമ്പോൾ പ്രവാസത്തിന് എന്നും തണലൊരുക്കിയ ഭരണാധികാരിയുടെ സ്നേഹാംഗീകാരം.
‘ഗൾഫ് മാധ്യമം’ ഒരുക്കുന്ന മിഡിലീസ്റ്റിലെ ഏറ്റവും വലിയ ഇന്ത്യൻ വാണിജ്യ, സാംസ്കാരിക, വിനോദ, വൈജ്ഞാനിക മേളയായ കമോൺ കേരളയുടെ ആറാം എഡിഷൻ മുഖ്യരക്ഷാധികാരി യു.എ.ഇ സുപ്രീം കൗൺസിൽ അംഗവും ഷാർജ ഭരണാധികാരിയുമായ ശൈഖ് ഡോ. സുൽത്താൻ ബിൻ മുഹമ്മദ് അൽ ഖാസിമി. കഴിഞ്ഞ അഞ്ച് എഡിഷനുകളും ശൈഖ് സുൽത്താന്‍റെ രക്ഷാകർതൃത്വത്തിൽ അരങ്ങേറിയ കമോൺ കേരളയുടെ ആറാം എഡിഷൻ ജൂൺ ഏഴ്, എട്ട്, ഒമ്പത് തീയതികളിൽ ഷാർജ എക്സ്പോ സെന്‍ററിലാണ് അരങ്ങേറുന്നത്.
ഷാർജ ചേംബർ ഓഫ് കോമേഴ്സ് ആൻഡ് ഇൻഡസ്ട്രിയുടെ സഹകരണത്തോടെയാണ് മേള സംഘടിപ്പിക്കുന്നത്. ‘ഗൾഫ് മാധ്യമം’ പുറത്തിറങ്ങി 25 ആണ്ട് പിന്നിടുന്ന വർഷത്തിലെ മേള ഏറെ പുതുമകളോടെയാണ് അണിയിച്ചൊരുക്കുന്നത്.
പ്രവാസികളെ എന്നും ചേർത്തുപിടിച്ച ശൈഖ് സുൽത്താന്‍റെ രക്ഷാധികാരം യു.എ.ഇയിലെ മലയാളി സമൂഹത്തിന് അഭിമാനകരവും പ്രവാസ മലയാളത്തിന്‍റെ മുഖപത്രമായ ‘ഗൾഫ് മാധ്യമ’ത്തിന് അംഗീകാരവുമാണ്. ഇന്ത്യ-യു.എ.ഇ വ്യാപാര ബന്ധത്തിന് ദിശാബോധം പകരുന്ന ‘കമോൺ കേരള’യുടെ മുൻ എഡിഷനുകളുടെ വിജയത്തിന് ശൈഖ് സുൽത്താന്‍റെ രക്ഷാധികാരം കരുത്ത് പകർന്നിട്ടുണ്ട്.
ഇന്ത്യയും യു.എ.ഇയും തമ്മിൽ സമഗ്ര സാമ്പത്തിക സഹകരണ കരാർ (സെപ) നിലവിൽവന്ന ശേഷം ഇരുരാജ്യങ്ങളും തമ്മിലെ വ്യാപാരം അതിവേഗം കുതിച്ചുയരുകയാണ്. ഈ സാഹചര്യത്തിൽ വ്യാപാര, വ്യവസായ രംഗങ്ങളിൽ ഉണർവും ആത്മവിശ്വാസവും ശക്തമായ ഘട്ടത്തിലാണ് ‘കമോൺ കേരള’ വീണ്ടുമെത്തുന്നത്.
യു.എ.ഇയിലെ പ്രവാസി സമൂഹം ഓരോ വർഷവും കാത്തിരിക്കുന്ന മേളയായി പരിണമിച്ച മേള ഇക്കുറി വിരുന്നെത്തുന്നത് കൂടുതൽ വ്യത്യസ്ത പരിപാടികളുമായാണ്. മേളക്ക് മുന്നോടിയായി മേയ് 18ന് അബൂദബിയിലും ജൂൺ അഞ്ചിന് ഷാർജയിലും ബിസിനസ് സമ്മിറ്റുകൾ അരങ്ങേറുന്നുണ്ട്. ഇന്ത്യയിലെയും യു.എ.ഇയിലെയും നിക്ഷേപാവസരങ്ങളും സാധ്യതകളും ഇതിൽ ചർച്ചയാകും.
‘കമോൺ കേരള’ ദിനങ്ങളിൽ വാണിജ്യ സ്ഥാപനങ്ങളുടെ പ്രദർശനത്തിന് പുറമെ പകൽ സമയങ്ങളിൽ വിനോദവും വിജ്ഞാനവും സമന്വയിപ്പിച്ച ചടങ്ങുകളും മൂന്ന് രാത്രികളിൽ സംഗീത-കലാപരിപാടികളും ഒരുക്കും. ഇന്ത്യൻ-അറബ് വനിത സംരംഭകർക്ക് ആദരമൊരുക്കുന്ന ഇന്തോ-അറബ് വിമൻ എക്സലൻസ് പുരസ്കാര ദാനവും നടക്കും. കുട്ടികൾക്കായി വൻ സന്നാഹത്തോടെ മൂന്ന് ദിവസവും ‘ലിറ്റിൽ ആർടിസ്റ്റ്’ ചിത്രരചന മത്സരവും ഒരുക്കിയിട്ടുണ്ട്.
കുടുംബങ്ങൾക്കായി മത്സരങ്ങളും വിവിധ മേഖലകളിൽ പരിശീലന വർക്ഷോപ്പുകളുമുണ്ട്. മത്സരങ്ങളിൽ പങ്കെടുക്കുന്നവർക്ക് മാത്രമല്ല, ടിക്കറ്റെടുക്കുന്നവർക്കും വമ്പൻ സമ്മാനങ്ങളൊരുക്കിയാണ് ആറാം എഡിഷൻ അരങ്ങിലെത്തുന്നത്. മേളയുടെ സമാപന ദിവസമായ ജൂൺ ഒമ്പതിന് പ്രമുഖർ പങ്കെടുക്കുന്ന വേദിയിൽ ‘ഗൾഫ് മാധ്യമം’ രജതജൂബിലി ആഘോഷവും നടക്കും.
വായനക്കാരുടെ അഭിപ്രായങ്ങള്‍ അവരുടേത് മാത്രമാണ്, മാധ്യമത്തിേൻറതല്ല. പ്രതികരണങ്ങളിൽ വിദ്വേഷവും വെറുപ്പും കലരാതെ സൂക്ഷിക്കുക. സ്പർധ വളർത്തുന്നതോ അധിക്ഷേപമാകുന്നതോ അശ്ലീലം കലർന്നതോ ആയ പ്രതികരണങ്ങൾ സൈബർ നിയമപ്രകാരം ശിക്ഷാർഹമാണ്. അത്തരം പ്രതികരണങ്ങൾ നിയമനടപടി നേരിടേണ്ടി വരും.